Gaston Phœbus, Joseph Lavallée

“ Des chiens les uns chassent au vent et les autres le nez à terre. Ceulz qui chassent au vent valent mieulz au bois et au couvert, là où la beste touche de tout le corps, si en puevent avoir partout. Et aussi valent-ils mieulz à batre les yaues ; quar ils trayent touzjours au vent. Le chien qui chasse le musel à terre se tient mieulz à routes que ne fet celui qui chasse au vent, et a en luy plus de recouvrier. Et quant une beste fuit la champainhe ou les voyes, celui qui met le nez à terre chassera et se tendra à routes, et ressentira là où l’autre qui chasse au vent n’en saura jà de novelles. ”

“ Un capiau de fer est un chapeau de paille. Ce mot est aussi conservé dans le langage du droit. On appelle cheptel de fer celui où le propriétaire fournit les bestiaux et profite uniquement des pailles consommées qui doivent être employées à fumer sa terre. ”

“ Quant elle va en amour, et elle quiert son compaignon, elle crie à vois enrouée comme vois de chien enraigié. Et aussi quant elle n’a tous ses renardiaus, elle les appelle en celle mesme guise. Elle ne se plaint point quant on la tue ”

“ Aucunefoys prennent la contre ongle ; aucunefois prennent tours dessà et delà pour le redressier, et en ce cas doit le veneur venir là où ilz l’ont failli, et regarder et penser ce que le cerf pourroit ou devroit avoir fet, et metre l’ueil à terre sur le chemin, ou descendre si mestier est. Et s’il voit qu’il fuye la voye, ou amont ou aval, au long du chemin, il doit geter ses brisées par tout là où il en voit, en criant à ses chiens, et disant : Voys le fuir la voie ! ”

“ Et se on n’a veu le chevreul au matin, on doit aler leisser ses chiens querant et travaillant au pays où il li semblera que chevreulz doyvent mieux demourer : et si les chiens en encontre d’aventure, le veneur se doit arrester et dire les mots tout comme il vorra, et le lengaige de son pays l’aportera. Et se les chiens boutent avant leurs routes, il puet descendre et regarder s’ilz vont droit ou la contre ongle ; et aussi le puet-il connoistre à ses chiens ; quar se les chiens vont leur droit, ou plus iront avant et plus s’eschauferont et crieront ”

“ Si avint que le roy Clodoveus de France chevauchoit par son royaulme, se passa par là où le lévrier gardoit son seigneur. Et le lévrier se leva encontre et commença à abayer pour defendre son seigneur contre tous. Le roy Clodoveus de France qui preudhomme et apercevant estoit, tantost qu’il vit le lévrier, si connut que ce estoit celuy que le roy Apollo de Léonois avoit amené à sa court ; si en fut moult merveillé : et ala lui meisme là où le lévrier estoit. Si vit la fosse et fist descendre de ses gens pour veoir qu’il y avoit dedanz. Si trouva le corps du roy Apollo de Léonois tout entier. ”

“ Lorsqu’il est poursuivi par les chiens, il gagne le sommet des rochers, et quand il n’a plus d’autre moyen d’échapper, il se précipite la tête la première du haut d’une roche si élevée qu’elle soit ; de cette manière, grâce à la grosseur et à la dureté de ses cornes, il s’échappe sans blessure. ”

“ Chien sage baud ne doit jamès crier, sil n’est à ses routes ; aussi doit il requérir les voyes ; quar un cerf les fuyt et refuyt voulentiers. Chien baud chasse au vent quant il est lieu et temps, et aussi chasse le nez à terre quant il est lieu et temps. Il croit et entent son mestre et fet ce que li commande. Chien baud ne doit lessier ne par vent, ne par pluye, ne par chaut, ne par nul mal temps sa beste ; mes pou en y a maintenant de cieulz ; et aussi bien doit il chassier tout seul sa beste sanz aide d’omme, comme se l’omme chassoit touzjours avec luy. ”

“ La chair du dain est plus savoureuse à tous chiens que n’est celle du cerf ne celle du chevreul ; et pour ce est-ce mauvais change quant on chasse le cerf à chiens qui ont autrefois mengié de dains. Leur venoyson est trop bonne et la garde l’en ; et se sale comme celle du cerf.
Ilz demuerent voulentiers en sec pays, et touzjours voulentiers en compaignie d’autres dains se ce n’est dès le moys de may jusques à la fin d’aoust que, pour paour des mousches, ilz prennent leurs buyssons, aucune fois avec un autre dain, aucune fois tous seuls. ”

“ Après ce que j’ay dit de la nature des bestes tant de doulces comme de mordans que len chasse, si vourray ore dire de la nature des chiens qui les chassent, et de leurs noblesses et condicions, lesquelles sont si grandes et si merveilleuses en aucuns chiens, qu’il n’est nul homme qui le peust croyre s’il n’estoit trop bon veneur, et bien cognoissant, et qui les ait hanté trop longuement ; quar c’est la plus noble beste et plus raysonable, et mieuls congnoissant que Dieus fust onques, et si n’en oste en moulte de cas ne homme ne nulle autre chose. ”

“ Cependant le brocard a la pince plus ronde, moins tranchante et les éponges plus pleines ; les régalis, c’est-à-dire les endroits où le mâle s’est amusé à gratter la terre avec ses pieds, dénotent aussi un brocard ; enfin ses allures sont moins croisées. ”

“ Toutesvoyes il y ha bien des sengliers malicieus, que tant tots comme ilz oyent un chien, ilz s’en vont, que jà de tout le jour ne le rapprochera l’en, aussi bien comme si trois chiens ou quatre les chassoyent. Et pour ce je loe pour le mieulz que, s’il encontre d’un senglier, il ne le poursuyve pas trop. Espicialement s’il entre en fort pays ou il li semble que puisse et doyve bien demourer ; mes quant il verra qu’il entrera en bon pays, si face ilec ses brisées et preinhe au tour à tout son limier, ainsi comme j’ay dit en la queste du cerf et s’en revienhe à l’assemblée. ”

“ Dont si il leur fet en ceste guyse troys ou quatre fois, jamais ne dira celuy meisme mot que les chiens ne vieignent yqui pour quant qu’il n’y ait rien ; quar ilz cuyderont touzjours assentir de la beste qu’ilz vuelent chassier. Einsi les aprent-on de estre de bonne créance et de les fere venir là où l’en vuet. Et bon veneur ne doit dire à ses chiens fors que la pure vérité, affin qu’ilz li donnent plus grant foy en ce qu’il leur dit, et le croyent mieulz. Quar je feroye bien venir mes chiens et metre le nez à terre mille foys là où je voudroye, et crier là où il n’aroit rien. ”

“ Et doit le veneur chevauchier ses chiens de près ; et s’il vuelt porter un espieu en sa main tout à cheval, c’est bonne chose ; combien que le tuer de l’espée soit plus bele chose et plus noble. Toutesfois ne le peut il pas férir de l’espée ; quar se un senglier ne vient courre sus à un homme visadge à visadge, ou on ne le vient acouant [1] par derrière, ou lévriers ne le tienent en autre manière, il ne le touchera jà de son espée ; et s’il a son espieu trop de fois le pourra férir en getant, s’il le scet bien fere, là où il ne pourroit avenir de son épée ”

“ Autres lous passans d’aventure, qui ne sont mie einsi accompainhés, n’aident point einsi nourrir ses chiaux à la louve ; mes quant le lou et la louve sont accompainhés et il n’a plus lous ou païs, par droit naturel sentement, il scet bien que les chiaux sont siens, et pource les aide il à nourrir ; mes ce est mal gracieusement. Au temps que les louvetiaux sont petits, sont plus gras les lous que en temps de l’an, quar ils menjent ce qu’ils prennent et ce que la louve et les chiaux devoient mengier. ”

“ Du renart et de toute sa nature.
Renart est assés commune beste ; si ne me convient jà dire de sa faisson ; quar pou de gens sont qui bien n’en ayent veu. Elle a auques et moultes des condicions telles comme le loup ha ; quar elle porte, autant comme la louve fet, ses chiauls, ore plus, ore moins, einsi comme la louve ; mes que elle les fet dessoubz terre bien profond plus que la louve ne fet, et est une fois chaulde l’an. Elle a la morsure venimeuse comme le lou, et sa vie n’est pas plus longue que d’un lou. ”

“ Quant le connil vuelt aler à la connille, il fiert si grant coup du pié en terre, que c’est grant merveille. Et en cela s’eschaufe et puis sault sus, et quant il a fait sa besoigne, il se laisse cheoir arrière tout pasmé et demuere un petit comme s’il estoit mort. On les prent einsi comme les lièvres et aux furons, quant ilz sont ès fousses. La char du connill est meilleur et plus saine que celle du lièvre ; quar celle du lièvre est mélenconique et sèche plus que celle du connil. ”

“ Et quant il est grant, qu’il puet mengier des herbes et de la fueille et fuyr, adonc la chevreule se racompaigne avec le masle et touzjours seront ensemble qui ne les tuera ; et qui ne les despartira et chassera moult loing l’un de l’autre ; et touzjours se racompaigneront le plus tost qu’ilz pourront ; et si querront l’un l’autre jusques tant qu’ilz se soient trouvés. La cause pourquoy ilz sont touzjours einsi ensemble le masle et la femelle et nulle autre beste du monde ne l’est, si est pour ce que voulentiers une chevreule porte deux faons, masle et femelle ”

“ La saison de l’ours commence en may et dure jusques tant qu’il vet es ourses. Et toutes saisons sont gras ou dedans ou dehors, et plus dure sa saison que de nulle beste qui soit. Et quant il est blessié et peut eschaper aux chasseurs et est hors de eulx, il s’uevre ès mains sa ploye et tret hors ses boyaus. Quant il revient de ses menjures il vet voulentiers les chemins, et quant il se destourne des chemins, c’est pour s’en aler demourer, il ne fet point de reuses. Il se bainhe et soille comme un sanglier et boit en manière de sanglier et menje en guise d’un chien. ”

“ Et s’il ha limier pour le sang, il doit suyvre jusques tant que la beste soit morte ; et s’il n’a limier, et ha autre chien pour le sang, il le doit abatre sus le sang, et aler après ou à cheval ou à pié. Et se l’archier n’a pas aperçu par où il a féru sa beste, et il a treuvé sa flesche sanglante, il verra bien combien il en sera entré dedens et verra le sang gros et espès, et il tastera des dois sur le fer et trouvera le sang limonneus et gras sur la froidour du fer. ”

“ Autre maniere y a de chiens qu’on apelle chien d’oysel et espainholz, pource que celle nature vient d’Espainhe, combien qu’il en y ait en autre pays. Cieulz chiens ont moult de bonnes coutumes et de mauveises aussi. Beau chien d’oysel doit avoir grosse teste et grant corps et bel de poill blanc ou tavelé ; quar ce sont les plus biaux ; et de cieu poill en y a plus voulentiers de bons. Et il ne doit mie estre trop velu et doibt avoir cueue espesse. Les bonnes coutumes que cieux chiens ont, sont qu’ilz ayment bien leurs mestres et le suyvent sans perdre parmi toute gent ”

“ Et se le senglier li vient courre sus visaige à visaige, il doit venir contre luy, non pas courant, mes trotant, les rênes de sa bride bien courtes ; et ne doit point regarder au senglier, ni à ce qu’il fera, mes penser et adviser par où il pourra mieulz asseoir son coup. Et s’il fiert de l’espieu, il doit férir de haut en bas, si fort comme il pourra, en se levant sur les estriers. Et doit tout veneur chevauchier court ansois que long ; car il en est plus aysié et moins en griève son cheval ; quar s’il monte une coste, il se puet soustenir sur les estriers et ne grèvera mie tant son cheval ”

“ Auberi estoit serviteur du roy de France si en alloit de la court vers son hostel. Einsi qu’il s’en alloit et passoit par les bois de Bondis qui sont près de Paris, et menoit un très biau et bon lévrier qu’il avoit. Un homme qui le heoit [3] par envie, sans autre raison, qui estoit appellé Machaire si li corrut sus dedens le boys, et le tua sans deffier, qu’il ne s’en gardoit. Et quant le lévrier vit son maistre mort, si le couvrit de terre et de feuilles au mieulx qu’il peut, aux ongles et au musel. ”

“ Et aussi le vieill cerf et grant fet meilleur sole de pié et meilleur talon et meilleurs os et plus gros et plus large que ne fait un jeune cerf ne une bische. Ès piez des cerfs et bisches que j’ay dit dessus metre en terre, pourra il connoistre les différences mieulx que je ne saroye deviser. Aussi la biche a plus creuses trasses communément que n’a un jeune cerf ; et plus ouverte l’ongle devant du cerf dont chassable ; quar des autres ne men chaut, est le judgement ou talon gros et large et la sole du pié grant et large ; es os gros et larges et la pointe du pié reonde. ”

“ Quar si un homme estoit sus un arbre, ou sus une souche, jà beste n’en haroit le vent einsi que s’il estoit en terre. Donc pourra il choisir et trère à ses bestes que bon li semblera. Et quant il aura féru sa beste, il doit le matin, à l’aube du jour, metre son chien sur le sanc et aler après comme dit est. ”

“ Ils deviennent aucunefois enragiés, et quant ils mordent un homme, à peine en puet garir ; quar leur morsure est trop venimeuse, comme j’ay dit pour les crapaux qu’ils menjent, et d’autre part pour la maladie de la rage. Quant ils sont pleins ou malades, ils peissent de l’erbe, comme un chien, pour eulx vuider. Ils demeurent longuement sans mengier ; quar un lou demourra bien sans mengier vi jours ou plus. Quant la louve a ses chiaux, à peines fera mal près de là où elle ha ses chiauls, pour paour de les perdre. ”

“ On doit prendre le chien quant il a demy an passé et bien tenir les quatre piés et mettre un baston au travers de la bouche afin qu’il ne puisse mordre et puis prendre la lengue et le ver que vous trouverez dessoubz la lengue et fendez un pou la lengue et puis passez une aguille et du fil entre le ver et la lengue et puis tirez le fil a mont à tout le ver. Et combien que on le appelle ver ce nest que une grosse voine que les chiens ont dessoubz la lengue. Ceste rage ne se prent point aux autres chiens ne aux hommes ne à rien. ”

“ Et quant on chasse doit avoir trois hommes, l’un à l’un bout des èles et l’autre à l’autre ; et l’autre au milieu bien couvert. Et quant il sera entre la fousse et eulz, ilz le doivent acuillir einsi que j’ay dit de la haye et le fere bouter dedens la fousse, car il ne s’i prendra garde et cuydera que tout soit plain pays ; et doivent estre estroites les èles derrière du large de la fosse et non plus ouvert par de là la fousse affin qu’il cuyde bien passer oultre et ou plus seront longues les èles et larges tant vaudra mieulx. ”

“ Les autres reent bas et gros et la teste beissiée le musel vers terre ; et c’est signe de grant cerf et vieil et malicieus, ou qu’il a oy les chiens, et pour ce n’ose il fort rère ne guères de jour, se n’est à l’aube du jour. Les autres réent le musel tout droit devant eulz en gargoutant [4] et raillant dedans leur gorge ; c’est aussi signe de grant cerf et vieill et qu’il est asseuré et affermé en son ruyt. Briefment touz cerfz qui plus gros et plus fort réent doivent estre plus grans et plus vieillz. ”

“ Et tantost doit passer tout droit la rivière ; et si ce est en gué à chemin tout droit, il doit mettre l’ueil à terre pour voir s’il tient le chemin ; quar là trépassent voulentiers chiens leurs routes, tant pour le chemin comme pource qu’il vient le pié moillé hors de l’eaue. Et quant il le met à terre, la terre boyt et tyre la moilleure et humour du cerf que chiens ne pevent assentir ; quar quant le cerf a batu les yeaues et il se ressuye, l’yeaue du corps et des iambes chiet sur les routes ; si n’en pevent les chiens assentir, quar il est tout relavé aussi comme s’il estoit sur pleu ”

“ Prenez de l’yaue et du sel menu dedans et les en lavez les piés le jour qu’ils aront chassié. Et s’ils ont chassé par malx pays ou d’ajonx ou d’espines qui les ayent donnés par les jambes ou par les piés, si leur lavez les jambes de fien [13] de mouton boilli en vin et refroydie, en frotant de bas en haut le poill à mont. Le plus que on puet fere à chiens, pour garder les piés, qu’ils ne perdent les ongles, cest que on ne les leisse trop séjourner ; quar au séjour perdent ils voulentiers les ongles et les piés. ”

“ Au vespre quant sont relevées ; au matin quant elles sont alées au giste et des autres bestes non ; quar, s’il pluet à matin, vous arez perdue vostre journée, et des lièvres non : l’autre, querir et cerchier [2] un lièvre est trop belle chose, espiciaument qui le fet einsi que je fais ; quar il convient que mes chiens l’aillent trouver par mestrise et querir point par point en deffaisant tout quant tant qu’elle aura fet la nuyt, dès son viander jusque tant qu’ils le facent saillir. Et ce est belle chose quant les chiens sont bons et le scevent bien fere. ”