Philippe de Commynes

“ Vous pouvez bien entendre qu'en grand travail d'esprit estoit le Roy, et aussi ledit connestable : car il ne passoit un seul jour pour une espace de temps, qu'il n'allast gens de l'un à l'autre, sur le fait de ce serment. Et qui bien y penseroit, c'est miserable vie que la nostre, de tant prendre de peine et de travail pour s'abreger la vie, en disant et escrivant tant de choses, presque opposites à leurs pensées. Et si ces deux, dont je parle, estoient en grand travail, le roy d'Angleterre et le duc de Bourgogne n'en avoient pas moins de leur part. ”

“ Mais toute la guerre de mer est conduite par leurs gentils-hommes, en chefs et capitaines de gallées et naves, et par autres leurs subjets. Mais un autre bien ont-ils, en lieu d'aller en personne aux armées par terre, c'est qu'il ne s'y fait nul homme de tel cœur, ni de telle vertu, pour avoir seigneurie, comme ils avoient à Rome ; et par ce n'ont-ils nulles questions civiles en la cité, qui est la plus grande prudence que je leur voie. ”

“ Je ne puis penser comment Dieu a tant preservé cette ville de Gand, dont tant de maux sont advenus, et qui est de si peu d'utilité pour le pays, et chose publique dudit pays, où elle est assise, beaucoup moins pour le prince, et n'est pas comme Bruges, qui est un lieu de grand recueil de marchandise, et de grande assemblée de nations estranges : où par avanture, se depesche plus de marchandise, qu'en nulle autre ville d'Europe : et seroit dommage irréparable qu'elle fust destruite. ”

“ Et ne demeura guère que le bon chevalier fina ses jours, qui fut moult grand dommage, car pour le temps qu'il régna au monde, pareil de lui on n'eût sçu ni pu trouver en nulle terre plus parfait, plus preux, plus vaillant .ni plus hardi chevalier. Et quant est à parler de ses vertus, il n'est langue humaine, tant soit facondieuse, qui au long les sçût décrire. Il fut chevalier doux, humble, amiable et courtois , large aumônier et pitoyable. Tout son temps aida les pauvres veuves et orphelins. ”

“ De prime face, pour les pugnitions de Dieu ne sont point corrigez, de telle grandeur qu'elles soient, en traict de temps; mais nulle n'en advient à ung prince ou à ceulx qui ont gouvernement sur ses affaires, ou sur ceulx qui gouvernent une grant communauté, que l'yssue n'en soit bien grande et bien dangereuse pour ses subjectz. Je n'appelle point de leurs malles fortunes dont les subjectz se sentent, comme de tomber jus d'ung cheval et se rompre une jambe, avoir une fiebvre bien aspre et puis s'en guerir; mais leur est propice, et en sont plus saiges. ”

“ Je ne dis ces choses principalement que pour donner à entendre comme les choses de ce monde se sont conduites, ou pour s'en aider, ou pour s'en garder, ainsi qu'il pourra servir à ceux qui ont ces grandes choses en main, et qui verront ces Mémoires; car combien que leur sens soit grand, un peu d'advertissement sert aucunesfois. ”

“ Finalement me semble que, à tout considérer, ils n'ont guères d'avantage en ce monde plus que les autres, s'ils veulent bien voir et entendre par eux ce qu'ils voyent advenir à leurs voysins, et avoir crainte que le semblable ne leur advienne ; car quant à eux, ils chastient les hommes qui vivent soubs eux, et à leur plaisir, et Nostre-Seigneur dispose d'eux à son vouloir ; car autre n'ont-ils par-dessus eux. Et est le païs ou royaume bien-heureux, quand il y a roy ou seigneur sage, et qui craint Dieu et ses commandemens. ”

“ OR voyez-vous la mort de tant de grands hommes, en si peu de temps, qui tant ont travaillé pour s'accroistre, et pour avoir gloire, et tant en ont souffert de passions et de peines, et abregé leur vie : et par aventure leurs ames en pourront souffrir. ”

“ Ainsi a bien à faire un prince d'estre bien sage, quand il va en pays estrange pour accorder toutes ces choses ; et si un prince n'est doué de cette vertu, qui "sur toutes les autres vient de la grace de Dieu seulement, quelqu'autre bien qu'il ait en luy, à peine en pourra il venir au dessus, et s'il vit age d'homme, il aura de grands troubles et affaires, et tous ceux qui vivront soubs luy, par especial quand il viendra sur la vieillesse, et que ses hommes et serviteurs n'y auront nulle esperance d'amendement. ”

“ Monseigneur le prince, jà à Dieu ne plaise que je sois cause, ni fasse chose parquoi l'amour et l'alliance qui est entre vous et mon très redouté et souverain seigneur soit en rien enfreinte ni amoindrie ; car mieux aimerois de non avoir été né : mais vous sçavez que tant que l'homme est en sa vigueur, tant doit-il quérir pour soi élever en honneur et acquérir bonne renommée : toutes choses mondaines lui doivent être possibles à faire et achever de tout son pouvoir, afin de toujours soi élever et exhausser, et aussi que la maison d'où il est issu en soit plus recommandée en tout honneur. ”

“ Je responds à cela que l'information sera la plainte et clameurs du peuple qu'ils foulent et oppressent en tant de manieres, sans en avoir compassion ne pitié: les douloureuses lamentations de veufves et orphelins, dont ils auront fait mourir les maris et peres, dont ont souffert ceux qui demeurent après eux : et generalement tous ceux qu'ils auront persecutez, tant en leurs personnes, qu'en leurs biens. ”

“ La Seigneurie eut partie des plus riches bagues, et vingt mille ducats comptans, qu'il avoit à son banc, en la ville, et plusieurs beaux ports d'agathe, et tant de beaux camayeux bien taillés que merveilles, qu'autrefois j'avois vus, et bien trois mille médailles d'or et d'argent, bien la pesanteur de quarante livres ; et crois qu'il n'y avoit point autant de belles médailles en Italie. Ce qu'il perdit ce jour en la cité, valoit
- cent mille escus et plus. ”

“ Et si l'on dit que par là ils sçauront des nouvelles, et tiendront les deux parties en crainte, je m'accorderay assez qu'un jeune roy le fasse entre les dames ; car il en aura du passe-temps et du plaisir assez, et sçaura des nouvelles d'entre elles ; mais nourrir les partialités entre les hommes, comme princes et gens de vertus et de courage, il n'est rien plus dangereux. ”

“ Toutesfois, puisqu'il y a payement, il seroit bien facile à y mettre ordre : et que les gens-d'armes fussent payez de deux mois en deux mois pour le plus tard : et ainsi n'auroient occasion ny excuse de faire les maux qu'ils font, sous couleur de n'estre point payez : car l'argent est levé, et vient au bout de l'an : je dis cecy pour nostre royaume, qui est plus oppressé et persécuté de ce cas que nul autre royaume, ne nulle autre seigneurie que je connoisse: et ne sçauroit nul y mettre le remede qu'un sage roy : les autres pays voisins ont d'autres punitions. ”

“ Et s'il n'est vray ce que l'on m'a dit, il est à croire; et telle est la fin des princes qui veulent vivre bestialement. Et ce qui me les fait tant blasmer, c'est la grande charge et grand office que Dieu leur a donné en ce monde. ”

“ Messire Jean de Boniface, je vois que vous portez emprise pour faire armes; parquoi j'ai pris congé de mon très redouté seigneur et prince, que vous voyez ci présent, de toucher à celle, s'il vous plaît, et de vous acomplir, à l'aide de Dieu, les armes, telles qu'en vos chapitres sont contenues; lesquelles je crois être telles que nobles hommes doivent faire , et de ce ne fais nul doute. ”

“ Si ainsi advient que, en tout honneur, vous soyez amoureux d'aucune dame ou damoiselle qui rien ne vous soit et dont vous vous pourriez acointer, gardez, sur tant que désirez de parvenir à la haute vertu de prouesse, que ce ne soit de folle amour ; car à toujours vous seroit tourné à grand'vilainie et reproche. ”

“ Fièrement marchoit le seigneur de Ternant: et d'autre part saillit Galiot, sa cotte d'armes au dos, bacinet en teste, et-la visière baissée et close : et si tost qu'il fut saisi de son batton, il se sourdit tout en air moult vigoureusement. ”

“ Puis que sur deux bessons portés d'une ventrée, Fortune se départ par diverse livrée, Dont l'un laisse périr ainsi qu'une fumée, L'autre porte en ses bras croissant en renommée, Bien devons Dieu douter de cueur et de pensée ; Car c'est cil qui départ où il veut sa soudée.
M Pour la seconde fois fut la courtine retirée, après le son des trompettes. Et pour le second travail d'Herculès, furent vous en bateau Berculèset Théséus, richement armés ; et vindrent iceux, boutans leurs navires à leurs lances, jusques auprès d'une grande montaigne où il y avoit des moutons qui pasturoyent. ”

“ Si vous sçavez faux us en vostre baronnage, N'en vos sugets régir, chacun se monstre sage De les bien tost destruire, pour échever dommage Car certes le sanglier, merveilleux et sauvage, Ne fait pas tant à craindre que le mauvais usage. ”

“ Des deux princes, il advient souvent que l'un a le personnage plus honneste et plus agréable aux gens que l'autre, dont il a gloire, et prend plaisir qu'on le loue : et ne se fait point cela sans blasiner l'autre. ”

“ Toutes fois chose contraincte est, si ne voulons offenser Dieu, le louer de nostre infortune. Je vous prie, monsieur, que de votre part regectez les causes de douleur, et que joygnez la vostre pensée à l'amour spirituelle. Au regard du corps, je ne pourrois le veoyr sans de deuil mourir. Sera honnourablement ensépulturé au plus près de vostre vouloyr, sans aulcune chose y espargner, et encores moins pour le salut de l'âme, qui doibt estre la première servie, comme celle qui doit sans fin vivre au palays de éternel repos, auquel, après bonne et longue vie, Dieu vous vueille donner lieu. ”

“ Herculès convoita iceux moutons, pour ce qu'au pais de Grèce n'en avoit nuls.
Si descendit jus de son navire, et fit reculer ledict navire par Théséus ; et vint au pié de ladicte montaigne, et sonna une grande trompe qu'il trouva là, et fit semblant de prendre lesdicts moutons. Et tantost saillit avant un géant merveilleusement grand, tenant une hache en sa main. ”

“ C'est à dire, mon fils, fuyez tristesse de pensée plus que le mal de dents; aussi fuyez paresse pour passer la douleur de votre cœur ; et faites toujours bien fuir courroux et ire, afin qu'ils ne te baillent point leur cruelle pestilence; car ce sont les voies qui font fourvoyer du droit chemin, et sont nourrices de tous schismes et divisions. Mon fils, ne portez à nul ire ni baine; mais pacifiez à chacun ; car quiconque hait son prochain il est homicide, comme dit l'évangile ”

“ Ainsi l'occasion fut bien petite, pour faire une si grande faute ; il l'eut bonne ; car Dieu luy prépara un ennemy de bien petite force, en fort jeune âge, peu expérimenté en toutes choses ; et luy fit un serviteur, dont plus se fioit pour lors, devenir faux et mauvais ; et se mit en suspicion de ses subjets et bons serviteurs. Ne sont-ce pas ici des vrais préparatifs, que Dieu faisoit
en l'ancien testament à ceux desquels il vouloit muer la fortune de bien en mal, ou de prospérité en adversité? ”

“ Chacun se reposa quelque peu, en attendant le jour, tous armés, et disposèrent les aucuns de leurs consciences ; car l'entreprise estoit bien dangereuse. Quand le jour fut clair, et que l'heure approcha, qui estoit de huit heures du matin, comme j'ay dit, que l'on devoit assaillir, fit ledit duc tirer la bombarbe et les deux coups de serpentine, pour advertir ceux de l'avant-garde, qui estoient à l'autre part bien loin de nous ( comme j'ay dit) par dehors; mais par dedans la ville, il n'y-avoit point grand chemin. Ils entendirent l'enseigne, et incontinent se disposèrent à l'assaut. ”

“ Mais ce bien vivre ne sert point seulement pour manger bonnes viandes, boire bons vins, dormir en bons lits longues matinées et vivre en toutes délices ; mais s'entend vivre bien, premièrement avec Dieu, soi maintenir honnêtement, véritablement et joyeusement. ”

“ Or advint, durant le temps que Jacquet de Lalain tenoit son pas, que le roi et le seigneur de là Varenne arrivèrent sur les rangs ; demenants grand bruit et si grand frainte de trompettes, qu'il sembloit que terre et ciel dussent combattre ensemble; non point qu'ils voulsissent joûter à celui qui tenoit le pas, mais par une joyeuseté qui les mut à ce faire. ”

“ Audit duc de Lorraine prit bien de ce qu'on s'ennuyoit de luy en nostre cour; et crois bien qu'il ne sçut jamais la vérité ; mais quand un grand homme a tout perdu le sien, il ennuye le plus souvent à ceux qui le soutiennent. Le roy luy avoit donné un petit d'argent, et le fil conduire avec bon nombre de gens-d'armes au travers du païs de Lorraine ; lesquels le mirent en Alemagne, et puis retournèrent. Ledit seigneur de Lorraine n'avoit pas seulement perdu son païs de Lorraine, mais la comté de Yaudemont, et la pluspart de Barrois ; car le demourant le roy le tenoit. ”

“ Toutesfois le tout n'y fit riens; et falloit qu'il passast par-là où les autres sont passés. Une grace luy fit Dieu; car comme il l'avoit créé plus sage, plus libéral, et plus vertueux en toutes choses que les princes qui régnoient avec luy, et de son temps, et qui estoient ses ennemys et voisins, avec ce qu'il les passa en toutes choses, aussi les passa-t-il en longueur de vie ; mais ce ne fut de guères ; car le duc de Bourgongne Charles, la duchesse sa fille , le roy Edouard , et le duc Galéas de Milan , le roy Jean d'Aragon , tous ceux - là estoient morts peu d'années paravant luy. ”

“ Le peuple estoit grand sur le marché, et estoit conduit par un nommé Nicolas Du Gardin, qui se tenoit, en une garne, à l'hostel de la vile, à tout un grand batton: et s'il voyoit que le peuple se dérivast ou muast en rien, il féroit de son batton, et crioit : Guare le ban ! Et sur ce mot chacun se tenoit quoy, et doutoit la punition de justice : et à la vérité
tout le peuple et ceux de la vile estoyent pour Mahuot en courage, pour ce qu'il combatoit pour la querelle de la vile. ”

“ Le mareschal du logis se souloit appeller l'escuyer du logis, et ne se mettoit iceluy estât sus qu'en la guerre seulement; mais pource que le duo va tous jours en armes, et que sa maison est si grandement accompaignée, comme l'on peut veoir, il est ordonné qu'il seroit un mareschal du logis de l'hostel, et est un moult bel office et estât. En l'hostel du duc il y a quatre archers comptés, et une trompette par les escroues, qui accompaignent le mareschal où qu'il voye; et quand il doit partir pour aller faire un logis de ville en ville, il faut sonner sa trompette ”

“ Donc, par ainsi je dis que tous vrais amoureux, pour acquérir la très désirée grâce de leurs très belles dames, doivent fuir de tout leur pouvoir ce péché d'ire très déplaisant à Dieu et au monde, et s'accompagner de cette très amoureuse vertu de patience. ”