Jacques de Batencour

“ LE Maistre doit auoir non seulement les Vertus Théologales & Morales, mais il doit posseder les sciences qu’il a à enseigner en son Escole : non seulement pour s’en seruit, mais la methode facile de les enseigner à ses escoliers vtilement, comme par exemple dans les Escoles ordinaires on y doit enseigner (outre la pieté, ciuilité, bonnes mœurs) à lire, escrire, compter, jetter aux gettons & à la plume, & les principes du Latin & du Grec à ceux qui y feront propres, pour les rendre capables d’entrer en quelque bon Collège & y estre des meilleurs de leur Classe. ”

“ Outre ces images, il seroit encor bon d’auoir vne grande image, de deux pieds en quarré, en taille douce, qui se vend à Paris, qui represente le Iugement general, le Paradis, & l’enfer : laquelle sera collée aussi sur de la toille, & enchassée comme l’image du Crucifix pour estre mise sur la cheminée, & seruir souuent pour donner de la terreur aux enfans, en leur monstrant l’image de l’enfer, quand ils auront fait quelque faute comme de mentir ou dire des paroles sales & mauuaises &c. & les encourager à la vertu en leur monstrant le Paradis. ”

“ LA est vertu qui modere, tous les appetits sensitifs de l’homme, & fait voir sa difference naturelle & essentielle d’auec les bestes, Dieu luy ayant donné la raison pour cet effet. Or comme les appetits ont esté bien déreglés, par la rebellion d’Adam enuers Dien, Iesus-Christ nous a donné en nostre Baptesme la grace qu’il nous a acquise par son sang, pour moderer les mauuaises inclinations de nostre nature corrompuë. ”

“ Exemple : quand vn Maistre a entrepris d’enseigner vn Escolier, mais il y rencontre tant de peine, d’attention d’esprit, d’opposition, que cela luy fait perdre courage & l’esperance d’en venir à bout : il faut perseuerer, il doit surmonter toutes ces difficultés, & encourager son disciple, qui quelquefois à raison de la rigueur, de la colere, & fantaisies de son Maistre, se décourage & quitte tout là. ”

“ OR la Charité ayant deux faces, apres en auoir rapporté les obligations à l’esgard de Dieu, il faut specifier quelque chose à l’esgard du prochain : car il est à remarquer que Dieu nous commandant d’aimer nôtre prochain, il ne nous a point dit de l’aymer comme vn pere, comme le frere : sçachant bien qu’il y a assés de mauuais enfans & de barbares freres ; mais il a dit, tu l’aymeras comme toy mesme : car nemo carnem suam unquam odio habuit : personne ne haiț iamais sa propre chair, dit l’Apostre. ”

“ C’est la place de l’asne, les reuestir des habits de l’asne qui sont : vn vieux haillon, vn balay en main, vn vieux carton fait en forme de teste d’asne à la teste, & vn placar d’vn asne attaché au dos, auec la risée des Escoliers qui crieront à l’asne, & mesme les mener à l’entrée de l’Escole : cette punition s’applique aux paresseux, qui ne veulent rien apprendre & qui souuent ne sçauent point leurs leçons. Les cajolleurs de l’Escole on les faira mettre à genoux, ceux de l’Eglise doiuent estre foüettés sans remission, & demander pardon à Dieu à genoux & les menteurs aussi. ”

“ Cet pourquoy ils se garderont bien de faire aucune chose indecente dans les montées, dans la cour, ou dans la rue : comme de frapper, ou pousser les autres, crier, tempester, courir : mais qu’ils s’en retournent en leurs maisons tout droict, sans s’affecter, ny badiner en chemin, saluants honestement tous les honestes gens, qu’ils r’encontreront de connoissance, faisant voir par cette modestie exterieure, tant dans la rue que dans leurs maisons, le profit qu’ils font en l’Escole. ”

“ Toute repletion est mauuaise, mais particulierement celle du pain est tres dommageable à l’estomach. Ils sont de plus friands & delicats : c’est pourquoy il doit recommander aux parens de leur donner leur déjeuner pour le manger à l’Escole, & non à la maison, & du pain seul, & en suitte attendre le disner ; puis gouster à l’Escole, & non pas à la maison : en suitte souper modestement & mediocrement.
Il faut les faire ieusner quelquefois par penitence de quelque faute, leur ostant leur déjeuner pour le leur rendre apres l’Escolle. ”

“ LA Force est vne Vertu qui consiste à ne rien craindre que Dieu, & le peché : & supporter courageusement toutes les actuersités & prosperités du monde. Cette Vertu consiste à auoir les passions mortifiées, & à ne rien craindre : de telle façon qu’on ne se fafche de rien, & que l’on ne desire rien qui ne soit honeste, Cette Vertu doit estre bien familiere à vn Maistre d’Escole, qui entreprend auec la grace de Dieu, la conduite si difficile de la ieunesse, où il se rencontre tant de mescontentement, & quafi jamais de satisfaction, ny de la part des parens, ny de celle des enfans. ”

“ De plus il leur monstrera à bien seruir à la Sainte Messe ; leur disant, combien il sont indignes de faire cét office, qui appartient aux Anges & aux Clercs, & que ce n’est que par necessité qu’ils y peuuent seruir : & par consequent combien ils doiuent garder le respect & la modestie, bien faire les genuflections, adorations, inclinations & autres reuerences, se gardant bien de regarder d’vn autre costé : les aduetrissant que ceux qui seront trouués en telles fautes, ils seront chastiés de Dieu en l’autre vie tres-rigoureusement, & en l’Escole selon la grieueté de leur faute. ”

“ Que si quelqu’vn refusoit au Maitre quand il le veut corriger & qu’il demeurast obstiné ; il luy faut laisser refroidir le feu de sa colere, ne faisant pas semblant de rien : puis vne heure ou vne leçon apres, on luy doit faire entendre sa faute, & le chastier exemplairement devant tous les autres, & puis luy faire demander pardon à genoux à Dieu, au Maistre, & à tous les Escoliers qu’il a scandalizés, & en suitte, pour toutes les fautes quoy que petites qu’il fera, il le faut faire détacher & humilier, pour abaisser ce courage durant 15. ”

“ CEtte Vertu estant la Reine de toutes les autres ; aussi doit elle regner dans le cœur du Maistre par eminence. Pour ce qui regarde Dieu : il le doit aymer en qualité de Chrestien par dessus toutes les choses créées, & en qualité de Maistre, comme il doit auoir toutes les Vertus en plus grande perfection que les autres, aussi la Charité qui est la principale, doit eclater en son ame d’auantage enuers Dieu, puisque il ne doit point entreprendre cét office pour aucun respect humain ; autrement il n’y fera rien que s’y damner auec ceux qu’il conduira, mais purement & principalement pour Dieu ”

“ Pour ceux qui sont si durs & d’vn si mauuais naturel, que ne se souciant point des verges, ils ne pleurent point du tout, ou plustost il ne paroist aucune larme sortir de leurs yeux, ny durant, ny apres, ny deuant le chastiment : il faut les chastier vn peu plus fort auec des verges neuues & vertes, mais toutefois sans extremité, crainte qu’ils ne s’endurcissent aux coups, & ne deuiennent enfin incorrigibles, & mesme il faudroit rechercher tels enfans tantost par amour, tantost par crainte, les emprisonnant, les faire iensner pour les esmouuoir au bien, plustost que de les rudoyer dauantage. ”

“ IL faut considerer quels enfans on doit enseigner : car s’ils sont petits, & qu’ils ayent l’esprit dur, ils seront plus tardifs, & par consequent, il y faut plus employer de temps, leur monstrer moins de Lettres à la fois, & leur faire repeter plus souuent qu’à ceux qui auroient vn bon esprit, bonne volonté, & le iugement fait : pour ceux qui auront l’esprit dur, & seront auec cela paresseux, il faut auoir vne grande patience & industrie, pour leur faire connoistre leurs lettres. Enfin plus vn enfant a d’esprit & de iugement, plus il le faut pousser & inciter, s’il a bonne volonté ”

“ LA Religion est vne Vertu qui nous commande de rendre à Dieu le culte que nous luy deuons : le Maistre d’Escole doit auoir cette Vertu en grande recommandation ; puisque non seulement il y doit exceller en tant que Chrestien, mais l’auoir si familiere, qu’il la puisse enseigner à ses enfans, & par ses exemples & par ses paroles. Les pratiques de ce culte sont, 1. interieures, comme l’Oraison mentale, l’adoration de cœur, les aspirations, & les offrandes qu’il doit rendre à Dieu auec ferueur ”

“ LA prudence du Maistre consiste à estre exact à se contenir en son deuoir, il doit estre doux & graue aux enfans, non comme vne mauuaise mere les gastant en les flattant ; mais comme vn pere raisonnable se gardant bien de familiariser auec ses escoliers, qui le puisse faire mespriser : s’abstenant sur toutes choses de les baisotter, mignarder ou faire autres choses semblables, & ce pour plusieurs bonnes raisons : il doit auoir la patience pour supporter leurs deffauts, la prudence de les conduire & la methode pour les instruire vtilement. ”

“ Car c’est beaucoup dans ce siècle d’orgueil, de présomption, & d’hypocrisie où nous sommes, à vn homme de bien & à vn bon Ecclésiastique (qui d’ailleurs peut auoir des employs plus releués) de se présenter à vouloir faire les petites Escoles. C’est pourquoy taschant de s’instruire de la bonne methode pour en venir à bout, il peut sans difficulté l’entreprendre : & auec l’ayde de Dieu sans doute il y reüssira, Deus superbis resistit : humilibus ausem dat gratiam. Dieu resiste aux superbes, il donne grace aux humbles. ”

“ Enfin vn bon moyen encor de faire pratiquer cette vertu, c’est de faire en forte que quelque bon escolier qui aura bonne place, la cede à vn paresseux par amitié fraternelle pour l’exciter à bien faire. ”

“ CE qui seruira beaucoup à la conduite des enfans, c’est que la prudence du Maistre doit se monstrer à bien reconnoistre leur naturel : à quoy seruiront les conferences qu’il aura auec leurs parens, quand ils seront presents, comme nous dirons cy-apres : à cét effect il obseruera soigneusement les nouueaux receus à l’Escole pour reconnoistre quel est leur naturel, s’ils sont d’humeur douce & tranquille : ce qu’il reconnoistra à la première correction, qu’il leur fera : s’ils s’humilient & apprehendent le foüer, ou ferule &c. ”

“ Il prendra garde à ceux qui mettent leurs mains dans leurs chausses, car il y en a qui commettent quelquefois des impuretés à l’Escole, ou en la compagnie des autres, ce qu’arriuant il doit examiner le fait en particulier & en cas que le coupable l’aduouë, il luy imposera vne penitence secrette, l’enuoyra à confesse, & le recommandera au Confesseur, taschant de voir la source de son peché, pour le retirer des occasions qui l’y ont porté, & le messe en la voye de salut ; l’enuoyant à confesse de temps en temps & ce à vn mesme Confesseur. ”

“ IL doit se mettre & conseruer en grand credit non seulement parmi ses enfans, mais encore estre estimé des parens : de sorte que ce qu’il aura dit ou fait, puisse estre de tel poids, qu’il ne puisse estre reuoqué en doute qu’il n’a eu raison de dire, ou de faire ainsi : ce qui luy doit donner vne grande prudence & discretion en toutes ses paroles & actions, notamment quand il a à conuerser & conferer auec les parens, & à enseigner ses enfans. ”

“ S’il y a chose d’importance au regime du Christianisme (comme nous auons monstré en la preface de cét œuure) c’est le bon gouvernement des petites Escoles : il faut vn grand courage pour s’ingerer & faire son dévoir en cette charge, non pas à l’estourdy comme beaucoup font ; mais auec l’intention & les talents necessaires & requis pour s’acquitter dignement d’vn employ si saint & si vtile, & qui est d’ailleurs si difficile, si rauallé, & si mesprisé de la plus grande partie du monde, mais neantmoins fort releué deuant Dieu, & les gens de bien. ”

“ LE premier acte de Prudence que le Maistre doit exercer, c’est de voir s’il a les vertus & qualités necessaires auant que d’entreprendre cét office ; (ie sçay bien que l’on ne peut pas estre parfait tout d’vn coup) mais il doit voir s’il y a de la disposition, s’il y est appellé de Dieu, laquelle vocation doit estre reconnuë par l’aptitude, affection & zele à vn office qui est reputé si bas parmy le monde, il doit prendre conseil sur cela de personnes prudentes, pieuses & doctes ”

“ Ce n’est pas pourtant que cette regle soit absolument necessaire & generalle, car quand on voit de bons escoliers, on peut quelquefois leur tesmoigner quelque petite bien-veillance de la veuë ou de parolle, d’amitié pour les encourager dauantage à bien faire, en particulier & rarement en public, de peur de ialousie, & notamment aux plus petits pour les attirer doucement. ”

“ Non seulement il doit instruire le enfans à la vertu, mai encor toutes ses actions doiuent tellement estre compassées, qu’il soit comme vn miroir dans lequel les petits enfans se regardent, comme en vn liure viuant, où ils voyent l’exemple de ce qu’ils doiuent faire, pour estre bons Chrestiens. L’on compare ordinairement la façon d’enseigner à vn liure qui est bien long à escrire, si on veut l’auoir à la main, mai qui estant composée en vne planche d’imprimerie, on en tire tant de copies que l’on veut, & ce en vn moment. ”

“ IL entretiendra de cette verru fouuent les escohiers, leur enseignant de ne s’accuser iamais l’un l’autre, s’ils n’en ont la charge ; de n’auoir aucune eruie, saloufie haine, mauuaise volonté l’un contre l’autre : mefme s’il apperceuoit quelques escoliers se hair, il tafchera auec adresse, soit en particulier ou en public de leur faire vuider leurs petits diffèrents & les reconcilier ensemble, les faisane embrasser l’un l’autre & demander pardon à Dieu, leur monstrant combien ce vice est dangereux, & qu’il conduit en enfer la pluspart des Chrestiens, qui le gardent en leur cœur ”

“ Cette enqueste sera dautant plus executée, que les personnes seront inconnuës ; & c’est le meilleur de ne point receuoir aucun enfant de dehors la Paroisse, s’ils ne sont addressés, ou recommandés de la part de quelque personne de connoissance : par ce que on ne sçait quelquefois à qui l’on a affaire, dans les occasions qui arriuent de traitter auec les parens des enfans. Pour ceux de la Paroisse, on les peut connoistre facilement, & en cas qu’ils mettent leurs enfans à la prudence, & discretion du Maistre, ils doiuent estre receus facilement ; notamment les pauures, quand il y aura place. ”

“ LEs nouueaux seront plus doucement chastiés au commencement, afin de reconnoistre plus facilement leur naturel : principalement s’ils sont durs ou tendres au chastiment ; afin que s’il s’apperçoit qu’ils soient durs au foüet, il les punisse vne autre fois d’vne autre peine, qui les puisse détourner du vice & porter à la Vertu, & à la diligence. ”

“ IL y aura vne petite clochette attachée au plancher, grosse comme vn œuf, que l’on sonnera pour aduertir les Escoliers, tant pour les Prieres que pour le Catechisme, sortie & entrée &c. & mesme pourra seruir pour monstrer la façon de sonner quand on sert à la Messe, l’éleuation de la Sainte Hostie : quand le Maistre en fera l’exercice. Il y aura vne eau benistier à la porte, dans lequel vn chacun prendra de l’eau beniste auec respect, en entrant & sortant de l’Escole. ”

“ APRES auoir parlé d’vn Maistre d’Escole, & remarqué les talents & vertus qu’il doit auoir, il faut maintenant parler d’vn lieu pour faire l’Escole. Ce lieu doit estre le plus à l’escart du voisinage que l’on pourra, non point sur la rue, mais plustost sur vn derrière, neantmoins le plus proche de l’Eglise Paroissiale qu’il fera possible, afin que les enfans puissent estre conduits plus facilement au seruice diuin, & Paroissial aux Festes & Dimanches, comme nous dirons cy-apres, dans la seconde partie de ce liure, parlant de la Pieté Chrestienne. ”

“ Apres les tesmoignages de l’Espoux Sacré, suiuront les Saintes practiques de sa chaste Espouse l’Eglise, qui non contente de faire renaistre les enfans dans les Saints fonts du Baptesme, craignant trop l’abandon ordinaire qu’en font leurs parens, elle leur pouruoit de parein & mareine pour les instruire des Mysteres de la Foy, esperer en Dieu, & l’aymer en faisant ses Conmandements auec le bon vsage des Sacrements, & sur tout pour leur donner la pratique des vertus morales & Chrestiennes, en satisfaisant aux renonciations qu’ils ont fait au Baptesme, au Diable, à ses pompes & à ses œuures ”