François Habert

“ Bon zele, ayez de moy ceste asseurance
Que par l'instinct du Seigneur toutpuissant
Je me tiendray selon vostre esperance
En vertu haulte et honeur florissant,
Point ne seray (Dieu aydant) flechissant,
Car je cognoys que pour au Ciel attaindre,
Et de salut devenir jouissant,
Il fault un Dieu aymer, servir, et craindre.
Verité en concluant.
Conclusion, pour les vices estaindre,
Et pour avoir l'heritage des Cieux,
Craindre il convient l'Eternel, sans se faindre. ”

“ Je n'avoys aucun Dard qui peust estre agresseur
Pour en faire mourir & succomber les hommes
Au funebre tombeau, comme au temps ou nous sommes,
Dont ce divin Sauveur de creature humaine
(O peuple Berruyer) ne m'a dict inhumaine,
Alors que sa bonté et grace tant valut
De mourir en la croix, pour te donner salut,
Sa divine bonté jamais ne m'a tancee
Lors que de ses Esleus j'ay la fin avancee,
En faisant mourir d'eux le corps tant seulement,
Pour faire vivre l'Ame au Ciel durablement.
Il est vray que mon dard porte double poincture,
Scavoir douce et amere à mainte creature. ”

“ Ne trouvent de mon dard la poincture que doulce,
Cognoissans que par moy leur ame au Ciel se poulse.
Doncques, O peuple humain, à tort de moy te plainds
Quand je fay succomber hommes de vertu pleins,
Puis que par leur vertu qui à tous se descouvre,
Le tout puissant Recteur son Paradis leur ouvre.
Puis que tel as cognu celluy dont ton oeil pleure,
Que ne t'asseures tu que son Esprit demeure
En ce divin Sejour qui est promis à ceux
Qui aux sainctes vertus n'ont esté paresseux? ”

“ Qu'on eust veu de leurs pleurs un lac grand, comme Loire,
Toutefois pour monstrer leurs ennuys et douleurs,
Elles feirent de grands souspirs au lieu de pleurs,
Et d'un habit de dueil elles se sont parees,
Pour à la sepulture estre mieux preparees.
Le Peuple désolé en conduisant le corps
Mesloit aux pleurs les cris, faisant tristes accords,
D'autre costé la Mort espouventable et fiere
Fort se glorifioit de voir en une Biere
Le corps par elle occis, pource qu'il est charnel,
Car son pouvoir n'ha rien sur l'Esprit éternel. ”

“ Ce que pouvons par Zoroastre aprendre,
Et par ses dicts la dignité comprendre
De nostre Esprit rarement precieux
Que nous debvons tousjours lever aux Cieux,
Et ne jetter contre bas nostre veue,
A celle fin que nostre ame pourveue
Ne soit de vice et de corruption,
Souffrant le corps avoir pollution.
Les appetis duquel dominera
L'homme prudent, qui se gouvernera
Selon l'Esprit, sachant que ce debile
Corps, et vaisseau faict de Terre fragile,
Comme mortel, doibt tomber à l'envers,
Et sera faict nourriture des vers. ”

“ De l'oeil humain n'est veue en sa propre figure.
Les Estoilles aussi qui par le Ciel s'espandent,
Leur clairté naturelle à l'oeil humain ne rendent.
La splendeur de la Lune à noz yeux n'apparoist
Comme parmy les Cieux resplendissante elle est. ”

“ Ses pleurs change en vengence, et son dueil en grand ire
Et tous ces mots piquans à la Mort il va dire.
Je m'esbahis comment, o laid Monstre, inhumain,
Monstre horrible, & cruel, repeu de sang humain,
Tu es tant effrené, et plein de violence,
De tousjours faire effort à la grand excellence.
O Chimere insensee, enragee Atropos,
Pourquoy troubles tu tant des humains le repos,
Te monstrant la plus grand de toutes les meurtrieres
De nous priver souvent des choses singulieres? ”

“ Le Monarque.
Vostre raison est clairement notoire,
Car mes majeurs sont en bruict florissant,
Leur corps est mort en ce bas Territoire,
Mais leur renom n'est pas déperissant.
Donc à voz dicts veux estre obeissant,
Pour ambrasser la vertu et l'ensuivre,
Si le plaisir est tel du Toutpuissant,
Avec vertu je veux mourir et vivre.
Bon zele.
De tout ennuy mon cueur est à delivre
Quand je vous voy en ceste voulonté,
Mais gardez vous de Bacchus, qui enyvre
Les sens humains, tant il est deshonté. ”

“ A tout oeil clair voyant de la posterité,
Et mon cueur s'esjouist d'une telle esperance,
Ou peuples successeurs auront la cognoissance
Du grand merite deu à vostre auctorité.
Les Divins Oracles de Zoroastre, ancien Philosophe Grec.
Il fault qu'a ce ton sens diligemment pourvoye
De cognoistre & scavoir de ton ame la voye,
Et entendre le lieu duquel elle provient,
Aussi quelque action donner au corps convient. ”

“ Sainctes on voit, perfaictes, admirables,
Ses faicts haultains, grands, et incomparables.
Duquel avons formes intelligibles,
Pour concevoir ses secrets indicibles,
Et qui aussi noz pensees concoit,
Et le dedans de noz cueurs appercoit,
Et sans son sceu (Dieu nous le manifeste)
Ne tombe un seul cheveu de nostre teste.
Par les Recteurs remplis d'intelligence
Qui sont compris en la docte sentence
De Zoroastre, entendons les Esprits
Bons, immortels, et qui n'ont point apris
De varier, leur vertu éminente
En pureté est tousjours permanente. ”

“ Son noble esprit plus tormente et affolle.
Verité.
Allons vers luy, veritable parole
Aucunefois à l'homme est proffitable,
Verité suis qui tout homme console
Quand il requiert secours medicinable. ”

“ Os homini erectum est, quod clara ad sidera tollat,
Et quo conspiciat curvum cum lumine Celum.
Sic generosus homo, merito superare videtur
Quidquid Terra parit, morte id delebile, verum
Morte carens anima, ad celestia sidera migrat.
Demonas integros quos hec oracula dicunt,
Demonas esse reor, quorum ductricae caterva
Spiritus humanus divina arcana recludit
Ac penetrat, rebus preponens sacra prophanis. ”

“ Quo sit honore afficiendus illustrissimus ille Gallandius, testatur magno cum applausu universa Lutetie civitas, Petrum Ramum, Regium eloquentie ac Philosophie Professorem ad Coelum effert eadem urbs, in qua supremus Regis Senatus constitutus est. Carpentarius, gymnasiarcha Burgundianus, erudictissimus vetustissimum Collegium suum ab omni Barbarie vindicat, ac admirabili eloquentia illustrissimum reddit, Salligneus in Hebraica Lingua, Greca, Latináque perfectissimus, quid sibi aliud nisi apud posteros immortale decus pollicetur? ”

“ Mais seulement du regard furieux
De ceste Mort à tous espoventable.
O Peuple humain qui d'excessive table
Fais ton seul Dieu, pour bien remplir ta pance,
Et dont le cueur du Monde insatiable
Trop enyvré, rien que tout mal ne pense,
Voy que celluy qui bien et mal compense
Te damnera, si desir ne te mord
De demander pardon de ton offense
A Christ, qui faict revivre l'homme mort.
Fin de la Comedie du Monarque.
Deploration sur le trespas de feu monseigneur Jean Bouchetel, Seigneur de Sacy, Conseiller et Secretaire des commandemens du Roy. ”

“ En plus grand pris fault la science avoir.
Royaux Palais peuvent fin recevoir,
Mais vostre Esprit est d'une vigueur telle,
Que de la Mort l'audacieux pouvoir
N'abolira vostre grace immortelle.
A Monseigneur Godefroy, Conseiller du Roy, au Chastellet de Paris.
Sonnet.
Si quelque fois la grand maturité
Des Loix & Droicts, ou vostre estat s'applique
Pour l'entretien d'une grand Republique,
Donne repos à vostre auctorité,
Je vous supply par la benignité
Qui tant vous rend humain et pacifique,
De voir un peu mon oeuvre Poetique,
C'est Zoroastre ou gist divinité. ”

“ L'epitaphe dudict Seigneur par la Muse Thalie.
Celluy qui par sa plume et par son grand Scavoir
Feit service à deux Roys, dont la vie est mortelle,
Heureusement au Ciel le Roy des Roys va voir
Qui à tous ses esleus donne vie immortelle.
Desque Thalie eut mis à son Escrit la fin,
Erato meit ces vers dessus le Marbre fin.
L'epitaphe dudict Seigneur par la Muse Erato.
O Viateur, veux tu scavoir qui gist ici?
C'est le corps d'un qui eut tant de graces infuses,
C'est le bon Bouchetel, le Seigneur de Saci,
La fleur, le bruict, l'honeur des vertus et des Muses. ”

“ Du mont Pernasse ouyt les regrets & douleurs
Du Peuple Berruyer, qui fondoit tout en pleurs,
Et pource que ces Seurs avoyent tousjours prisé,
Ce noble Secretaire, et fort favorisé
A ses doctes Escrits, à sa plume doree,
Et à sa Poesie aux Gaules adoree,
Apres avoir ouy la desolation
Du Peuple regrettant telle perfection,
Elles laissent leur mont plaisant et delectable
Pour toutes assister au Tombeau lamentable
De ce corps deslié d'un Esprit precieux,
Qui desja place avoit au sainct repos des Cieux,
Qui est aux bons Espris le promis heritage. ”

“ Signifiant le nom de l'Eternel,
Car comme on voit estre ardente la flame
Qui promptement ce qu'elle attainct, enflame,
Le Verbe sainct, qui de tout est vainqueur,
Peut penetrer les hommes jusqu'au cueur,
Pour contempler les graces et biensfaicts
Que l'Eternel par son fils nous à faicts.
Certainement ceste Essence premiere,
Ce Pere, seul donateur de lumiere
(Dict Zoroastre) aux ames à enté
Certaine Marque, et certain seau planté,
C'est à scavoir image intelligible
Pour concevoir maint secret invisible,
Et pour scavoir les essences des choses,
Et les raisons en Deité encloses. ”

“ Et de scavoir encores plus exquis.
Que vous avez divinement acquis.
Sur ce je pry l'eternelle puissance
De voz desirs vous donner jouissance,
Puis qu'advenant vostre ordonné trespas
Preniez au Ciel cest immortel repas,
Qui est promis par l'Eternel à ceux
Qui aux vertus n'ont esté paresseux,
Ainsi que vous, plein de graces infuses
Le Mecenas des lettres et des Muses.
A mondict Seigneur le Thresorier.
Sonnet.
Tous les thresors du Monde ambicieux
(Tant soient ilz grands) on voit deperissables:
Mais les thresors à jamais perdurables,
Sont en l'esprit, qui ha source des Cieux. ”

“ Prince d'honeur: d'auctorité puissant,
Adjoustez foy à ceste vierge saincte,
C'est Verité, d'elle rien n'est yssant
Qui ne soit bon, de fraude elle n'est ceincte
Toute malice en son cueur est estaincte,
Gardez vous bien que pour ne consentir
A son conseil, ou gist vertu non faincte,
Vous ne veniez troz tard au repentir.
Le Monarque. ”

“ Qu'hommes tachez de soillure impudique,
N'auront les Cieux, ou perdurablement
Doibt vivre l'homme ayant esté pudique.
Veux tu laisser ce thresor magnifique
Des Cieux hautains, qui à ceux est promis
Dont le desir à chasteté s'applique
Dessoubs les piedz ayant tout vice mis?
Change conseil, sois en vertu remis
Suyvant les dicts de ton maistre Bon zele,
Qui a esté pour t'instruire commis
Pour aspirer à la vie eternelle.
Si à cela qu'ores je te revele
Tu es contraire et desobeissant,
Tu souffriras punition cruelle
Lors que ton corps sera deperissant.
Le Monarque. ”

“ Tu m'as ravy l'honeur du gracieux Scavoir
Duquel l'homme meschant ne veult notice avoir.
Tu m'as osté la fleur des neuf Seurs Pégasides,
Et le vray ennemy des folles Pierides.
Tu m'as privé du fruict lequel avoit produict
Bourges, belle Cité, digne d'immortel bruict,
Ainsi Moutons paissans en l'herbageuse Plaine
Point ne portent pour eux dessus leur Doz la laine,
Semblablement pour eux petis oiseaux paissans
Ne bastissent leur nid, mais pour hommes passans.
Ainsi pour eux aussi les Beufs que le Joug serre,
Ne vont roulans l'Ereau sur la fertile Terre. ”

“ Avecques son corps mis en ceste sepulture,
Mais O vous viateurs, soyez certains et seurs
Que son renon n'est pas subject à pourriture.
Melpomené apres ce quatrain composa,
Et dessus le Tombeau par ordre l'apposa.
L'epitaphe de mondict Seigneur Bouchetel par La Muse Melpomené.
Soubs un petit cercueil est la chair inhumee
D'un serviteur Royal, c'estoit Jean Bouchetel,
Mais de ses grands vertus ne meurt la Renommee
Qui à ses successeurs le rendent immortel. ”

“ Eximiúmque, ingens, tenebris delebile nullis,
Splendorémque patris summi, qui nos iubet huius
Excolere immensum, sanctum, ac venerabile Numen.
Omnipotens Rex ille hominum, qui condidit orbem,
Insevit nobis animam virtute potentem,
Eximia, illa etenim quanvis agitata feratur
Huc, illuc, vario affectu cum corpore mixto,
Incorrupta manet virgo, divináque servat
Munera naturae, quod sancto numine ductus
Inquit Aristoteles anima hec tam clara refulget,
Divina ut quadam & certa pietate nitescat. ”