Isaac de Benserade

“ Pour Hector, & Troïle animez vos coleres,
Car vous ne m’estes rien, si vous n’estes leurs freres.
Deiphobe.
Nous ferons voir, Madame, à vostre majesté
Que nous tenons beaucoup de ce qu’ils ont esté.
Pâris.
Ouy, nous luy ferons voir mourant en braves hommes
Ce qu’Hector nous estoit, & ce que nous luy sommes.
Hecube.
Dans ce noble dessein vous ne pouvez perir,
Et le jour est venu qu’Achille peut mourir,
Le perfide qu’il est, ce detestable Achille
Demande Polixene en me rendant Troïle,
Il pense qu’il m’oblige, & croit le ranimer,
Nous faisant obtenir le temps de l’inhumer. ”

“ Ne plains que son malheur, souffre son inconstance :
Il n’est point de malheur qui soit égal au mien,
Je crains plus toutefois les presages du sien,
Aux sacrez intestins des victimes plus pures
Je voy d’un accident les sinistres augures,
Ciel destourne ce mal, j’ayme mieux au surplus
Voir Achille inconstant que de ne le voir plus,
Je luy témoigneray que ma flame est extrême,
Et je me veux haïr pour montrer que je l’aime,
S’il faut souffrir sa mort, son change ou mon trépas,
Qu’il vive, que je meure, & qu’il ne m’ayme pas. ”

“ Tous les yeux sont trompez, & ceux d’Ajax außi ;
Que fera mon esprit pour le bien de la Grece ?
S’il ne trompe une mere, & mesme une Deesse ?
Pour estre mieux Ulisse il faut ne l’estre point,
À mon déguisement l’artifice se joint,
J’étalle ce qui rend les filles mieux parees,
Et parmy tout cela quelques armes dorees,
La curiosité fait que je les cognois.
L’une orne ses cheveux, l’autre pare ses doigts,
L’une prend des habits qui relevent ses charmes,
L’autre prend des joyaux, Achille prend des armes. ”

“ Troye en la mort d’Hector commença de perir,
Je ne l’ay pas tué, mais je l’ay fait mourir ;
Enfin par le secours de mon sage artifice
Tout ce qu’a fait Achille est ce qu’a fait Ulysse.
À ses armes (Seigneurs) puis-je pretendre à tort ? ”

“ Je sçay bien, que par moy Troye a souvent gemy,
Mais je n’ay pas tousjours esté vostre ennemy :
Vos chefs, & vos soldats mesme vantent ma gloire,
Je n’ay point de leur sang fait rougir ma victoire,
Je croy que le bien-fait a l’offence esgalé,
J’ay fait mourir Hector, mais vous l’avez bruslé.
Souffrez que je me plaigne, & vous nomme cruelle,
« Sous le pied qui l’escrase un ver est bien rebelle. » ”

“ Sommes-nous les vaincus, ou les victorieux ?
Comment va le combat ?
Pâris.
Comment va le combat ? Tout va bien grace aux Dieux,
L’armee est en deroutte, elle a pris l’espouvante,
La bataille nous est glorieuse, & sanglante. ”

“ Je ne veux point pourtant tromper vostre esperance,
Ny faire qu’un refus me serve de vengeance,
Nous procurant la paix sous ces conditions,
Que ma fille responde à vos affections.
Achille.
Ha ce doux mot ranime un cœur reduit en cendre !
Vous me donnez la paix, & je vous la veux rendre.
Achille qui jouist d’un bon-heur sans esgal,
Vous fera plus de bien qu’il ne vous fit de mal,
Et si de vostre sang il rougit plus qu’un autre,
Il vous offre le sien en eschange du vostre,
J’acheveray pour vous ce qu’Hector projettoit.
Hecube.
Helas ! soyez nous donc ce qu’Hector nous estoit. ”

“ Mais qu’Ulisse n’ait rien puis qu’il est sans vertu,
Il a bien dérobé, mais j’ay bien combattu.
Ha certes sa folie est digne de nos larmes,
Il demande sa perte en demandant ces armes,
L’éclat de cet armet de qui l’œil est touché,
Le pourroit descouvrir quand il se tient caché :
Ses lueurs trahiroient ses ruses, & sa gloire,
La nuit sa confidente en paroistroit moins noire ”

“ C’est Hector, c’est Troïle, Hecube, & Polixene,
Je crains la mort des uns, & des autres la haine,
Vous ostez à la mere un nom qui luy fut doux,
Et vous aymez la Sœur qui ne l’est plus par vous,
Vous leur ajoustez foy, n’est-ce pas un presage
Du peril evident où le sort vous engage ?
Achille.
Achille concevroit une sotte terreur ?
« Ha qui fait tout trembler ne doit pas avoir peur ! »
Il faut, quoy qu’Ilion contre luy s’évertuë,
Que pour le voir mourir Polixene le tuë,
Si tu pleures sa vie en de si belles mains,
Il te dira mourant, je te hay, tu me plains ”

“ Je sçay l’humeur d’Ulisse, & voy qu’il apprehende
D’obtenir sur le champ les armes qu’il demande :
Quand pour luy plaire Ajax s’en voudroit départir,
Il feroit l’insensé pour ne les pas vestir,
Comme autrefois charmé de sa natalle terre
Une feinte fureur l’exempta de la guerre,
Quand son esprit touché d’une ordinaire peur
Fuioit ce qu’il recherche avecque tant d’ardeur :
Il sera preferable à tant d’autres personnes,
Et qui n’en voulut point en aura de si bonnes ? ”

“ Polixene a forcé le bouclier de la Grece :
Mais qu’au lieu de le rendre il puisse estre accepté,
Et que ce pauvre cœur n’en soit point rebuté,
Qu’un hymen des souspirs fasse naistre la joye,
Et pour un commun bien sauvez Achille, & Troye.
Priam.
« Celui certes n’est pas malheureux à demy
Qui n’attend des bien-faicts que de son ennemy : »
Un mortel craint des Dieux, aymé de la victoire
Se laisse donc surprendre au milieu de sa gloire ?
Et vostre grand courage est donc réduit au point
D’esperer en ma grace, ou de n’esperer point ?
Quoy ma fille aymeroit nos plus grands adversaires ? ”

“ Il me veut quelque bien, j’en fais außi de mesme.
Achille.
Vous m’aymez ?
Polixene.
Vous m’aymez ? Il est vray, je vous le dis encor,
Comme je puis aymer l’homicide d’Hector.
Achille.
Ha mal-heur de mes jours ! Mais finissez ma peine.
Polixene.
Mais vous estes Achille, & je suis Polixene,
Vostre cœur ayme-t’il ceux que vostre bras hait,
Contre qui tous les jours vous suez sous l’armet ?
Et comment voulez-vous que de bon œil je voye
L’homicide d’Hector, & l’ennemy de Troye ?
Ha triste souvenir de mes derniers mal-heurs !
Las ! esteignez vos feux, laissez couler mes pleurs. ”

“ Helas vous fay-je tort de dire, je vous ayme ?
Un ennemy mourant offence-t’il beaucoup,
S’il dit à son vainqueur, voy ma playe, & ton coup ?
Blasmez, si je vous ayme avecque violence,
Vostre commandement, non pas mon insolence,
Ne m’avez-vous pas dit me demandant Hector,
Pour vous fleschir mes pleurs peuvent couler encor ?
Perdez cette rigueur où peu de gloire brille,
Et qu’Achille une fois soit vaincu d’une fille.
Eussay-je apres cela combatu vos appas ?
Souffrés que j’obeïsse ; ou ne commandés pas. ”

“ Achille.
Si ces discours sont vrais, si le cœur les avoüe,
La fortune m’esleve au dessus de sa roüe,
Et je ne voy si haut par mon amour ardant,
Que je ne puis aller au Ciel qu’en descendant.
Polixene.
Vous aurez ce bon-heur, si le Ciel vous l’octroye :
Cependant épargnez le plus pur sang de Troye,
N’ayez plus aux combas un cœur trop enflammé,
Et soiez moins vaillant pour estre plus aymé.
Achille.
Si les moins valeureux dedans vostre memoire
Sont les plus caressez, je renonce à la gloire,
Et ne recherche plus l’honneur dans les hazars,
J’ayme mieux estre aymé de Venus que de Mars. ”

“ Hé quoy veut-on si tost faire des funerailles ?
Tentons auparavant un genereux effort,
Tout ce qui doit mourir n’est pas encore mort,
Nous devons des sujets à l’infernal Empire,
Troïle ne vit plus, mais Achille respire :
Mon superbe dessein veut estre effectué,
Attendons à bruler que nous ayons tué,
Et pour bien assouvir ma vangeance, & la vôtre,
Preparons un bucher devant qu’allumer l’autre. ”

“ Et ce jeune guerrier ne sort point du combat
Qu’il n’ait couché par terre un pilier de l’Estat.
Hecube.
Caressez-le pourtant, faictes-en de l’estime,
Si ce n’est par amour, que ce soit par maxime,
Songeons au bien present, le mal soit oublié,
Il nous perd ennemy, qu’il nous serve allié,
Que son affection repare nôtre perte,
Et qu’il ferme la playe apres l’avoir ouverte :
Nourrissez son espoir d’un favorable accueil,
Quoy que vous ayez peine à le voir de bon œil,
Et qu’il vous soit à charge en sa flame amoureuse,
Il fut nôtre ennemy, vous estes genereuse ”

“ Qui porte tout le monde, en seroit-il porté ?
Si vostre jugement à cet honneur le nomme,
Vous ruinez la Grece, & perdez ce grand homme,
Comme dans un cercueil ce sera l’enfermer,
Et vous l’étouferez en le pensant armer.
Ce prix de la valeur, ces armes deffenduës
Par un si foible corps, seront bien-tost perduës,
Ulisse se verra de tous costés atteint,
Et sera despouillé avant que d’estre craint.
J’ay donné de moy-mesme une assez ample preuve,
Ma cuirasse est usee, il m’en faut une neuve,
Qu’est-il besoin qu’Ulisse ait un autre bouclier ? ”

“ Et puis pour me punir avec plus de rigueur,
Ses beaux yeux sçavent bien le chemin de mon cœur.
Pour toy si ton repos n’est pas icy tranquille
Pour vivre seurement éloigne toy d’Achille,
Tant de lasches discours sont vains & superflus. ”

“ Aide contre toy-mesme à la fureur celeste,
Couvre ce qui n’est plus, opprime ce qui reste,
Ce coup apaisera la colere des Dieux,
Et s’il est volontaire, il sera glorieux.
Des respects (Polixene) & la mort de Troïle
Sont enfin les doux fruits de l’amitié d’Achille ?
Voilà des traits d’un cœur qui n’adore que vous,
Voila comme il vous aime, & comme il est pour nous :
Außi je m’estonnois que cet inexorable
Vous eust veu malheureuse, & vous eust crûe aymable,
Eust connu des attraits parmy tant de malheurs,
Et qu’il eust veu vostre œil au travers de ses pleurs. ”

“ Sans doute que ma sœur est dans l’esprit d’Achille,
Et cette affection nous est beaucoup utille.
Priam.
Si ma fille devoit vous attirer à nous,
Achille, ha que plutost ne l’aperceustes vous !
On ne vous eust point veu si fatal à ma joye,
Derriere vostre char traisner Hector, & Troye.
Tu vivrois mon enfant, l’appui de mes citez,
Et le retardement de nos fatalitez.
Pâris.
Que votre majesté ne perde point courage,
Et sauvons, s’il se peut, les restes du naufrage.
L’Amour nous donne Achille, & s’il est diverty,
Nous pourrons voir Ajax entrer dans son party. ”

“ Jusqu’à rendre à l’Amour ce qu’il a pris à Mars ?
De plus son mal s’aigrit en telle violence,
Que qui le veut guerir se ruyne, & l’offence,
Et l’on doit pour complaire à ses feux dissolus
Dire qu’il est bien sain quand il souffre le plus. ”

“ Allons où la valeur esclate, & se renomme,
Et ne perdons pas tout pour gaigner un seul homme.
Ulisse en rentrant.
« Achille, un ennemi ne se doit frequenter,
C’est gloire de le perdre, & non de le hanter. » ”

“ Il n’est rien de si fort qu’une querelle juste,
L’ennemy vigoureux combat moins vaillamment
Que le foible ennemy qui combat justement,
Et l’on voit bien souvent où la force preside,
Un pigmée innocent vaincre un coupable Alcide. ”

“ Il nous en seroit mieux, nous aurions de l’apuy,
Et nous n’aurions point vu ni ses crimes, ni luy ;
Tu serois avec nous, malheureux Philoctete,
Lemnos ne seroit pas ton affreuse retraitte,
Et tu n’y perdrois point par occupation
Les traits qui ne sont deubs qu’au destin d’Ilion,
C’est là que tu languis dans une maladie,
Que tu te plains d’Ulisse, & de sa perfidie,
Implorant contre luy le Ciel à ton secours ;
(Vœux qui seront ouys, si les Dieux ne sont sours)
Palamede vivroit, ou seroit mort sans crime,
Sans qu’à tort l’avarice eust taché son estime. ”

“ Entre les ennemis doivent estre jettees,
Meritons par le sang un si glorieux prix,
Et qu’enfin il demeure à qui l’aura repris.
Harangue d’Ulisse.
Sy le Ciel m’eust ouy (justes, & braves hommes)
On ne nous verroit pas en la peine où nous sommes,
Je me tairois, Ajax seroit moins animé,
Car tu vivrois (Achille) & tu serois armé.
Mais puis que le trespas qui se rit de nos larmes
En nous l’ayant osté n’en laisse que les armes,
Qui par ses actions les peut mieux meriter
Que celuy d’entre nous qui les luy fit porter ? ”

“ Si vous ne nous menez combien en perdrez vous ?
Si jusques à la fin le malheur nous travaille,
Sans avoir combattu vous perdrez la bataille,
Et les Troyens ravis se vanteront après
D’avoir bien profité des querelles des Grecs. ”

“ Qu’on pensoit qu’aux Troyens vostre foi s’alloit rẽdre,
Qu’une jeune beauté changoit vos paßions,
Et qu’elle avoit gagné vos inclinations.
Achille.
« De combien d’accidens est la vertu suivie,
Et qu’elle évite peu les pieges de l’envie !
Comme elle est mesconnuë, & comme l’innocent
Passe pour criminel alors qu’il est absent ! »
Si la tresve permet qu’Achille se promene,
Il veut du bien à Troye, il ayme Polixene :
Et si durant le temps que l’on prend du repos,
Il parle aux ennemis, Achille vend Argos.
Briseide.
J’ay peur que l’inconstance ait terny vostre gloire.
Achille. ”

“ Souffrez qu’auparavant que d’aller au conseil,
J’offre un premier hommage à ce jeune Soleil.
Priam.
À recevoir vos vœux ma fille est preparée,
Mais que vos entretiens soient de peu de durée,
Vous n’estes pas encore au point de vous unir,
Et la tresve accordée est preste de finir.
Hestez-vous, & pensez que toute vostre joye
Ne depend seulement que du repos de Troye,
Et qu’il faut pour son bien qu’Achille desormais
Change une courte tresve en une longue paix.
Tous rentrent.
Scène troisiesme.
ALCIMEDE demeure seul
Où va ce pauvre aveugle ? ”

“ Evitez les dangers où l’on vous voit courir,
« Un grand cœur comme vous peut tuër, & mourir. »
Un malheur peut ternir l’esclat qui vous renomme,
Achille est redoutable, il est vaillant, mais homme.
Achille.
« Nostre vie est un bien difficile à garder,
Afin de la deffendre on la doit hazarder. »
Je m’en croirois indigne au destin qui nous presse
Si je ne l’exposois pour le bien de la Grece.
La mort dans le peril ne m’espouvante pas,
Je la crains dans la paix, & la cherche aux combas. ”

“ Quels seront vos enfants, cette superbe race,
Estant fils d’un Achille, & neveux d’un Hector ?
N’estimerez-vous pas un si riche thresor ?
Achille est un époux que le Ciel vous envoye,
Et l’aymant vous aymez Priam, Hecube, & Troye. ”