Nicolas-Marc Desfontaines

“ Qu'il pretend sur sa honte establir vostre gloire,
Et par l'unique prix de son sang precieux
Qu'il vous veut acheter le partage des Cieux.
GENEST. Que d'un trompeur espoir vostre ame est possedée,
S'il n'a pour fondement que cette vaine idée!
Et qu'un bonheur est faux, quand par un triste effort
La honte le produit aussi bien que la mort.
Rangez-vous du party de ces hautes puissances
Qui donnent à nos voeux d'illustres recompences,
Qui se font adorer en cent climats divers,
Et rendent nos Cesars Maistres de l'Univers. ”

“ Car si tu pris mon coeur le Ciel ravit mon ame,
Mais je te quittay pour un Dieu.
J'eus pour luy de l'amour aussi bien que pour toy,
À tous deux j'ay gardé ma foy,
Et par une admirable & divine adventure
Je puis vous satisfaire, & vous mettre d'acords,
Le Ciel aura mon ame, & dans ma sepulture
Tu pourras posseder mon corps.
OLYMPIE. Ouy, c'est là cher Espoux qu'il faut que je te suive,
Aussi bien apres toy ne croy pas que je vive,
Ce moment que sans toy je conserve le jour,
Semble desja durer un siecle à mon amour.
Attens moy, je te suy, Ciel permets que je meure! ”

“ Mesme ces deux objets se ressemblent si fort
Qu'elle a trompé mes yeux à son premier abord.
Archelas.
Mais peut-estre Falante est-ce Eurimedon mesme.
Falante.
Non Sire: bien qu'entre eux le rapport soit extreme,
Elle m'a protesté n'avoir jamais cogneu
Ce Prince dont je l'ay long-temps entretenu,
Hermionne est son nom, son pays est la Thrace,
Et Mars asseurement est l'autheur de sa race;
Au lieu qu'Eurimedon ne sçait en quel sejour
Le Ciel ouvrit ses yeux à la clarté du jour:
Et quand cette raison tromperoit ma creance,
Je sçay bien que le sexe en faict la difference. ”

“ Je me connois, Cesar, je sçais ce que je suis.
DIOCLETIAN. Mais sçais-tu bien aussi, traistre, ce que je puis?
GENEST. Ouy, ton pouvoir n'est pas un effect que j'ignore,
Je sçay que l'on te craint, & que Rome t'adore,
Mais je sçay bien aussi ce qu'un Dieu me prescrit:
Tu peux tout sur mon corps, & rien sur mon esprit.
DIOCLETIAN. Nous allons esprouver cette haute constance.
GENEST. Tu peux dés à present en faire experience.
Commande à tes boureaux qu'ils m'accablent de fers.
DIOCLETIAN. Perfide, ils t'apprendront le respect que tu pers,
Si tu ne te resous à changer de langage. ”

“ OLYMPIE. Qui comme moy peut estre abuse Polidarque.
POLIDARQUE. On ne se trompe pas quand l'effect est si clair,
Mais vostre esprit se plait soy-mesme à s'aveugler,
Et croiroit témoigner un excez de foiblesse
S'il renonçoit si tost à l'erreur qui le blesse.
PHILOXENE. Le temps vous apprendra...
OLYMPIE. Qu'on se travaille en vain,
Si l'on croit que jamais je change de dessein.
PHILOXENE. Serez vous donc injuste, & si peu raisonnable
Que de nous preferer un Rival si coupable,
Un Amant qui vous quitte, & qui vous fait mourir?
Quoy donc quand il vous hait, devez vous le cherir! ”

“ Si la bonté du Roy s'accorde à nos desirs.
Eurimedon.
Desja ce doux espoir me comble de plaisir,
Mais je crains que l'effet de cette courtoisie
Ne donne à nostre Amant un peu de jalousie,
S'il apprend quelque jour le bon-heur où je suis:
Cependant que son coeur est parmy les ennuis,
Et dedans les langueurs d'une fascheuse absence
Faict d'un excez d'amour l'injuste penitence.
Pasithee.
Si jusque icy l'amour a mal traité nos voeux,
Le mesme quelque jour nous ravira tous deux,
Et par nostre union finissant nos supplices
Versera sur nos maux ses plus cheres delices. ”

“ Un object plus charmant le pourra satisfaire,
Et certes mon esprit ne sera point jaloux
Qu'amour blesse son ame avec des traits plus doux,
Pourveu que le Tyran qui va finir ses peines
Ne remette mon coeur en de nouvelles chaisnes,
Et que ce grand bon-heur ne soit pas achepté
Au prix de mon honneur ou de ma liberté.
LE CID. Madame jugez mieux d'un objet qui vous aime,
Pour mieux vous obliger, je me nuis à moy-mesme,
Et c'est pour vous donner un absolu pouvoir,
Que mon affection cede aux loix du devoir. ”

“ Quelques-uns de pitié sentent leur ame atteinte,
Les autres sont touchez ou d'horreur, ou de crainte,
Et parmi tant de gens interdits à ce point,
Le coupable est le seul qui ne s'en emeut point.
Voyant de ce costé nos ordonnances vaines,
Nous exposons l'ingrat à de nouvelles peines,
Et pour le tourmenter avec plus de rigueur
Nous cherchons par ses yeux le chemin de son coeur.
Mais inutilement nous tentons cette voye,
Comme luy Pamphilie en tressaille de joye,
Et voyant approcher les boureaux sans horreur
Tasche par ses discours d'exciter leur fureur. ”

“ VIRGINIE. En cet estat? Hé de grace, Madame,
Moderez ces transports qui bourellent vostre ame,
Remettez vous un peu, prenez ces vestemens.
OLYMPIE. Ah cachez à mes yeux ces pompeux ornemens:
En un si pitoyable & si triste Hymenée,
Ils ont par trop d'esclat pour une infortunée;
Ensevelissez moy dans un habit de deuil,
Et pour lit nuptial qu'on m'apreste un cercueil:
Ostez moy ces tableaux, abatez ces balustres,
Ce faste ne sied bien qu'aux personnes illustres,
Que le ciel plus benin void d'un regard plus doux,
Et non pas aux objets qu'il regarde en couroux. ”

“ Et qu'il fasse le coup qu'auroit faict mon courage,
Le Ciel n'est à mes voeux contraire qu'à demy
Si je meurs de la main d'un si cher ennemy,
Mon coeur à son amour autrefois si propice
Au lieu d'estre l'Autel sera le sçacrifice,
Et le coup que son bras luy va faire sentir
Fera d'un Idolatre un amoureux martyr:
Mes yeux pour ce cruel ont trop versé de larmes,
Il est temps que mon sang soit tiré par ses armes,
Et que par ses boüillons mes desirs innocens
Mesme au point de la mort luy donnent de l'encens.
Mais aveugle fureur où portes-tu mon ame?
Pourquoy faut-il mon sang pour esteindre ma flame? ”

“ Madame croyez-moy, je verray sans envie
Qu'une autre ait le bon-heur dont vous flattez ma vie
Et que dans le sejour d'un superbe Palais
Elle reçoive un bien qui ne me pleut jamais,
Pour moy sans regarder plus haut que ma fortune,
Je trouve dans le trône une pompe importune,
Et donnant à mon coeur des mouvemens plus sains,
J'attache mes desirs à de moindres desseins:
C'est par l'égalité qu'un beau couple s'assemble,
Ceux qui sont inégaux ne sont pas bien ensemble,
Et l'Amour fait entr'eux de si foibles accords,
Que souvent on les void se rompre sans efforts. ”

“ Et je suis asseuré sans que je le devine,
Que si ce rustre avoit Olympie en ses bras,
Il ne seroit pas homme à quitter tant d'appas.
ALEXIS. Il ne faut point juger de l'arbre par l'escorce.
ARGAMOR. Comme un autre Joseph on te prendroit à force,
Olympie... à ce mot tu changes de couleur,
C'est un signe d'amour.
ALEXIS. Mais plutost de douleur.
LICAS. On n'en est pas exempt quand il est vray qu'on aime,
Mais.
ARGAMOR. Brisons-là, Licas, je la vois elle-mesme,
Allons, retirons nous.
SCENE VI. ALEXIS, OLYMPIE, PHILOXENE. ALEXIS à part. ”

“ Il ne m'empesche pas que j'adore vos yeux,
Mais il veut pour le sien que je quitte nos Dieux,
Et que suivant l'abus de son erreur extréme,
Contre mes sentimens je le suive au baptéme.
Mais plutot que je change ou d'amour, ou de loy,
Plutost que je viole ou mes voeux, ou ma foy,
Que ces puissantes mains qui gouvernent la foudre,
D'un rouge traict de feu me reduisent en poudre.
Puissé-je estre des Dieux, & des hommes l'horreur,
De tous les elemens esprouver la fureur,
Et si jusqu'à ce point mon jugement s'oublie,
Que je sois à jamais hay de Pamphilie. ”

“ SCENE PREMIERE. EURIMEDON, PASITHEE, ALERINE.
Eurimedon.
Madame, excusez-moy si voyant tant de grace
J'ayme vos ennemis & cheris leur audace,
Puisque les mesmes traits qui vous ont fait trahir
Ne me permettent pas de les pouvoir haïr:
Cette rare douceur, ces apas, & ces charmes,
Contre un foible mortel sont de trop fortes armes,
On ne peut eviter l'atteinte de leurs coups,
Le coeur qui les reçoit mesme les trouve doux:
Et quoy que la raison à nos desirs oppose
Vous voir & vous aymer n'est qu'une mesme chose. ”

“ PHILOXENE. Ah Seigneur! Excusez nostre audace,
Ou bien si nostre offence est indigne de grace,
Adjoûtez, grand Monarque, à ce chef odieux
Celuy d'un temeraire & d'un ambitieux:
Mais qui dans ses desirs n'a jamais fait paroistre
Qu'il eust aucun dessein sur le rang de son maistre.
POLIDARQUE. Ouy commandez, Seigneur, qu'on nous prive du jour,
Et donnez nous la mort pour un crime d'amour,
Aussi bien Alexis possedant Olympie
Avecque nostre espoir, faut-il perdre la vie. ”

“ Ses seules volontez disposent de mon choix.
SPHERANTE s'en allant.
J'obeïray, Madame, à ces divines loix
SCENE QUATRIESME. L'INFANTE seule.
Que ferons nous, mon coeur, ce Prince est bien aymable,
Rodrigue l'est aussi, mais il est moins traictable:
Et s'il est à mes yeux adorable & charmant,
Il me traitte en vainqueur, & non pas en Amant:
Spherante est plus courtois, & d'humeur moins hautaine,
Laissons cherir au Cid son ingratte Chimene,
Et puisque l'amour seul est le prix de l'amour,
Accordons ce salaire à qui nous fait la cour. ”

“ GENEST. On ne change jamais quand on a du courage.
DIOCLETIAN. Si faut-il toutesfois ou changer ou perir.
GENEST. He! bien me voila prest, Tyran, allons mourir.
Apportez, apportez ces bienheureuses chaines,
Instrumens de ma gloire ainsi que de mes peines,
Luy rejettant son Escharpe.
Et reprends desormais ces liens odieux,
Qui me rendoient naguere esclave de tes Dieux.
Que ceux qui n'ont pas veu les divines merveilles,
Qui viennent de ravir mes yeux & mes oreilles,
De tes vaines grandeurs se rendent partizans,
Et d'un oeil envieux regardent tes presens. ”

“ Feroit le trosne de ma gloire,
Sur les mornes apprets de mon triste tombeau.
Mais au poinct où mon sort est mis
En vain ce doux penser me flatte,
Les Dieux pour m'obliger sont trop mes ennemis
Et la terre m'est trop ingratte:
Pour m'oster de cette prison
Usons du fer, ou du poison.
Et sortons de nos maux, en sortant de la vie ”

“ Et j'adore un ingrat! mais bons Dieux le voicy
Taschons encore un coup de fleschir son courage.
LE CID. Ouy Chymene, je cede aux coups de cet orage,
Contre cette rigueur il n'est point de vertu.
CHERIFFE. Hé bien perfide, en fin à quoy te resous-tu?
LE CID. A mourir, puis qu'apres un mespris si funeste
Le trespas seulement est l'espoir qui me reste.
CHERIFFE. Quoy, le traict de la mort a pour toy des appas,
Et celuy de l'amour ne te touchera pas.
Ah! grand Cid.
LE CID. Laissez-moy rigoureuse Chymene,
Je vay finir ma vie achevez vostre hayne,
Ce nom ne sied pas bien avecques vos mespris. ”

“ Ses divines beautez à qui tu faits injure
Te doivent rendre horrible à toute la Nature,
Et te faire sentir les traits plus furieux
Que puisse décocher la colere des Cieux,
Mais en obeissant à leur decret auguste,
Encor que ton depart fust cruel, il est juste;
Et je souffre pourtant un supplice eternel
Par ce mesme depart, si juste & si cruel.
N'importe, c'est du ciel la fatale ordonnance,
Ne murmurons jamais contre sa providence,
Et voyons d'un mesme oeil & d'un esprit égal
Tout ce qu'il nous prepare, ou de bien ou de mal. ”

“ Qu'il est seul souverain, seul maistre du tonnerre,
Des cieux, des elemens, des Anges, des mortels,
Et digne seul enfin, & d'encens, & d'autels.
DIOCLETIAN. Il a perdu le sens, & son ame troublée,
Rend comme son esprit sa langue dereglée.
GENEST. Non, non, mon jugement ne fut jamais plus sain
Qu'alors qu'il a chocqué tes Dieux, & ton dessein,
Et si je l'ay perdu, c'est lors que mes paroles
D'un accent criminel ont flatté tes idoles.
DIOCLETIAN. Ha! ne m'irrite pas, insolent, c'est assez. ”

“ Aussi bien que vos pleurs espargnez vostre sang,
Et faictes voir un coeur esgal à vostre rang,
Le malheur est souvent la source de la gloire,
L'Astre qui faict le jour sort d'une couche noire,
Et le pompeux esclat de ce divin flambeau
Paroit apres l'orage & plus clair, & plus beau;
Et puis je ne voy pas le sujet de vos craintes,
Ny qu'elle occasion authorise vos plaintes,
Car encor que ce lieu ne soit pas un Palais
Digne de recevoir l'honneur de vos attraits,
Puisque pour vous ravir on attaque cette Isle,
C'est moins une prison que non pas un Azile.
Pasithee. ”

“ Le repos à mon coeur, l'espoir à mon amour,
La lumiere à mes yeux, & le lustre à la Cour.
SCENE II. HONORIUS, PHILOXENE, POLIDARQUE. HONORIUS, surprenant Olympie.
Mais vous mesme suivez une si juste envie,
Redonnez nous la joye, adorable Olympie,
Vos voeux à nos desirs, l'espoir à nostre amour,
La lumiere à nos yeux, & le lustre à ma Cour.
OLYMPIE. Que dites vous Seigneur, & quelle est vostre attente,
La joye est un effet d'une ame plus contente,
Et vous n'ignorez pas qu'un Espoux rigoureux
Emporte avec mon coeur, mon espoir & mes voeux. ”

“ Il est tousjours Rodrigue, elle tousjours Chymene,
Et je voy quoy qu'amour m'oblige d'esperer,
Que la mort seulement les pourra separer.
LE ROY. Vous ne voulés donc pas m'estre plus favorable?
Un Monarque à vos yeux n'est pas assés aimable!
Ma flâme est inutile, & mes voeux superflus!
Bien, Madame, mes soins ne vous ennuiront plus!
Mais puisque d'autre sorte on ne vous peut atteindre
Pour vous persuader, je sçauray vous contraindre,
Ou vous aurés pour moy des sentimens plus doux.
CHYMENE. Sire, puis que ma veuë esmeut vostre courroux,
Souffrés que je vous laisse, & que je me retire. ”

“ Pour des illusions tu quittes Pamphilie?
Quand tu pers tout respect? quand tu changes de loy?
Quand tu trahis tes Dieux, & ton Prince, & ta foy?
GENEST. Ha! que la trahison est innocente & belle!
Et la fidelité blamable & criminelle,
Quand leur effect regarde un Tyran, & des Dieux,
Qui n'ont rien que d'horrible & de pernicieux,
Qu'il est doux de sortir d'un joug si detestable,
Pour entrer soubs les loix d'un Monarque adorable
Qui tient dedans les Cieux son Palais & sa Cour ”

“ ALEXIS. Amis, je suis assez redevable à vos soins,
Mon amour desormais ne veut plus de tesmoins,
Et dans les deux transports dont mon ame est saisie
Elle n'a plus besoin de vostre courtoisie.
Adieu, laissez moy seul, afin qu'en liberté
Je songe aux beaux liens où je suis arresté;
Vous sçavez qu'à cette heure à mes voeux opportune,
Le grand nombre deplait, & la suitte importune,
Un amant est timide, on contraint son ardeur,
Et je sçay qu'Olympie a beaucoup de pudeur. ”