Michel de Montaigne

“ Il n'est ame si revesche, qui ne se sente touchee de quelque reverence à considérer cette vastité sombre de nos églises, la diversité d'ornements et ordre de nos cerimonies, et ouïr le son devotieux de nos orgues, et l'harmonie si posee et religieuse de nos voix : ceulx mesmes qui y entrent avecques mespris sentent quelque frisson dans le cœur, et quelque horreur, qui les met en desfiance de leur opinion. ”

“ Nous appelions sagesse la difficulté ne nos humeurs, le desgoust des choses présentes; mais, à la vérité, nous ne quittons pas tant les vices, comme nous les changeons, et, à mon opinion, en pis : oultre une sotte et caducque fierté, un babil ennuyeux, ces humeurs espineuses et inassociables, et la superstition, et un soing ridicule des richesses, lors que l'usage en est perdu, j'y treuve plus d'envie, d'injustice et de malignité; elle nous attache plus de rides en l'esprit qu'au visage ; et ne se veoid point d'ames, ou fort rares, qui en vieillissant ne sentent l'aigre et le moisi. ”

“ Il n'est passion qui esbranle tant la sincérité des jugements, que la cholere.
Pendant que le pouls nous bat et que nous sentons de l'esmotion, remettons la partie : les choses nous sembleront à la verité aultres, quand nous serons r'accoysez et refroidis. ”

“ C'est la passion qui commande lors, c'est la passion qui parle : ce n'est pas nous : au travers d'elle, les faultes nous apparoissent plus grandes, comme les corps au travers d'un brouillas.
C'est une passion qui se plaist en soy, et qui se flatte. Combien de fois, nous estants
esbranlez sous une faulse cause, si on vient à nous présenter quelque bonne deffense ou excuse, nous despitons nous contre la verité mesme et l'innocence ? ”

“ Est il si simple entendement, lequel ayant d'un costé l'object d'un de nos vicieux plaisirs, et de l'aultre, en pareille cognoissance et persuasion, l'estat d'une gloire immortelle, entrast en bigue de l'un pour l'autre ? ”

“ Qu'est-il plus vain que de vouloir deviner Dieu par nos analogies et conjectures! le régler, et le monde, à nostre capacité et à nos loix ! et nous servir, aux despens de la Divinité, de ce petit eschantillon de suffisance qu'il luy a pieu despartir à nostre naturelle condition ; et, parce que nous ne pouvons estendre nostre veue jusques en son glorieux siege, l'avoir ramené çà bas à nostre corruption et à nos misères? sa condition est trop haultaine, trop esloingnee et
trop maistresse, pour souffrir que nos conclusions l'attachent et la garottent. ”

“ Toutes choses produites par nostre propre discours et suffisance, autant vrayes que faulses, sont subjectes à incertitude et débat.
C'est pour le chastiment de nostre fierté, et instruction de notre misere et incapacité, que Dieu produisit le trouble et la confusion de l'ancienne tour de Babel : tout ce que nous entreprenons sans son assistance, tout ce que nous veoyons sans la lampe de sa grâce, ce n'est que vanité et folie ; l'essence mesme de la vérité, qui est uniforme et constante, quand la fortune nous en donne la possession, nous
la corrompons et abastardissons par nostrefoiblesse. ”

“ On trouve aussi chez les barbares la creance du purgatoire, mais d'une forme nouvelle : ce que nous donnons au feu, ils le donnent au froid, et imaginent les ames et purgees et punies par la rigueur d'une extrême froidure. ”

“ Si ce rayon de la Divinité nous touchoit aulcunement, il y paroistroit partout; non seulement nos paroles, mais encores nos opérations, en porteroient la lueur et le lustre; tout ce qui partiroit de nous, on le verroit illuminé de cette noble clarté. ”

“ Le mariage a, pour sa part, l'utilité, la justice, l'honneur et la constance. L'amour se fonde au seul plaisir. ”

“ Il me semble que la vertu est chose aultre, et plus noble, que les inclinaisons à la bonté qui naissent en nous. Les ames reglees d'elles mesmes et bien nees, elles suyvent mesme train, et représentent, en leurs actions, mesme visage que les vertueuses ; mais la vertu sonne je ne sçais quoy de plus grand et de plus actif que de se laisser, par une heureuse complexion, doulcement et paisiblement conduire à la suitte de la raison. Celuy qui, d'une doulceur et facilité naturelle, mespriseroit les offenses reçues, feroit chose tresbelle et digne de louange ”

“ Miserable sorte de remède, debvoir à la maladie sa santé !
Il fault que Dieu nous touche le courage : il fault que nostre conscience s'amende d'elle mesme, par renforcement de nostre raison, non par l'affoiblissement de nos appétits. ”

“ Nous advient touts les jours d'attribuer à Dieu les evenements d'importance, d'une particulière assignation: parce qu'ils nous poisent, il semble qu'ils luy poisent aussi, et qu'il y regarde plus entier et plus attentif qu'aux evenements qui nous sont legiers, ou d'une suitte ordinaire ; comme si à ce roy là c'estoit plus et moins de remuer un empire, ou la feuille d'un arbre, et si sa providence s'exerceoit aultrement, inclinant l'evenement d'une battaille, que le sault d'une pulce. La main de son gouvernement se preste à toutes choses, de pareille teneur, mesme force même ordre. ”

“ Ce n'est pas en passant, et tumultuairement, qu'il faut manier un estude si serieux et venerable; ce doibt estre une action destinee et rassise, à laquelle on doibt tous jours adjouster
cette preface de nostre office, Sursum corda, et y apporter le corps mesme disposé en contenance qui tesmoigne une particulière attention et reverence. Ce n'est pas l'estude de tout le monde; c'est l'estude des personnes qui y sont vouees, que Dieu y appelle ; les meschants, les ignorants, s'y empirent : ce n'est pas une histoire à conter; c'est une histoire à reverer, craindre, et adorer. ”

“ Si nous veoyions autant de monde comme nous n'en veoyons pas, nous appercevrions, comme il est à croire, une perpetuelle multiplication et vicissitude de formes. Il n'y a rien de seul et de rare, eu esgard à nature, ouy bien eu esgard à nostre cognoissance, qui est un miserable fondement de nos réglés, et qui nous représente volontiers une tres faulse image des choses.
La science passe de main en main, pour cette seule fin d'en faire parade, d'en entretenir aultruy et d'en faire des contes, comme une vayne monnoye inutile à tout aultre usage et emploite qu'à compter et jecter. ”

“ Quel merveilleux exemple nous en a laissé la sapience divine, qui, pour establir le salut du genre humain, et conduire cette sienne glorieuse victoire contre la mort et le peché, ne l'a voulu faire qu'à la mercy de nostre ordre politique ”

“ Dieu, par sa misericorde, daignant, à l'adventure, fomenter, par ces benefices temporels, les tendres principes d'une telle quelle brute cognoissance, que la raison naturelle leur donnoit de luy au travers des faulses images de leurs songes. Non seulement faulses, mais impies aussi et injurieuses, sont celles que l'homme a forgé de son invention ”

“ C'estoit vrayement bien raison que nous feussions tenus à Dieu seul, et au benefice de
sa grâce, de la verité d'une si noble creance, puisque de sa noble liberalité nous recevons le fruict de l'immortalité, lequel consiste en la jouissance de la beatitude eternelle. Confessons ingenument que Dieu seul nous l'a dict, et la foy; car leçon n'est ce pas de nature et de nostre raison : et qui retentera son estre et ses forces, et dedans et dehors, sans ce privilege divin; qui verra l'homme sans le flatter, il n'y verra ny efiicace ny faculté qui sente autre chose que la mort et la terre. ”

“ Quand la vieillesse luy sera sur les espaules, les archers de sa garde l'en deschargeront-ils? quand la frayeur de la mort le transira, se rasseurera il par l'assistance des gentilshommes de sa chambre? quand il sera en jalousie et caprice, nos bonnettades le remettront elles? Ce ciel de lict, tout enflé d'or et de perles, n'a aulcune vertu à rappaiser les tranchees d'une verte cholique. A la premiere strette que luy donne la goutte, il a beau estre Sire et Majesté, perd il pas le souvenir de ses palais et de ses grandeurs ? ”

“ Il y a, certes, je ne sçais quelle congratulation de bien faire, qui nous resjouit en nous mesmes, et une fierté genereuse qui accompaigne la bonne conscience : une ame courageusement vicieuse se peult à l'adventure garnir de sécurité ”

“ Puisque Dieu nous donne loisir de disposer de notre deslogement, preparons nous y; plions bagage, prenons de bonne heure congé de la compagnie, despestrons nous de ces violentes prinses qui nous engagent ailleurs et esloignent de nous. ”

“ Les chrestiens ont une particulière instruction de cette liaison : car ils sçavent que la justice divine embrasse cette societé et joincture du corps et de l'âme, jusques à rendre le corps capable des recompenses éternelles : et que Dieu regarde agir tout l'homme, et veult qu'entier il reçoive le chastiement, ou le loyer, selon ses démérites. ”

“ Se faire la poignee plus grande que le poing, la brassee plus grande que le bras, et d'esperer enjamber plus que de l'estendue de nos jambes, cela est impossible et monstrueux ; ny que l'homme se monte au dessus de soy et de l'humanité : car il ne peult voir que de ses yeulx, n'y saisir que de ses prinses. Il s'eslevera, sy Dieu luy preste extraordinairement la main ; il s'eslevera, abandonnant et renonçeant à ses propres moyens, et se laissant haulser et soublever par les moyens purement celestes. C'est à nostre foy chrestienne de prétendre à cette divine et miraculeuse métamorphose. ”

“ Si nous le croyions, je ne dis pas par foy, mais d'une simple croyance ; voire (et je le dis à nostre grande confusion) si nous le croyions et cognoissions, comme une aultre histoire, comme l'un de nos compaignons, nous l'aymerions au dessus de toutes aultres choses, pour l'infinie bonté et beaulté qui reluict en luy : au moins marcheroit il en mesme reng de nostre affection que les richesses, les plaisirs, la gloire, et nos amis. Le meilleur de nous ne craint point de l'oultrager, comme il craint d'oultrager son voisin, son parent, son maistre. ”

“ HORS L'ÉGLISE
ATHÉISME
L'atheïsme estant une proposition comme desnaturee et monstrueuse, difficile aussi et malaysee d'establir en l'esprit humain, pour insolent et desreglé qu'il puisse être, il s'en est veu assez, par vanité, et par fierté de concevoir des opinions non vulgaires et reformatrices du monde, en affecter la profession par contenance; qui, s'ils sont assez fols, ne sont pas assez forts pour l'avoir plantee en leur conscience : pourtant ils ne lairront de joindre leurs mains vers le ciel, si vous leur attachez un bon coup d'epee en la poitrine ”

“ Nous luy prescrivons des bornes, nous tenons sa puissance assiegee par nos raisons (j'appelle raison nos resveries et nos songes) : nous le voulons asservir aux apparences vaines et faibles de nostre entendement, lui qui a faict et nous et notre cognoissance. Parce que rien ne se faict de rien, Dieu n'aura sceu bastir le monde sans matiere. Quoi! Dieu nous a il mis en main les clefs et les derniers ressorts de sa puissance ? s'est-il obligé à n'oultrepasser les bornes de nostre science? ”

“ Et de cette mesme image du monde qui coule pendant que nous y sommes, combien chestifve et raccourcie est la cognoissance des plus curieux? non seulement des evenements particuliers, que fortune rend
souvent exemplaires et poisants, mais de l'estat des grandes polices et nations, il nous en eschappe cent fois plus qu'il n'en vient à notre science : nous nous escrions du miracle de l'invention de nostre artillerie, de nostre impression; d'aultres hommes, un aultre bout du monde, à la Chine, en jouïssoient mille ans auparavant. ”

“ Aultre chose est un dogme sérieusement digcré; aultre chose, ces impressions superficielles, lesquelles, nees de la desbauche d'un esprit desmanché, vont nageant temerairement et incertainement en la fantaisie.
Hommes bien misérables et escervellez, qui taschent d'estre pires qu'ils ne peuvent! ”

“ Le vice laisse, comme un ulcere en la chair, une repentance en l'ame, qui tous jours s'esgratigne et s'ensanglante elle mesme : car la raison efface les aultres tristesses et douleurs, mais elle engendre celle de la repentance qui est plus griefve, d'autant qu'elle naist au dedans, comme le froid et le chaud des fiebvres est plus poignant que celuy qui vient du dehors. ”

“ Quand tu dis, Platon, que ce sera la partie spirituelle de l'homme à qui il touchera de jouïr des recompenses de l'aultre vie, tu nous dis chose peu d'apparence ; car, à ce compte, ce ne sera plus l'homme, ny nous, par conséquent, à qui touchera cette jouissance, car nous sommes bastis de deux pieces principales essentielles, desquelles la separation c'est la mort et ruyne de nostre estre. ”

“ C'est la foy seule qui embrasse vifvement et certainement les haults mysteres de nostre religion.
Mais ce n'est pas à dire que ce ne soit une tresbelle et treslouable entreprinse d'accommoder encores au service de nostre foy les utils naturels et humains que Dieu nous a donnez; il ne fault pas doubter que ce ne soit l'usage le plus honorable que nous leur sçaurions donner, et qu'il n'est occupacion ny desseing plus digne d'un homme chrestien, que de viser, par touts ses estudes et pensements, à embellir, estendre et amplifier la verité de sa creance. ”