Nicolas de Troyes

“ Oh ! si j'estoys maintenant homme et j'eusse si grant congnoissance avec toy, que je prendroye de plaisir. Par Dieu tu fais peché en ne donner part de telles graces à tous ceux qui t'ayment, car Dieu ne les a pas données pour les laisser passer ainsi en vain, ni ta belle juventude ainsi entre les draps. Garde que ne soyes avaricieuse de ce que peu couste. Ne fais point tresor de ta beauté, puisqu'elle est de sa nature, tant communicable comme l'argent. Ne ressemble pas au chien du jardinier, lequel ne mange les choux ne pareillement les veult lesser manger aux autres. ”

“ « Quoy que tu fasses, pense à la fin. » Si pensa en luy-même : Si je luy coppe le cou, je suis perdu à tout jamais, car ceulx mêmes qui me le font faire me tueront, ou me feront morir. D'aultre part, disoit il en luy même, j'ay fait marché à eulx, j'ai prins leur argent, je ne scay que je feray. Et en ce pensement, après qu'il luy eut mouillé la barbe, print le rasouoir pour la faire, mais la main luy trembloit si très-fort que il ne luy eust sçu faire la barbe, dont le seigneur se apperçut l'empoigna par le poing, luy-disant : — Qu'est-ce là, barbier? vous tremblez ! ”

“ Voire ! mais qu'y a-t-il ? dit-il. – C'est, dit l'une, nostre asne qui s'est mis en ung blé et en a mangé son saoul et les sergens l'ont mis en prison, et nous couste plus de quinze sols à retirer. Et voilà que nous avons gaigné en l'asne, et qui nous a fait tant demorer. – Ah dea ! dit l'ung des maris, il n'y a point de remède. Si la fortune est advenue, il la fault prendre en patience. – Voire ! mais, dit l'autre, nous avons beaucoup despendu pour l'amour de ce vilain asne. – Or, sus ! sus ! dit l'ung, cela
est fait, nous n'en laisserons point de soupper. ”

“ L'oeuvre de Nicolas de Troyes n'offre pas moins d'importance pour l'histoire littéraire qu'au point de vue de la langue. On sait que les conteurs de tous les temps ont cherché à lier leurs récits entre eux et à donner à leurs oeuvres l'unité qui leur manque par une fiction, qui consiste le plus ordinairement à rendre les différents personnages d'une même réunion tour à tour auditeurs et narrateurs. ”

“ Et pour vous avertir, dès son jeune age, c'estoit la plus forte putain et paillarde que l'on eust sceu trouver, abandonnée à tout le monde ; qui en vouloit l'avoit, tellement que chascun la congnoissoit et ne pensez point que en la ville, n'y en y eust plus de trente mille, qui l'avoint labourée. Si elle alloit entre cent femmes, et quelqu'un lui disoit vielle putain, sans nulle honte tournoit la teste, et respondoit allegrement. Aux banquets, aux festes, aux nopces, aux confrairies, en toutes bonnes compaignies, on passoit le temps avec elle. ”

“ Après plusieurs paroles dictes entre elles deux, luy va commencer à dire ainsi : M'ayst Dieu ! madame, je suis bien marrie que vostre mary ne vous est d'aussy bonne sorte que vous luy estes ; ce seroit ung gros plaisir pour vous et pour luy.
– Comment ! dit la dame, mon mary ! Il n'y a homme au monde qui ayme mieulx sa femme qu'il fait moy, et le croy ainsi.
– Hélas ! ma mye, dit la vielle, vous ne sçavez pas tout, car je vous promets, par ma foy, qu'il fait semblant de vous aymer ; mais il en ayme bien une autre que vous, qui est belle, jeune, gentille et gorgiase, car je la congnois bien. ”

“ Lors luy respondit qu'il n'avoit que faire de biens et qu'il en avoit assez ; mais s'il se vouloit donner à luy, qu'il estoit content. – Comment, donner, dit le compaignon, et qui es tu ? – Je suis, dit-il, ung diable ; mais n'aye point de paour, je te promets que je ne te feray point de mal. Escoute moy ung peu, je te feray espouser ceste fille, et du jour que tu l'aras espousée, dix ans après justement, tu seras à moy, moyennant que si tu me monstres, au bout des dix ans, une beste que je ne puisse congnoistre, tu t'en iras franc et quitte et ne te demanderai jamais rien. ”

“ N'as tu point de consideration en toy que tout cela que on luy baille n'est point pour l'amour de toy. Car tout premierement tu ne vaux rien, tu es lasche et meschant, tu es yvrogne, tu es larron et mal disant de tout le monde, tu es luterien, tu ne t'en peux excuser aux paroles que t'ay ouy dire et que tu sçay. Tu es sacrilege, car tout tant que tu peux prendre à l'esglise et ailleurs tu le prens, chandelles, torches et autres choses ; tu mets tout à ton proffit. Tu ne considere point que tout le bien que l'on te fait, que ce n'est point pour l'amour de toy, mais de ta femme. ”

“ Alors vient Celestine et trouva Alison en la maison, laquelle ne cognoissoit point, mais par vives raisons luy fit entendre qu'elle la congnoissoit. – Oh ! Alison, ma mye, que je plains ton mal, veu que j'ay congneu ton père et ta mère, qui sont tous venus de bonne maison et tu es icy comme une pauvre chamberiere et ne sçays que tu gaignes. Tu sers tous jours les dames et ne jouys point de tes plaisirs en façon du monde. ”

“ Ainsi m'ayde Dieu, mon enfant, dit Celestine, tu fais bien, car ton mary est bon Celestin et congnoye bien à ceste heure que tu es large et habandonnée. – Alors dit Elicia, la dame par amours de Joachin : Mère Celestine, je vous promets que je veux estre bonne femme. – Bonne femme, dit Celestine ! une bonne femme est plus forte à trouver que deux fenix ; sçay tu bien que c'est d'une bonne femme ? C'est une femme qui ayme bien son mary et qui aymeroit mieux morir que de luy faulcer la foy et elle ne sçayt que savent faire les autres hommes. C'est une bonne femme celle là. ”

“ D'une seule goutiere te maintiens tu, il ne te demorera pas grandes viandes. Je ne veux pas attendre tes reliez, jamais ung seul me pleut, jamais en ung mis toute mon affecion, plus de pouvoir ont deux, et plus quatre et plus donnent et plus tiennent, en y a plus que choisir ; il n'y a chose, ma fille, plus perdue que le raton qui ne sçait qu'un pertuys, car si on luy estouppe il ne sçara où se cacher du chat ; qui n'a qu'un oeil, regarde en quel gran dangier il va ; une ame seulle ne chante ne pleure ; un seul acte ne fait pas habit. Peu de foys rencontreras par la rue ung moine seul. ”

“ Et la dame dit : Je ne puis riens avoir de mon mary, mais il fait que fol s'il me hayt. Par Dieu, Jehanne, ma mye, j'ayme tant celuy que vous sçavez, que jamais mon coeur ne se donneroit à autre. Et la chamberiere luy dit : C'est folye de mettre son coeur en homme du monde, car ils ne font compte de pouvres femmes quant ils en sont seigneurs, tant sont traistres. – Ouy bien, dit la dame, d'aucuns en y a, car j'en congnois qui aymeroint mieulx estre morts que de fayre trayson à leur amye. – Or laissons ce propos, dit Jehanne et me laissez faire et vous arez robbe et chapperon. ”

“ Ung d'eulx regarda par ung pertuys de l'huys, car il avoit fermé l'huys, et veit qu'il mangeoit très-bien à bon escient, et le monstrèrent au curé. A ce dit le curé : Je vous promets que ce n'est point ung diable, car ung diable ne mangeroit point. Si ouvre l'huys et dit : Je te conjure de par Dieu le tout puissant, si tu es ung esprit, que tu parles à moy. Se tu es mauvais, se t'en vas sans faire mal à personne du monde. Et à la vérité dire, le curé en estoit tout effroyé. Lors il parla et luy dit : Hé dea ! ”

“ Vrayement, dit la femme, vous avez bien gaingné ! De dix ans, vous ne gaingnerez la perte que vous avez faite anuict. Que le grant diable vous casse le cou ! – Hé dea ! dit le bonhomme, et que avons nous perdu, mamye ? – Nostre vache est perdue, que la belle mort vous puisse saisir le bec ! Vous aviez bien affaire d'aller là yvrogner et faire la perte que nous avons – Comment ! dit le bonhomme, nostre vache est per due ? Ah ! par ma foi, je l'ay vendue à la foire,
et me cuydoys bien doubter que c'estoit la nostre, mais je ne sçavois que dire, parce que je cuydoys l'avoir laissée en la maison. ”

“ Il est tant avaricieux que il en brusle tout et ne luy chault dont il vienne mais qu'il en ait. Mais mère tu dois sçavoir que j'ay quelque peu de reconfort, car il ne se soucie point où je voise, mais que je apporte argent. Et si d'avanture je demeure trop en quelqu'une de mes affaires, je luy diray j'ay esté en telle part ou en telle, j'ay taillé quelque chemise ou taillé quelque ciel ou rideaulx, coyfe d'homme ou de femme ou autre chose, j'ay gaingné cecy ou cela, je luy baille l'argent et il se contente. – Hé ! encore n'est il pas des pires, dit Celestine. ”

“ Ainsi m'aist Dieu, dit Pasquiere, il faut avoir les yeux vigilent et par tout, le cueur par tout, à tous rire et faire bonne chère, à tous bailler bonne response doulce et aymable et de ce que Dieu m'a donné faire service aux gens de bien, je n'en refuseray jamais ung : et principalement s'ils viennent de loin, leur feray bonne chere, et puis mère vous savez que c'est la mode de France quant quelqu'homme de bien vient de loin ou de près de l'aller baiser, sans penser en nul mal, et le mal que j'y pense me puisse advenir et puis que mon mary le veult bien et moy aussi. ”

“ Alors, dit Alison : Voire, mère, et il n'y a homme qui me veuille, donne moy quelque remede pour mon mal et tu feras mieulx que de te mocquer de moy. Lors, dit Celestine : De ceste commune douleur toutes sont maitresses, ce que j'ay veu faire à plusieurs et ce qui à moy m'a toujours proffité, je diray. Car comme les qualités des personnes sont diverses, ainsi les medecines font diverses operations et differentes. Toute odeur forte est bonne, comme pouliot,
rue, encens, reçeue avec grande diligence, approufite et amitique la douleur et tourne peu à peu la mère en son lieu. ”

“ D'une maquerelle appellée Celestine, des filles qu'elle vendoit, puis les refaisoit pucelles, des amours de deux compaignons et des grant finesses que font les femmes à d'aucuns amoureux qu'elles ont, avec plusieurs autres matières bonnes et proffittables pour apprendre du bien et du mal. ”

“ Le jeune compaignon respondit à son père, qu'il estoit bien content de l'avoir avec d'autres. – Comment, dit son père, en veux-tu avoir plus d'une ? – Ma foi, dit-il, mon père il m'en fault bien deux ou trois pour le moins. – Ah ! vrayement, respont le père, tu en aras assez d'une, il n'y a si homme de bien qui ne s'en contente. – Ma foy, dit le fils à son père, je ne seray ja marié, si je n'en ay deux pour le moins. – Or bien, dit le père, tu prendras ceste cy à ceste heure ; et dit que dedans ung quinze jours d'icy, il luy en trouveroit une autre. ”

“ On ne peut admettre que ce soit pour l'usage des ouvriers selliers, ses compagnons, ou des petits bourgeois, ses voisins, que Nicolas de Troyes a pris cette peine; plus d'une, parmi ses nouvelles, dénote une certaine culture intellectuelle, l'habitude d'un milieu plus éclairé que celui que pouvaient lui fournir les gens de sa condition. ”

“ Monseigneur, dist la dame, vous sçavez bien que vous devez. – Voire ! mais, dit-il, le beau père n'a point d'argent, mais si vous me voulez croire, il ne payera rien. – Saint Jehan ! dit l'hotesse, je ne l'entens pas, car il faut que chacun paye. – Si dit le gentilhomme au marchant : Scavez vous que nous ferons, si me voulez croire ? Nous trois ferons chacun ung souhait et celui qui mieulx souhaytera au dit de l'hôtesse ne payera rien et s'en ira franc et quitte, et l'hôtesse même en jugera. ”

“ A ce respondit Joachin : Hé que as tu ma mye Elicia, de quoy te plains tu ? – Helas, dit elle, il y a trois jours que tu ne m'as veu, jamais Dieu ne te voie et ne te doint consolation ! Bien est malheureuse celle qui en toy se fie et y met toute l'esperance et fin de sa felicité. – Si luy dit Joachin, tais toy, ma mye, pense tu que la distance du lieu aye pouvoir de separer l'amour cordiale et le feu qui est en mon cueur. Là où je vois tu viens, et es avec moy, ne te afflige point ne me moleste, ne me donne autre tourment que celluy
que j'ay souffert pour toy. ”