Nicolas-Marc Desfontaines

“ SCENE PREMIERE. EURIMEDON, PASITHEE, ALERINE.
Eurimedon.
Madame, excusez-moy si voyant tant de grace
J'ayme vos ennemis & cheris leur audace,
Puisque les mesmes traits qui vous ont fait trahir
Ne me permettent pas de les pouvoir haïr:
Cette rare douceur, ces apas, & ces charmes,
Contre un foible mortel sont de trop fortes armes,
On ne peut eviter l'atteinte de leurs coups,
Le coeur qui les reçoit mesme les trouve doux:
Et quoy que la raison à nos desirs oppose
Vous voir & vous aymer n'est qu'une mesme chose. ”

“ Eurimedon.
Permettez moy Madame.
Pasithee.
Achevez.
Eurimedon.
D'esperer.
Pasithee.
Esperez.
Eurimedon.
Ah Madame! Il vous faut adorer.
Car pourveu que le coeur à la bouche responde
Je me tiens desormais le plus heureux du monde;
Mais à ce grand bon-heur Tygrane espere aussi.
Pasithee.
N'importe (Eurimedon) laissez moy ce soucy,
Si vostre amour est grand comme vostre courage
Je sçauray bien aussi vous donner l'advantage.
Alerine.
Madame parlez bas, j'entends venir quelqu'un.
Pasithee.
Sans doute (Eurimedon) c'est ce Prince importun.
SCENE SECONDE. EURIMEDON, PASITHEE, TYGRANE.
Tygrane. ”

“ Aussi bien que vos pleurs espargnez vostre sang,
Et faictes voir un coeur esgal à vostre rang,
Le malheur est souvent la source de la gloire,
L'Astre qui faict le jour sort d'une couche noire,
Et le pompeux esclat de ce divin flambeau
Paroit apres l'orage & plus clair, & plus beau;
Et puis je ne voy pas le sujet de vos craintes,
Ny qu'elle occasion authorise vos plaintes,
Car encor que ce lieu ne soit pas un Palais
Digne de recevoir l'honneur de vos attraits,
Puisque pour vous ravir on attaque cette Isle,
C'est moins une prison que non pas un Azile.
Pasithee. ”

“ Feroit le trosne de ma gloire,
Sur les mornes apprets de mon triste tombeau.
Mais au poinct où mon sort est mis
En vain ce doux penser me flatte,
Les Dieux pour m'obliger sont trop mes ennemis
Et la terre m'est trop ingratte:
Pour m'oster de cette prison
Usons du fer, ou du poison.
Et sortons de nos maux, en sortant de la vie ”

“ Pasithee.
Tygrane, vous jugez de mon intention
Selon la belle humeur de vostre passion.
Tygrane.
Mon sentiment plustost parle selon la gloire
Que vous pourra donner cette belle victoire.
Pasithee.
Quelle?
Tygrane.
D'Eurimedon, qui vous donne son coeur.
Pasithee.
Veid-on jamais vaincu triompher du vainqueur?
Eurimedon.
Ou vainqueur ou vaincu souffrez que je sois vostre,
À qui vit sans espoir qu'importe l'un ou l'autre.
Tygrane.
En amour toutesfois l'esperance est l'aymant. ”

“ Pour maintenir les droits d'une flame innocente,
Sous cette passion mon esprit abbatu
Se mocque des advis que donne la vertu,
Et croiroit meriter d'estre au rang des infames,
Si je suivois les moeurs du vulgaire des femmes;
Courage Celiane, acheve ton dessein
C'est folie en amour que d'avoir l'esprit sain,
Suy tes nobles transports tu seras satisfaite,
Et tu triompheras mesme par ta deffaite:
Car Tygrane privant Celiane du jour
Fera de son tombeau celuy de son amour;
Mais je le voy venir, songeons à nous deffendre.
SCENE SIXIESME. TYGRANE, CELIANE.
Tygrane. ”

“ Les Dieux visiblement se declarent pour nous,
Et s'ils ont tant laissé la victoire douteuse,
La perte d'Araxés en sera plus fameuse.
Archelas.
Quel tesmoignage as-tu de cet Evenement?
Falante.
Un prodige (grand Roy) digne d'estonnement:
J'ay veu (Sire) j'ay veu dans le champ de Bellone
Une auguste Deesse en habit d'Amazone,
Aux plus fiers ennemis arracher des Lauriers,
Et donner l'espouvante aux plus braves guerriers;
À chaque mouvement son courage se montre,
Tout faict jour à ses coups, tout fuit à sa rencontre ”

“ J'ay promis d'obeir, quoy que pour m'y resoudre
Il faille auparavant que je sente la foudre.
Pasithee.
Mon Prince relevez vostre esprit abbatu,
Contre elle vos lauriers ont assez de vertu,
La volonté du Roy n'est pas irrevocable,
Je rends (quand il me plaist) son humeur plus traitable,
Et si quelque enuieux vous a desobligé
Vous aurez le plaisir d'estre bien-tost vangé.
Eurimedon.
Ah Madame! si j'oze esperer cette grace
Ne blasmerez-vous pas l'excez de mon audace?
Pasithee.
Mais si je vous laissois en cette extremité
N'accuseriez vous pas mon coeur de lascheté?
Eurimedon. ”

“ S'est montré favorable à vostre heureux retour,
Son perfide element a respecté vos charmes,
Et vostre ravisseur a fleschi sous mes armes,
Qui n'ont pû consentir qu'une Divinité
Servist de recompense à l'infidelité.
Mais que cette bonté qui vous rend adorable
Espargne à mon sujet un Prince miserable.
Puis qu'Amour est l'autheur du mal qu'il a comis,
Et que vos yeux (Madame) ont fait vos ennemis:
Pardonnez à l'offence en faveur des complices,
La vie est quelquesfois le plus grand des supplices;
Car la mort finissant les jours d'un Criminel
Finit un chastiment qu'ils rendoient eternel.
Pasithee. ”

“ Qu'il sçaura que je n'ay que le nom d'Hermionne,
Croyez-vous eviter la noire impression
Qu'il doit avoir alors de nostre affection?
Non, non, nostre retraitte est un coup qu'il faut faire,
Et vostre enlevement est un mal necessaire.
Quand vous ne serez plus en ses barbares mains
Le temps adoucira ses projets inhumains,
Mais si nous ne quittons ce funeste rivage
Il nous faut disposer aux effets de sa rage.
Pasithee.
Hé bien, puis qu'il le faut, j'y consens: mais bons Dieux! ”

“ Que Tygrane a bien faict! que sa valeur est rare!
Qu'il a bien merité l'honneur qu'on luy prepare!
Qu'il a diligemment suivy le ravisseur
De l'objet dont on veut le rendre possesseur!
Ah le lasche! il ne mit jamais la main aux armes,
Et je tirois du sang quand il versoit des larmes,
Toutesfois son bon-heur le va mettre en un rang
Qui me fera verser & des pleurs & du sang.
Celiane.
Le sens de ce discours marque ma destinée,
Celiane empeschons ce funeste hymenée,
Donnons à ce Guerrier de nouveaux mouvemens,
Et joignons nostre droict à ses ressentimens.
Eurimedon.
Le Ciel
Celiane l'abordant. ”

“ L'autre d'un beau rocher faict le trosne d'Amour,
Et comme ils sont tous d'eux de visibles miracles,
L'un reçoit tous nos voeux, l'autre rend des Oracles;
En fin je vois icy comme dans un tableau
Tout ce que la nature a de rare & de beau.
Mais que j'ay de regrets parmy ces belles choses!
Que je voy de soucis au milieu de ces roses!
Et que je suis confuse en ce dernier effort
Où peut-estre ma nef fera naufrage au port.
Pasithee.
Vous souspirez (Madame) & vostre teint se change,
D'où vous vient si soudain cette palleur estrange?
Dieux! vous trouvez-vous mal?
Eurimedon. ”

“ Oubliez mon erreur, oubliez mon offence,
Et voyez mon amour après mon inconstance;
Comme l'Astre du jour alors qu'il sort de l'eau,
Mon feu sera plus net & paroistra plus beau,
Pourveu qu'en ma faveur quelque pitié vous touche. ”

“ S'il ne vous y fait pas remarquer vostre grace.
Eurimedon.
Il a pour ses attraits trop de fidelité.
Pasithee.
Et vous pour me flatter trop de civilité:
Quoy donc après la paix, vous me donnez la guerre?
Vous me sauvez en mer, & m'attaquez en terre?
Desirez-vous encore un triomphe nouveau?
Eurimedon.
Non je veux ma deffaite en un combat si beau.
Pasithee.
Vous ne prendrez donc pas le soin de vous defendre.
Tygrane.
On se defend en vain quand le coeur se va rendre.
Pasithee.
Il est vray, mais je tiens un triomphe à mespris
Si la difficulté n'en augmente le prix.
Tygrane. ”

“ Eurimedon.
Puisque vous partagez cette louable envie,
Allons Prince adorable où l'honneur nous convie.
SCENE SIXIESME. PASITHEE, ALERINE dans la prison.
Alerine.
Ah Madame! ces pleurs, & ce coeur abatu
Sont indignes de vous & de vostre vertu,
Essuyez, essuyez ces inutiles larmes,
Et n'ayez pas recours à de si foibles armes;
La tristesse sied mal sur un front genereux,
Il doit paroistre esgal bien qu'il soit malheureux,
Et mesme tesmoigner au plus fort de l'orage,
Qu'il peut changer de sort, mais non pas de courage.
Pasithee. ”

“ Toutesfois si je suis indigne de pitié
sçacrifiez Tygrane à vostre inimitié.
Il luy presente son espée.
Tenez voila de quoy contenter vostre enuie,
Vangez-vous Celiane, arrachez-moy la vie,
Et par mon sang coupable à vos pieds respandu
Payez-vous de celuy que vous avez perdu.
Celiane.
La mort pour un ingrat seroit trop favorable
Et le coup de ma main un peu trop honnorable
Tes regrets feront mieux cet office que moy.
Eurimedon.
Madame revocquez cette severe Loy,
Il n'est point de pechez qu'un repentir n'efface. ”

“ Pasithee.
Vous estes trop modeste en vostre ambition,
Et si mon ame encor doute en vostre origine,
C'est qu'au lieu d'estre humaine, elle la croit divine.
Eurimedon.
Ah ne me flattez pas, un si mal-heureux sort
Avec le rang des Dieux a trop peu de rapport. ”

“ Eurimedon.
Sire, Le Dieu des eaux les a dans ses entrailles,
Un perfide comme eux a faict leurs funerailles,
Et comme partizan de ce traistre dessein
Il en cache l'autheur dans son humide sein:
En fin de ces brigands la deffaite est entiere,
La mer fut leur refuge, elle est leur cimetiere,
Et l'onde a tellement prévenu mes efforts
Qu'ils ont esté plustost ensevelis que morts. ”

“ Eurimedon.
Grand Roy j'atteste icy le celeste flambeau,
Que j'ayme tant l'honneur de vostre bien-vueillance
Que je meurs du desir d'estre en vostre alliance,
C'est un bien que mon coeur souhaitte plus que vous,
Et je ne vivrois pas sans un espoir si doux;
Mais la fureur encor possede trop mon ame
Pour faire si-tost place à l'ardeur de ma flame,
Il faut donner à Mars le temps de respirer
Auparavant qu'Amour le fasse retirer.
Archelas.
Ma Reyne je le veux pourveu que mon attente
Conserve en vostre coeur une flame constante. ”

“ Pour contenter Tygrane on m'arrache le Coeur;
En fin puis qu'à mes voeux Pasithée est ravie
N'est-ce pas lascheté d'aymer encor ma vie,
Me conseilleriez-vous de respirer le jour
Apres avoir perdu ce bel astre d'amour;
Non sans doute, mourons avant qu'on la possede,
Et que ma mort plûtost que mon amour la cede.
Celiane.
Pour la mesme raison vous devez tout souffrir
Plustost que de songer au dessein de mourir,
Quand le combat est grand la victoire est plus belle
Vivez pour Pasithée, & combattez pour elle.
Eurimedon. ”

“ Plustost que d'offencer vostre illustre memoire,
Et ne permettez pas que les traicts du malheur
Demeurent triomphans d'une insigne valeur,
Que le sort contre vous arme toute sa rage,
Un grand coeur est tousjours au dessus de l'orage,
Et malgré ses fureurs un genereux effort
À travers les écueils se fait passage au port.
Eurimedon.
Lors que mon desespoir vous parle de la sorte,
Ce n'est pas (Chevalier) la fureur qui m'emporte
Mais plustost de la mort un mespris genereux
M'oblige d'abreger un destin malheureux ”

“ La Renommée qui a remply l'Univers de cette verité, a donné de la jalousie aux plus belles de vostre sexe, & de l'admiration aux plus parfaites, mais vous donnerez de l'estonnement à nostre Eurimedon & à sa Pasithée, quand vous leur ferez cognoistre que la beauté, & la gentillesse des Dames de France emportent le prix sur celles de Grece, & de toutes les nations de la Terre ”

“ Pasithee.
Puis qu'en tous ces debats j'ay beaucoup d'interest
Nous en pourrons donner une autre fois l'arrest,
Cependant je veux bien que l'un & l'autre espere
Pour moy je m'en vay voir que fait le Roy mon pere.
SCENE TROISIESME TYGRANE.
Dieux que viens-je d'ouyr: mais helas qu'ay-je veu?
Il se peut faire aussi que je me sois deçeu
Ou qu'un enchantement qui me trouble l'ouye
Par de mesmes effets ayt ma veue esblouye:
Sans doute tout cecy n'est qu'une illusion
Qui remplit mon esprit de sa confusion:
Mais Prince infortuné que ton mal est estréme!
As-tu quelque advantage à te tromper toy-mesme? ”

“ Et comme Pasithée aydoit à son dessein
Je le surpris un jour qu'il luy baisoit le sein;
Mon ame à cet object de colere enflammée
Voulut perdre d'un coup & l'amant, & l'aymée,
Mais
Eurimedon.
Vous avez puny trop rigoureusement
L'amour d'une Princesse, & les voeux d'un Amant
Qui n'estoit pas peut-estre indigne de sa flame.
Archelas.
En cette occasion je confesse (Madame)
Que ce jeune estranger avoit des qualitez,
Capables de fleschir les plus rares beautez,
Et mesme il nous avoit rendu quelque service.
Eurimedon. ”

“ Pasithee.
L'amour (Eurimedon) faict de plus grands miracles,
Pour sçavoir vos ayeux consultez les Oracles,
Et si je manque alors à ce que j'ay promis,
Je consens que les Dieux soient tous mes ennemis.
Eurimedon.
Pour arres de ce bien dont mon ame est ravie,
Ma Reyne permettez que je laisse ma vie
Eurimedon se panche pour luy baiser le sein
Sur ce superbe Autel où mon coeur enflammé
N'attend que le bon-heur de se voir consommé.
SCENE DEUXIESME. EURIMEDON, PASITHEE, ARCHELAS, FALANTE.
Archelas mettant la main à l'espée. ”

“ Ouy: parce que la mort a pour moy des appas,
Les Dieux pour m'affliger ne me l'accordent pas.
Vien doncque lasche vainqueur, vien perfide Tygrane
Au lieu d'Eurimedon achever Celiane;
Ta cruelle pitié prolonge ma langueur,
Et tu m'obligerois d'avoir plus de rigueur:
Mais je t'appelle en vain, tu n'entens pas ma plainte,
Vivons, mon coeur le veut, & je m'y vois contrainte,
Attendant que le Ciel plus esmeu de pitié
Lance le dernier traict de son inimitié;
J'iray dans le sejour de quelque solitude
Chercher allegement à mon inquietude.
ACTE III.
SCENE PREMIERE. EURIMEDON, PASITHEE.
Eurimedon. ”

“ Tu rougis infidele, & tu croyois peut-estre
Que l'on devoit icy recompenser un traistre:
Non, non, le Ciel est juste, & les Dieux irritez,
Punissent tost ou tard les infidelitez,
Ne demande doncque pas un salaire Prophane:
Mais recognois icy ton crime, & Celiane.
Tygrane.
Je recognois (Madame) & mon crime & vos yeux
Ils sont en mesme temps mes Juges, & mes Dieux ”