Chrétien de Troyes

“ Molt volantiers quanqu’il vos faut.
Ja si boenes armes n’avra
Mes filz, qui mal gré m’an savra,
Qu’altresi boenes ne vos doigne,
Et cheval tel con vos besoigne.
Et si vos praing, cui qu’il enuit,
Vers trestoz homes an conduit. ”

“ Se sa grant honte n’i veïst
Et son leit et sa desenor,
Et fet sanblant qu’il ait peor
De toz ces qui vienent et vont.
Et li chevalier de lui font
Lor risees et lor gabois,
Qui molt le prisoient ainçois. ”

“ Lués de la reïne requist
A ces qui devant lui estoient
Se nule novele an savoient.
Et cil qui li ont respondu,
D’avoec le roi Bademagu
Dïent qu’ele ne part nule ore,
Qui molt la sert et molt l’enore. ”

“ Qui venuz est an ceste terre
Por pris et por enor conquette.
Et veez vos celui dejoste
Qui si bien point et si bien joste
A cel escu vert d’une part,
S’a sor le vert point un liepart
Et d’azur est l’autre moitiez ?
C’est Ignaures li covoitiez,
Li amoreus et li pleisanz. ”

“ Lanceloz tot a sa devise
Le sairemant sor sainte Eglise
Li fet qu’il revandra sanz faille.
Et la dame tantost li baille
Les armes son seignor vermoilles
Et le cheval qui a mervoilles
Estoit biax et forz et hardiz. ”

“ N’iert ja de folie vuidiez.
Filz, por toi le di, que tes teches
Par sont si dures et si seches
Qu’il n’i a dolçor n’amitié ;
Li tuens cuers est trop sanz pitié :
Trop es de la folie espris.
C’est ce por coi ge te mespris ”

“ S’antredonerent par igal,
C’onques ne del bien ne del mal
Ne s’an sorent au quel tenir,
Mes ne pooit pas avenir
Que cil qui ert au pont passez
Ne fust afebloiez assez
Des mains, que il avoit plaiees. ”

“ Del col et de la gorge totes ;
Ne puis, se il le volsist bien,
Ne se pot mal feire de rien.
Ce pesoit lui qu’an le gardoit,
A po que de duel n’en ardoit,
Que molt volantiers s’oceïst,
Se nus garde ne s’an preïst. ”

“ N’avrai joie ne bien ne eise,
Ne m’avendra rien qui me pleise."
Li rois ot qu’an nule meniere
N’i valt rien consauz ne proiere,
Si l’a lessié tot mau gré suen,
Et prant cheval molt fort et buen
Et beles armes, ses anvoie
Celui an cui bien les anploie.
Iluec fu uns cirugïens
Qui molt estoit boens crestïens ;
El monde plus leal n’avoit,
Et de plaies garir savoit
Plus que tuit cil de Monpellier
Cil fist la nuit au chevalier
Tant de bien con feire li sot,
Car li rois comandé li ot. ”

“ Le chief de la ceinture lace
A l’arçon de sa sele estroit,
Ensi que nus ne l’aperçoit ;
Puis se let vers terre cliner,
Si se vost feire traïner
A son cheval tant qu’il estaigne :
Une ore plus vivre ne daigne. ”

“ Novele qui tost vole et cort
Vient au roi que ses genz ont pris
Lancelot et si l’ont ocis.
Quant li rois l’ot, molt l’an est grief,
Et jure assez plus que son chief
Que cil qui l’ont mort an morront ”

“ Se il en a si grant corage.
A tant s’an vont tuit troi a masse,
Tant qu’il pot estre none basse.
Vers none un home trové ont,
Qui lor demande qui il sont,
Et il dïent : "Chevalier somes,
Qui an noz afeires alomes." ”

“ Li max don j’ai or grant anvie.
Malveise est qui mialz vialt morir
Que mal por son ami sofrir.
Mes certes il m’est molt pleisant
Que j’en aille lonc duel feisant.
Mialz voel vivre et sofrir les cos
Que morir et estre an repos. ”

“ Dame, onques ne vi
Nul chevalier tant deboneire,
Qu’il vialt si otreemant feire
Trestot quanque vos li mandez
Que, se le voir m’an demandez,
Autel chiere tot par igal
Fet il del bien come del mal. ”

“ Que bien orent veü comant
Il l’avoit fet premieremant,
Com il estoit preuz et hardiz ;
Puis restoit si acoardiz
Qu’il n’osoit chevalier atandre.
Einz le poïst abatre et prandre
Toz li pires se il volsist. ”

“ Ne que pres de lui s’aseïst ;
Mes an lui s’est tote reposte
Malvestiez, s’a trové tel oste
Qui tant l’ainme et qui tant la sert
Que por s’enor la soe pert."
Ensi tote nuit se degenglent
Et cil de mal dire s’estrenglent. ”

“ Et si cort quanqu’ele pot corre
Por lui retenir et secorre,
Qu’ele ne le volsist veoir,
Por rien nule, a terre cheoir.
Quant il la vit, s’en ot vergoigne,
Si li a dit : "Por quel besoigne
Venistes vos ci devant moi ?" ”

“ Li chevalier congié ont pris
Come cortois et bien apris
A la dameisele et si l’ont
Salüee, puis si s’an vont
Si con la route aler an virent ;
Mes si fors del chastel issirent
C’onques nus nes i aparla. ”

“ Car il i suefre grant martire.
Ses cuers adés cele part tire
Ou la reïne se remaint.
N’a pooir que il l’an remaint,
Que la reïne tant li plest
Qu’il n’a talant que il la lest :
Li cors s’an vet, li cuers sejorne. ”

“ Qu’il ne luisoit lune n’estoile,
N’an la meison n’avoit chandoile
Ne lanpe ne lanterne ardant.
Ensi s’an ala regardant
C’onques nus garde ne s’an prist,
Einz cuidoient qu’il se dormist
An son lit trestote la nuit. ”

“ Si s’an vet criant molt an haut :
"Or est venuz qui l’aunera !
Or est venuz qui l’aunera !"
Ice crioit par tot li garz,
Et genz saillent de totes parz,
Se li demandent que il crie.
Cil n’est tant hardiz que le die,
Einz s’an va criant ce meïsmes ”

“ Vos genz et vos por moi fors traire
De cest mal et de cest contraire,
Se vos de voir le seüssiez ;
Et faire le redeüssiez
Par amor et par conpaignie,
Qu’autremant nel redi je mie.
Mes c’est neanz, ce ne puet estre. ”

“ La reïne ; mes il estoit
Tex chevaliers qu’il ne dotoit
Nul home, tan fust forz ne fiers.
Nus ne fust miaudres chevaliers,
Se fel et deslëaus ne fust,
Mes il avoit un cuer de fust
Tot sanz dolçor et sanz pitié. ”

“ Quant il n’i a plus mal soffert,
Le sanc jus de ses plaies tert
A sa chemise tot antor.
Et voit devant lui une tor
Si fort c’onques de sa veüe
N’avoit nule si fort veüe ;
La torz miaudre ne pooit estre. ”

“ De la rien que il plus voldroit,
Con li miens cuers a or androit
De la rien que je plus voloie.
De nule rien ne me doloie
Fors de ce que il vivoit tant.
Uns guerredons de moi t’atant
Qui molt te vanra an boen leu. ”

“ Asez plus grant pesance en orent
Et dïent que par saint Johan
Ne se marïeront ouan :
Quant celui n’ont qu’eles voloient,
Toz les autres quites clamoient ;
L’anhatine ensi departi
C’onques nule n’an prist mari. ”

“ Nule chose tant enorer,
Qu’il les comance a aorer,
Et bien.c.m. foiz les toche,
Et a ses ialz et a sa boche,
Et a son front et a sa face ;
N’est joie nule qu’il n’an face :
Molt s’an fet lié, molt s’an fet riche ”

“ Que il le fet tot trestorner
Deus foiz ou plus, mes bien li poist ;
Et force et hardemanz li croist,
Qu’Amors li fet molt grant aïe
Et ce que il n’avoit haïe
Rien nule tant come celui
Qui se conbat ancontre lui. ”

“ A pes et trives, moi que chaut ?
Onques por ce cuers ne me faut ;
Einz me plest molt, se Dex me gart,
Que il n’ait fors de moi regart,
Ne je ne vos quier por moi feire
Rien nule ou l’an puise retreire
Deslëauté ne traïson. ”

“ Et cil qui molt estoit bleciez
S’est lors ancontre lui dreciez,
Non pas por ce qu’il le conoisse,
Ne ne fet sanblant de l’angoisse
Qu’il avoit es piez et es mains
Ne plus que se il fust toz sains. ”

“ Quant nos nel veons ci elués ?
- Ou ? fet messire Gauvains lués,
A la cort mon seignor le roi.
Don n’i est il ? - Nenil, par foi,
Ne an tote ceste contree.
Puis que ma dame an fu menee,
Nule novele n’an oïmes. ”

“ Molt est qui aimme obeïssanz,
Et molt fet tost et volentiers,
La ou il est amis antiers,
Ce qu’a s’amie doie plaire.
Donc le dut bien Lanceloz faire,
Qui plus ama que Piramus,
S’onques nus hom pot amer plus. ”

“ Si li cheï tot a un vol
La lance et li escuz del col.
Quant cil sant l’eve, si tressaut ;
Toz estormiz en estant saut,
Ausi come cil qui s’esvoille,
S’ot, et si voit, et se mervoille
Qui puet estre qui l’a feru. ”

“ Mes ainz se confesse a li sole,
Si se repant et bat sa colpe
Et molt se blasme et molt s’ancolpe
Del pechié qu’ele fet avoit
Vers celui don ele savoit
Qu’il suens avoit esté toz dis
Et fust ancor se il fust vis. ”

“ Noire et bruiant, roide et espesse,
Tant leide et tant espoantable
Con se fust li fluns au deable,
Et tant perilleuse et parfonde
Qu’il n’est riens nule an tot le monde,
S’ele i cheoit, ne fust alee
Ausi com an la mer salee. ”

“ Que j’ai certainnemant veü
Que ce sont li nostre de ça."
Et li chevaliers s’adreça
Vers la meslee maintenant ;
S’ancontre un chevalier venant
Et joste a lui, sel fiert si fort
Parmi l’uel que il l’abat mort. ”

“ Aparceüssent tost l’afeire
S’ainsi veant toz volsist feire
Tot si con li cuers le volsist.
Et se Reison ne li tolsist
Ce fol panser et cele rage
Si veïssent tot son corage ;
Lors si fust trop granz la folie. ”

“ Si s’an ala si en anblee
Que nus de tote l’asanblee,
Qui la fust, garde ne s’an prist
Et cil a la voie se mist,
Si s’an ala molt tost et droit
Cele part don venuz estoit
Por aquiter son sairemant. ”

“ Que dameisele ne meschine,
Se chevaliers la trovast sole,
Ne plus qu’il se tranchast la gole
Ne feïst se tote enor non,
S’estre volsist de boen renon ;
Et, s’il l’esforçast, a toz jorz
An fust honiz an totes corz. ”

“ Par force l’estut apoier
Devant a l’arçon de la sele
Et quant ce vit la dameisele,
Si s’an mervoille et esbaïst
Qu’ele cuida que il cheïst ;
S’ele ot peor, ne l’en blasmez,
Qu’ele cuida qu’il fust pasmez. ”

“ Nus chevaliers, tant fust senez,
Qu’il feroit come forcenez.
Or a tant des armes apris
Que ja mes tat com il soit vis
N’avra talant d’armes porter.
Ses cuers nes puet plus andurer,
Qu’el monde n’a rien si coarde. ”

“ Tel qui plus tost cort par chanpaigne,
Par bois, par tertres et par vax
Que ne fist li boens Bucifax.
El cheval tel con vos öez
Monta li chevaliers löez,
Gauvains, li plus bien anseigniez
Qui onques fust de main seigniez. ”

“ Or sont cil d’Amors non sachant
Qui ensi les vont despisant,
Et molt an sus d’Amors se botent
Qui son comandemant ne dotent.
Car sanz faille molt en amande
Qui fet ce qu’Amors li comande,
Et tot est pardonable chose ”

“ Que cil del païs armé vindrent.
Ne fu pas mervoille s’il prindrent
Lancelot, qui desarmez iere.
Tot pris le remainnent arriere,
Les piez lïez soz son cheval.
Et cil dïent : "Vos feites mal,
Seignor, car li rois nos conduit. ”

“ Li rois lor dist que mar i vindrent,
Que tuit sont mort et confondu.
Et il li ont tant respondu
Qu’il cuidoient qu’il le volsist.
"Moi desplest il, mes il vos sist,
Fet li rois, n’a lui rien ne monte. ”

“ Tantost vet la lame seisir
Li chevaliers et si la lieve,
Si que de neant ne s’i grieve,
Mialz que dis home ne feïssent
Se tot lor pooir i meïssent.
Et li moinnes s’an esbahi
Si qu’a bien pres qu’il ne chaï,
Quant veü ot ceste mervoille ”

“ A celui le dit, qui li sanble
Que des autres soit sire et mestre.
Et il li dit : "Ne porroit estre
Que je herberjasse a ceste ore,
Car malvés est qui se demore
Ne qui a eise se repose
Puis qu’il a enprise grant chose. ”