Honoré d’Urfé

“ Il est bien vray que quelque fois ma memoire se couvre d’oubly, comme le brasier de cendre, et que mon affection se lasse, comme l’arc qui a demeuré trop long-temps tendu ; mais comme le brasier, pour peu qu’il soit soufflé, se descouvre vif et ardent, et l’arc, quand on le retend, est aussi fort qu’auparavant, de mesme est-il de ma memoire et de mon affection, lors que cette cendre de l’oubly est ostée par la veue, et par la presence, ou bien que mon amour par quelque nouvelle faveur se renforce de desir et d’esperance. – Je voy bien, dit Stiliane, qu’en fin Hylas est tousjours Hylas. ”

“ Vraiment, dit Daphnide, voilà le chevalier le plus outrecuidé qui fut jamais : il ose bien demander reparation en ce qu’il ne doit attendre que punition. Mais, Delie, puisqu’il vous veut bien pour son juge, je vous veux bien aussi pour le mien. Oyez ce qu’il a dit, et le condamnez au supplice qu’il merite, si toutesfois il s’en peut trouver un qui puisse esgaler son offence. Et afin qu’il ne die pas que je le rapporte trop aigrement, je veux bien que vous l’oyez de sa bouche mesme. ”

“ Dieu me soit tesmoing, grand et invincible roy, si je n’estime et n’admire tout ce qui est en ta personne, et tout ce qui procede de toy. Je te voy chery, et favorisé des dieux, aymé de tes subjects, honoré de tes voisins, et redouté de tes ennemis ; je recognois en toy une prudence en toutes tes actions, une generosité en toutes tes entreprises, une justice pour chacun, et une amour particuliere envers moy, qui m’oblige non seulement à t’admirer, et à te servir, comme le reste de l’univers, mais à t’aymer et estimer autant qu’il m’est possible. ”

“ Vous n’estes point ignorant, dit-elle, de combien de graces le Ciel et la nature vous ont relevé par-dessus le reste des hommes. Si vous recherchez Clarinte, elle en ressentira les effects, et, soudain, mesprisant Euric et toute son ambition, elle se donnera toute à vous ! O Amour ! ne me dois-tu pas la vengeance de cette trompeuse flaterie ? Elle me veut persuader que Clarinte quittera cette mesme ambition, qui est cause que Daphnide me rejette et me donne à une autre. Mais pourquoy peut-on penser qu’elle me vueille ainsi esloigner d’elle ? ”

“ Premierement sa beauté est telle qu’il n’y a rien qui l’esgale. – Elle en sera tant plus glorieuse, dit Hylas. – Il n’importe, respondit le berger, une fille un peu glorieuse est plus aymable. – Ouy, repliqua Hylas, pourveu que ce soit envers les autres, mais non pas envers nous ; et puis cette beauté n’est-elle pas subjecte à l’injure des années ?
– O Hylas ! dit Calidon, quand la vieillesse ostera la beauté à Astrée, l’aage qu’aura Calidon ne luy permettra guere de se soucier de la beauté. De plus les parens qui la gouvernent, et ceux qui ont puissance sur moy, appreuvent nostre affection. ”

“ Mon frere, mon amy, il y a grande difference de l'amour au mariage, parce que l'amour ne dure qu'autant qu'il plaist, mais le mariage se rend d'autant plus long qu'il est plus ennuyeux : le premier, c'est le symbole de la liberté, parce que l'amour ne contraint personne que par la volonté ; au contraire, le mariage, c'est le symbole de la servitude, parce qu'il n'y a que la mort qui en puisse desnouer les liens. ”

“ Le mal, luy dis-je froidement, est dans l’esprit. Mais, Clarine, dites-moy, je vous supplie, fustes-vous la premiere qui me trouvastes en l’estat où je m’estois mise ? – Et qui est-ce, me dit-elle, qui a plus de soing de vous ? – Je sçay bien, luy respondis-je, que c’est Clarine. Mais, continuay-je, puis que vous fustes la premiere, ne vistes-vous point un mouchoir qui estoit marqué de mon sang ? ”

“ Il est vray, respondit le chevalier, avec un grand souspir, mais la fortune qui ne me vouloit pas tenir quitte à si bon marché, ordonna que je vivrois pour avoir encor un peu plus de loisir de me faire du mal. – Vrayement, dit la nymphe, il y en a plusieurs de bien trompez, car l’opinion de vostre mort est telle par toutes ces contrées que l’on ne tient rien de plus certain. ”

“ O Diane ! l’honneur non seulement de ces Forests et de ces rivages, mais la gloire de tous les hommes, et l’ornement de tout l’univers, vous voyez devant vous un berger, qui non seulement vous ayme, et vous offre son service et sa vie, mais vous adore, et vous sacrifie et son cœur et son ame, avec une si entiere affection, ou plustost devotion, que tout ainsi que la nature ne peut plus rien faire qui se puisse esgaler à vous, aussi l’amour ne sçauroit plus allumer une si grande ny si parfaicte affection dans quelque autre cœur que ce soit. ”

“ Y a-t’il quelqu’un qui puisse blasmer l’experience, puisqu’elle est mère et nourrice de la prudence ? Et toutesfois, parlez à Silvandre, et à ceux qui sont de sa secte, ils vous maintiendront au peril de leur vie, que ces experiences sont vicieuses, et qu’il faut, comme coquilles, depuis qu’on est attaché à un rocher, ne s’en séparer jamais. Voire, comme si les dieux ne nous avoient pas donné le jugement pour discerner des choses bonnes celles qui sont meilleures, et la volonté qui est tousjours portée de son naturel et par la raison à celles qui sont les plus parfaictes ! ”

“ Veux-tu plus d’heur que d’estre heureux ? Jouys, berger, de ce contentement que le Ciel t’a donné, sans en rechercher davantage qu’il ne t’en a pas voulu octroyer, et te contente de ce que les dieux ont jugé que tu devois estre content. Si c’est pour moy, Thamire, que tu desires ceste beauté, sors de ceste erreur, et croy, amy, que ton esloignement m’est si ennuyeux que si je pouvois perdre la vie sans perdre ta veue, ou sans estre privée de toy, je la donnerois librement pour ne t’esloigner jamais. ”

“ O dieux, dit Clarine, Arimant n’est pas mort ? – Non, Clarine, reprit Cryseide, il n’est pas mort, et il m’a escrit. Clarine alors, luy baisant une main : O trop heureuse Cryseide, dit-elle, puis qu’en quelque estat que vous soyez vous avez peu apprendre ces nouvelles ! Il n’y a plus rien d’ennuyeux, madame, en toute vostre fortune, puis qu’Arimant est encore parmy les hommes. – J’en dis autant que toy, Clarine, luy dit Cryseide, et tant s’en faut, je remercie les dieux, de tous les travaux qu’ils m’ont voulu donner, puis que je sçay que mon cher Arimant m’ayde à les supporter. ”

“ Celle pour qui je meurs ne cede en beauté à la mesme déesse d’Appelles, elle a plus de grace que les Graces mesmes. Et si l’Amour n’avoit le bandeau sur les yeux, sans doute Amour brusleroit d’amour pour elle, mais il est vray que je ne sçay qui elle est. – En ce dernier poinct, me repliqua-t’il, gist vostre folie,, mais où l’avez-vous veue ? – O dieux ! luy dis-je, n’estes-vous pas bien aveugle de ne veoir point le soleil quand il esclaire ? N’avez-vous point veu ces chariots qui ne font que de passer ? Dans le premier estoit celle que j’aime, et que je ne cognois point. ”

“ Et c’est ce que l’on nomme sympathie, qui est cette conformité que nous rencontrons d’avoir les uns avec les autres, et laquelle est la veritable source de l’amour, et non pas comme plusieurs ont creu que ce fust toute beauté ; car si la beauté estoit la source de l’amour, il s’ensuivroit que toutes les belles personnes seroient aimées de tous. Et au contraire, nous voyons-que non point les plus beaux et les plus dignes, mais ceux là seulement qui reviennent le plus, à, nostre humeur, et avec lesquels nous avons le plus de conformité, sont ceux que nous aimons le plus. ”

“ A ce mot, Alcidon, se levant de son siege, et se jettant à genoux devant la belle Daphnide et luy prenant la main : Je jure, dit-il par cette main qui seule m’a peu ravir le cœur, que jamais je n’ay rendu hommage qu’à elle seule ; qu’elle seule sera celle qui, à jamais, aura toute puissance sur moy. Establissez et ordonnez de moy et de ma fortune ce que vous voudrez : Alcidon aimera et adorera Daphnide jusques dans le cercueil, quelque rigueur qui soit en elle. ”

“ N’avons-nous point encor la cognoissance
Que nostre bien pend de nostre trespas,
Et que l’honneur desormais ne veut pas
Que nous ayons plus longue patience ?
Ces maux, ces morts, ces tourments infinis,
Jamais de nous ne se verront bannis,
Et seulement nous vivrons à l’outrage.
Celuy qui peut tant d’offenses souffrir,
Sans promptement se resoudre à mourir,
A bien un cœur, mais n’a point de courage. ”

“ Et parce qu’il est bien mal-aisé que la violente passion d’amour se renferme dans les limites de la raison, et de la discretion, depuis que Childeric eut donné air à sa flamme, en la declarant à Silviane, elle s’accreut de sorte que, rompant bien souvent les bornes de la modestie, il advint qu’un jour la voyant chanter, il se trouva de sorte transporté de cette puissante amour, qu’encores qu’il la vid au milieu de ses compagnes, et qu’il y eust une fort grande assemblée et de dames, et de chevaliers, il ne se peut empescher de la prendre par la teste et de la baiser par force. ”

“ Que personne ne trouve donc mauvais si je m’en ressouviens aussi long-temps que je vivray; et de peur que mesme par ma mort elles ne cessent de vivre, je te les remets, ô mon cher et bien-aymé Lignon, afin que les conservant, et les publiant, tu leur donnes une seconde vie, qui puisse continuer autant que la source eternelle qui te produit, et que par ainsi elles demeurent à la posterité aussi longuement que dans la France l’on parlera François. ”

“ En fin je levay de fortune la teste, et haussant les yeux, je vis qu’il en sousrioit : Periandre, luy dis-je, vous n’estes pas bon amy puis qu’au lieu de m’aider et d’avoir pitié de mon mal vous vous mocquez de ce que je vous dis. – Tant s’en faut que je m’en mocque, dict-il, qu’au contraire je l’admire, et ne puis penser que ce mal duquel vous vous plaignez soit veritable, si ce n’est que Amour, se soit voulu venger de vous, vous faisant espreuver en vous-mesme ce que vous n’avez peu croire en autruy. ”

“ J’aymerois mieux avoir perdu les yeux, que si je les employois jamais à regarder avec amour une autre beauté que la sienne, et avoir perdu le cœur qui me donne la vie, que si je m’en servois jamais à aymer autre bergere qu’Astrée. ”

“ Il y a bien de la difference, me respondit-il, des maladies du corps à celles de l’esprit ; car celles du corps se guerissent par leurs contraires, et celles de l’esprit par la possession de la chose qui luy fait le mal. Si l’ambition nous blesse, y a-t’il quelque meilleur remede pour en guerir, que de posseder la chose qui est ambitionnée ? ”

“ Vous m’avez cent fois advoué que l’amour est de soy-mesme bon, et je ne pense pas que vous vueillez maintenant dire le contraire, vostre silence me fait croire que vous y consentez. Et, à la verité, ce seroit autrement contrevenir au jugement de tous ceux qui en ont parlé avec raison, car, si rien ne peut produire que son semblable, amour procedant de cognoissance du bon et du beau, ne peut estre aussi que fort bon et fort beau. Mais ce qui est bon et beau, ne peut-il estre veu et cogneu sans estre aimé ? ”

“ Le grand Tautates, qui, par amour, a fait tout cet univers et par amour le maintient, veut non seulement que les choses insensibles, encores que contraires, soient unies et entretenues ensemble par liens d’amour, mais les sensibles et les raisonnables aussi. Et c’est pourquoy, aux elemens insensibles, il a donné des qualités qui les lient ensemble par sympathie : aux animaux, l’amour et le desir de perpetuer leur espece ; aux hommes, la raison qui leur apprend à aimer Dieu en ses creatures, et les creatures en Dieu. ”