Cesare Ripa

“ Par le crible qu’elle porte, il est demonstré, Que l’eau qu’on y respand n’en sort pas plus promptement, que les mauuaises pensées s’escoulent viste de son ame ; Et par le Cupidon qu’elle foule aux pieds se void clairement, Que la Concupiscence, quelque forte qu’on se la figure, ne peut auoir aucun empire sur elle. ”

“ Car il est certain qu’apres celle de la foudre, qui n’est pas imaginable, il n’est point d’oyseau en l’air qui esgale le vol de l’Espervuier, ny point de poisson dans l’eau qui nage si viste que le Dauphin. ”

“ Sa robe de couleur verte, signifie, Qu’en quelque profession que ce soit, les meilleurs Ouuriers ne s’estudient à perfectionner la Nature par le moyen de l’Art, qu’à cause de l’esperance qu’ils ont, ou d’en tirer de la gloire, ou d’en auoir du profit. Car il est indubitable que l’honneur & l’interest sont deux demons grandement puissans, pour aiguiser l’esprit de l’homme, & le faire reüssir dans les ouurages les plus difficiles. ”

“ Par le Soleil qu’elle a sur le sein, il est declaré, Que comme la lumiere de ce grand Astre nous vient du Ciel icy bas ; Ainsi la Vertu, qui a son siege dans le cœur, inspire le mouuement & la vigueur à tout nostre corps, que les Grecs appellent vn petit monde : De maniere que par cette Vertu secrette il se rechauffe de lumiere, de chaleur & de force, sont selon les Philosophes anciens, la meilleure partie des plaisirs & des biens que nous pouuons gouster en cette vie. ”

“ Que si elles se voile les yeux, c’est pour monstrer que la Guerre, qui est figurée par le Serpent, a des objets si tragiques, qu’ils font horreur la pluspart du temps à quiconque, les sçait bien considerer : ce qui fait que le plus illustre de tous les Poëtes s’escrie à bon droit, Æneid. ”

“ L’effroyable regard qu’on attribuë à ce mois, donne à connoistre combien il est dangereux, à cause qu’alors le Soleil se trouue dans la Canicule, dont la chaleur violente est nuisible jusques au dernier point à la santé des mortels. ”

“ Le Liure qu’il tient en la main droite, nous apprend combien il importe au Senateur d’estudier les ouurages des sçauans hommes, pour s’acquerir la connoissance de la Morale & de la Politique, puis que de l’estude de la Sagesse dépend la solidité du Conseil. ”

“ Vne Aigle est perchée sur sa teste, pour nous apprendre, Que le plus haut point de cette vertu ne gist pas en l’action de donner casuellement aux autres ce qui est à nous ; Mais en l’habitude & en l’intention : ce qui est encore le propre des autres vertus. ”

“ Dauantage, comme ce n’est pas la moindre de ses qualitez que d’esteindre peu à peu l’amour prophane ; la vraye Bonté de mesme a cela de propre, de fouler aux pieds tous ses interests, & d’assuiettir à la raison l’amour de soy-mesme, qui trouble ordinairement l’harmonie des autres Vertus.
Elle tourne les yeux vers le Ciel, pour ne voir point les vanitez de la terre. Car les objets de bassesse & de fragilité ne luy sont pas moins odieux, que la contemplation de choses diuines luy est agreable. ”

“ Pour la mesme fin elle ouure les bras pour accueillir tout le monde, & respand à pleines mains des pieces d’or & des pierreries ; ce qu’elle fait de si bonne grace, qu’elle ne daigne pas mesme regarder les effets de sa largesse, & se plaist à les produire sans en tirer vanité. Par où, si ie ne me trompe, il nous est enseigné, Que la Generosité doit estre nommée par excellence, la Vertu des Prince & des Herôs, pource qu’ils ont dequoy l’exercer, & que les personnes de leur naissance se plaisent plus incomparablement à donner qu’à receuoir. ”

“ La Science de mesme l’emporte par dessus tout ce qu’il y a de plus exquis en la Nature : puisque c’est elle qui sert à perfectionner nostre ame, & qui l’esleue à la connoissance des mysteres diuins. Dequoy le sage Socrate nous aduise prudemment dans Plutarque, où il dit, Que c’est beaucoup d’en acquerir quelque eschantillon icy bas, puis qu’il n’appartient qu’à Dieu seulement de sçauoir toutes choses, & de penetrer dans la connoissance de toutes leurs causes. ”

“ Les aislerons de sa teste & ses talonnieres, sont les Symboles de la promptitude des paroles.
Par le Cheual Pegase, s’entend l’illustre Renommée d’Antinoüs, semée par tout le monde. Et par le frein de ce mesme Cheual que Mercure mene en main, il est demonstré que par le moyen des paroles & de la voix, sont espandus par toute la terre les faits memorables des plus grandes hommes. ”

“ Pour le regard de l’Enfant à qui cette Femme donne à boire, cela veut dire, que sans le breuuage & les aliments conuenables, il est impossible que la vie se maintienne, puisque c’est la nourriture qui fortifie & conserue la chaleur naturelle. ”

“ Par la Corne d’abondance, Que toutes les fois qu’il est question de faire des œuures de Pieté, il ne faut point tenir conte des richesses mondaines, mais en assister liberalement ceux que l’on sçait en auoir besoin. ”

“ Ainsi pouuons-nous bien dire, Qu’en l’entendement il y a quelque representation de Dieu & de la Diuinité, & qu’elle est aussi petite que nostre œil, à comparaison de la vaste estenduë du Ciel.
Le Degré par où elle descend sert à nous faire souuenir, Que les sujets intelligibles ont leur proportion & leur ordre, par qui, comme par certains degrez nous allons des choses voisines aux plus lointaines, & des basses aux plus hautes ; à quoy nous paruenons insensiblement par le moyen du temps, sans lequel il est impossible à l’esprit humain de former aucun raisonnement. ”

“ Le Frain dont elle arreste le Lion, signifie l’empire qu’elle a sur les passions, qui sont naturellement farouches, & indomptables. Et comme par le moyen du chiffre on preuue les choses reelles ; Ainsi par la force de la Raison l’on s’acquiert la connoissance de celles qui regardent nostre commun bien. ”

“ Bien que les valeureux efforts que l’on fait pour lutter contre les choses difficiles, conuiennent à toutes les Vertus particulieres, si est-ce que l’execution n’en appartient qu’à la Force, le propre de laquelle, est de souffrir courageusement pour l’amour de la Vertu toute sorte d’euenemens, & de fortunes contraires. ”

“ Par les aisles, il est monstré, Qu’il n’est point de Science où la contemplation ne puisse esleuer l’esprit. Par le Miroir, Que c’est l’abstraction qui la forme, pource qu’en matiere de conceuoir les accidens, le sens fournit à l’entendement des substances Ideales, tout de mesme qu’en voyant dans vn Miroir la forme accidentale des choses existentes, l’on en considere l’essence. Par la Boule, Que comme en sa figure ronde, elle ne peut souffrir de contrarieté de mouuement, la Science n’en souffre non plus, en matiere d’opinions. ”

“ Quelque passion qui les entraine apres ces vains & ridicules amusements, elle n’est iamais si forte que le Temps n’en vienne à bout, & qu’il n’en voye la fin aussi bien que le commencement. Mais l’experience monstre tous les iours qu’il ne peut destruire l’Amour dont nous parlons, non pas mesme par la mort, puis que c’est par elle que ceux qui se sacrifient pour la Patrie s’ouurent vn chemin à l’immortalité : Ce n’est donc pas sans sujet que pour la seruir au prix de leur sang, tant de grands courages en cherchent si passionnément les occasions dans les Pays estrangers. ”

“ La Theorie, qui est vn mot Grec, signifie quelque deduction que ce soit de l’humaine Raison, fondée sur le sujet des choses selon leurs ordres, & sur la connoissance des principes, qui toutefois ne dependent pas du sens, mais bien de l’entendement : Car ceux qui dependent du sens font la Practique : Or est-il que cette derniere est opposée à la Theorie à l’esgard des principes, qui ont tous pour but l’Art d’operer comme il faut, c’est à dire auecque mesure & iustesse, ainsi que le tesmoigne Aristote au commencement de sa Metaphysique. ”

“ Et d’autant qu’il y a certaines choses, où l’Art ne trauaille pas tant à imiter la Nature en ses productions, qu’à suppleer à ses deffauts, comme il se void en l’Agriculture ; C’est à raison de cela qu’on peint cette Femme appuyée contre vn pieu planté dans la terre, pource que le pieu qui est droit, fait que l’arbrisseau tortu & encore tendre, se redresse par la force de l’Art, à mesure qu’il prend accroissement. ”

“ Mais quant à la faineantise, c’est vne contagion fatale à l’humaine nature, de qui elle est mortelle ennemie : car estant certain que l’Action & la Contemplation sont naturelles à l’homme, c’est asseurément contre sa nature, quand il aduient qu’il ne s’adonne ny à l’vn ni à l’autre. Ainsi d’autant plus que sont odieuses & detestables les choses contre nature, d’autant plus aussi doit estre fuye l’oisiueté plustost que le vice, pource qu’elle destruit entierement la raison, le sens, la generosité, la courtoisie, & les autres qualitez, qui mettent l’homme est estime. ”

“ Le Sceptre qu’on luy fait tenir, signifie que l’homme chaste a tant de pouuoir sur soy, qu’encore que la chair soit mortelle ennemie de l’esprit, elle ne peut neantmoins le vaincre, s’il lui resiste.
C’est pour la mesme raison encore, que la Chasteté semble marcher icy, de la façon qu’elle est peinte ; afin de monstrer à ceux qui la cherissent, combien il leur importe de tenir l’ame en action, & de ne point s’auilir dans le vice des feineants, qui est la source de tous les maux de la vie. ”

“ C’est l’opinion d’Artemidore, Que par les mains est signifié l’Art, qui est la creature de l’Inuention ; à tout le moins les Egyptiens le demonstroient ainsi par leurs Figures Hieroglyphiques. Aussi est-il vray que tous les Arts presque sont mis en euidence par l’Industrie de la main, qu’Aristote nomme pour cét effet, l’Instrument des Instrumens.
Pour ce qui est de l’œil, il figure la Prudence, qui doit suiure l’Invention, comme les aisles qui sont au bout de son Sceptre, signifient la viuacité requise à executer heureusement. ”

“ Or comme la beauté qu’adore vn Amant, est changée par le temps, il faut que l’affection change de mesme, & que l’effet cesse, lors que la cause vient à cesser. Demosthene a fort bien dit à ce propos, que le feu dont Amour embrase le cœur, ne s’esteint pas tant par le soin qu’on y apporte, que par la nonchalance mesme, dont le temps refroidit insensiblement les plus eschaufez. ”

“ On la couronne de Laurier, Arbre tousiours verdoyant, & qui ne craint point la foudre, pour monstrer qu’elle rend les Hommes immortels, en les mettant à couuert des iniures du Temps, qui destruit ordinairement & fait oublier la pluspart des choses du monde. ”

“ Surquoy il est à propos de remarquer, Que l’humaine Loüange est de deux sortes, à sçauoir, ou vraye, ou fausse. La vraye, est celle qui se donne legitimement aux hommes vertueux ; Et la fausse, celle qui s’attribuë malicieusement aux personnes vicieuses. De la premiere doiuent estre honorez ceux qui s’en rendent capables par leurs bonnes qualitez, qui sont par exemple, l’integrité de vie, la douceur d’esprit, la franchise, la doctrine, la sagesse, & autres choses semblables ; mais principalement la crainte de Dieu, la charité enuers le prochain, & la pureté de cœur ”

“ Que s’il a le visage voilé, c’est pour faire voir, Que la cause de cét Instinct est si fort cachée, qu’on en peut donner difficilement des raisons probables, & en faire des demonstrations, comme des autres choses de la Nature. C’est pour cela qu’Aristote compare l’entendement au Soleil, & au sens de la veuë. Car comme nostre œil n’est pas assez fort, pour regarder la lumiere de ce bel astre ”

“ On la peint ieune, pource qu’elle commande aux Astres, qui ne la peuuent faire vieillir, ny luy oster l’intelligence qu’elle a des secrets de Dieu, qui sont eternels.
La Lampe allumée signifie la lumiere de l’entendement, qui par vne particuliere grace de Dieu s’allume & s’entretient dans nostre ame, sans iamais diminuer : Car c’est par nostre seule faute que l’entendement perd sa propre clarté, en se laissant offusquer par les tenebres du vice, qui ne peuuent donner lieu à la Sapience, mais enueloppent l’esprit d’erreurs & de mauuaises pensées. ”

“ Il a le visage tourné vers le Ciel qui est tout couuert de Frimas, & regarde tout à mesme temps les deux Ourses.
Son visage est viril, pour la raison que nous auons alleguée dans la Figure de l’Orient.
Il a le regard affreux, la taille forte, & le teint sanguin ; qualitez qui luy viennent du climat froid, dont les hommes ont l’esthomac meilleur que les autres, & digerent mieux les viandes : comme au contraire ceux qui naissent au Midy, ont la taille petite, & le teint noir. Outre qu’ils ne sont pas si sanguins ny si grossiers, & qui excellent en l’art de tromper. ”

“ Par la ruche de mousches à miel, la vie douce que menoient alors les creatures viuantes, & par l’oliuier, la merueilleuse tranquillité qui regnoit au monde ; d’où les seditions & les guerres estoient tout à fait bannies. Car, comme le remarque apres les Anciens le plus poly de nos Poëtes, M. de Malherbe.
La terre en tous endroits produisoit toutes choses,
Tous metaux estoient Or, toutes fleurs estoient Roses,
Tous arbres Oliuiers :
L’on n’auoit plus d’Hyuer, le iour n’auoit plus d’ombre,
Et les Perles sans nombre
Germoient dessous les Eaux au milieu des grauiers. ”