Anonyme

“ La pyramide estoit composee en forme de perron, contenant mille quatre cens & dix degrez, dont les dix derniers estoient conuertiz en vn merueilleux cube ou pierre quarrée massiue, faisant la diminution & estrecissement de la pyramide, tel & si grãd qu’il estoit impossible de croire que mains d'hõmes l’eussent peu asseoir si hault, faict de celle mesme pierre de marbre dont estoient les degrez, & la mis pour base & fondement de l’obelisque duquel ie parleray cy apres. ”

“ Le sentier entaillé dedans la gueule, conduisoit droict a vne viz & montée ronde estãt au mylieu de l’œuure, par laquelle on montoit en tournant dessus le hault de la pyramide, iusques au plant du cube sur lequel l’obelisque estoit assis. Mais ce que i’estimay le plus excellent, est que ceste montée estoit par tout claire, pource que l’ingenieux architecte auoit par inuẽtion singuliere faict en plusieurs endroictz de l’edisice, aucuns secretz conduictz qui respondoiẽt droittement a l’aspect du soleil ainsi qu’il saisoit son cours contre les trois parties, haulte, basse, & moienne d’iceluy. ”

“ Le demy diametre du pied de la colõne faisoit la haulteur de la base, qui consistoit en bozel, contrebozel, & plinthe, formee en ceste maniere : Diuisant la haulteur de la base en trois parties, on dõnoit l’vne au plinthe, qui auoit en largeur vn diametre & demy du pied de la colõne. Les deux parties qui restoient, estoient diuisees en quatre, l’vne en auoit le bozel d’en-hault, les trois autres diuisees en deux, l’vne pour le bozel d’embas, & l’autre pour le contrebozel. Les filetz auoient chacun vne septieme partie du tout. ”

“ En la premiere face du plinthe sur lequel la pyramide estoict fondée, estoict entaillée vne cruele bataille de Geans, ausquelz ne defailloit sinon la vie, car ilz estoient si excellemment figurez auec le mouuement & grande promptitude de leurs corps enormes, qu’il est impossible le pouoir declairer : car la nature y estoit si bien ensuiuie & contrefaicte, & ses effectz si propremẽt exprimez, qu’il sembloit que leurs piedz s’efforcassent auec les yeulx, & qu’ilz courussent ca & la. Il y auoit des cheuaux rẽuersez en cuidãt ruer, d’autres mortz & blecez. ”

“ Ie ne pense pas que iamais ait esté vn tel obelisque : certes celluy du Vatican a Rome, n’est point pareil, ny celluy d’Alexandrie, ny mesmes ceulx de Babylone. Il auoit en soy si grand comble de merueille, que i’estoie rauy d’esbahissemẽt en le contemplant, & encores plus pour sa grandeur inestimable, car ie ne pouoie penser ny comprendre, comment, par quelle inuẽtion, auec quelz organes, grues, & cabres, vn si grand poix & fardeau auoit esté leué si hault. ”

“ La ligne dõc de AB, est le vray lieu de l’architraue. Et le point du mylieu de la ligne trauersante marqué par L (comme dict est) sera le centre pour flechir & courber la voulture de la porte en demyrond, a laquelle doit estre adiouxté le demy diametre depuis le point R, iusques au premier demycercle, & cela fera iustement son espoisseur. Mais s’il se fait par autre voye, ie ne l’estime point perfect.
Ceste mesure fut inuentée par les ouuvriers antiques bien expertz en massonnerie, & obseruée en leurs arcs & voultures, pour leur donner grace & resistence. ”

“ Mais comme ie la cuidoie approcher de ma bouche pour assouuir ma soif ardãte, i’ouy vn chãt si fort melodieux, qu’il excede le pouoir & le scauoir de le declarer : car la suauité de ceste harmonie me donna beaucoup plus de delectation que le boire qui m’estoit apresté, si bien que i’en perdy sens, soif, & entendement : & comme si i’eusse esté enlourdy, l’eau que i’auoie ia puisée, se respandit par l’entredeux de mes doigtz. tant me trouuay destitue de force. ”

“ De prime face ie pensay & tins pour tout certain que c’estoit ma Polia : mais la facõ de l’habit que ie n’auoie accoustumé de veoir, & la qualité du lieu ou ie me trouuoie, me persuaderent le contraire : parquoy ne luy osay faire semblant, & en demouray incertain. Elle estoit vestue d’vne robe de soye verte, tyssue auec fil d’or, representant en coleur le plumage changeãt du col d’vn Canart : & auoit per dessoubz vne chemise de toille de coton, deliee comme crespe, laquelle sembloit couurir des roses blanches & incarnates. ”

“ Il me sembla (certes) que i’estoie en vne plaine spatieuse, semée de fleurs & de verdure. le temps estoit serain & atrempé, le soleil clair, & adoulcy d’vn vent gracieux : parquoy tout y estoit merueilleusement paisible, & en silence : dont fu saisi d’vne admiration craintiue : car ie n’y apperceuoie aucun signe d’habitatiõ d’hõmes, n’y mesmes repaire de bestes : qui me feit bien haster mes pas, regardant deca & dela. ”

“ La robbe estoit ioincte & serree au corps, au dessoubz des mãmelles, faisant aucuns petitz pliz couchez aplat sur l’estomach, qu’elle auoit vn peu relué, ceincte sur les hanches larges & charnues, a tout vn cordon de fil d’or, sur lequel elle auoit retroussé la superfluite de son vestement, taillé beaucoup plus long que le corps, tant que la lisiere venoit a fleur de terre, ou deux doigtz pres, & estoit encores ceincte audessoubz de l’estomach, pour serrer ce retroussement qui sembloit enleué & bouffant a l’entour de son ventre & des flancs. ”

“ Parquoy ie demouray fantasiant, & consumãt le reste de la nuict a penser aparmoy, Si l’amour n’est iamais egal, comme est il possible d’aimer cela qui n’aime point ? & en quele maniere peult resister vne poure ame doubteuse combatue de tant d’assaultz ? attendu mesmement que la guerre est interieure, & les ennemys familiers & domestiques, auec ce qu’elle est continuellement occupée d’opinions fort variables. ”

“ Par tout y auoit passage, tant que lon pouoit clairement veoir oz, arteres, nerfz, veines, muscles, & intestins : car il estoit garny de plusieurs petites fenestres secretes, qui donnoiẽt lumiere suffisante : & n’y auoit faulte d’vne seule veine, non plus qu’en celuy d’vn homme perfaict. Quand ie fu au droict du cueur, i’apperceu le lieu ou amour forge ses souspirs, & l’endroict ou il offense le plus grieuement. A dõc iectay vne grand’plaincte, appellant Polia, si hault, que ie senty retẽtir toute celle machine : dont i’eu frayeur. ”

“ Au demourant elle auoit le nez traictif, bien pourfilé, & dessoubz vne petite vallee ioignãte a la bouche qui estoit de moyẽne grandeur. les leures vn peu releuees, & de coleur de satin cramoisi. les dentz aussi blanches qu’yuire, toutes d’vne proportion, & si proprement arrengees que l’vne ne passoit pas l'autre. Amour entre elles cõposoit vne odeur la plus soeue qu’il est possible de penser. Vous eussiez dict a la veoir de loing, que de ses leures c’estoit Coral, ses dentz perles orientales, son haleine Musc en perfum, & sa voix doulx accord de fleuttes. ”

“ Apres ce me venoit en memoire la condition miserable des amans, lesquels pour complaire a aultruy, desirent doulcement mourir : & pour satisfaire a eulx mesmes, sont contentz de viure a malaise, ne rassasians leur desir affamé, sinon d’imaginations vaines, dangereuses, & penibles. ”

“ A l’opposite de ceste porte estoit situé vn grand cours de colonnes. Et pource que ie vos ay suffisamment (comme il me semble) specifié ces mẽbres principaux. Reste maintenant a descrire ses enrichissemens : car l’Architecte doit en premier lieu conceuoir & disposer en son entendemẽt le massif de toute l’œuure, en apres penser des ornemens, qui ne sont que les accessoires du principal, consideré qu'au premier est cogneu le scauoir & l’experience de l’ouurier, mais le second est tresfacile, & commun quasi aux apprentiz. ”

“ Il auoit la bouche ouuerte de six pas de largeur, comme s’il se fust voulu plaindre. Par les cheueux de la teste on pouoit monter sur son estomach, & de là entrer en sa bouche, par le poil de sa barbe. Quãd ie fu venu iusques la, ie m’en hardy d’entrer dedãs : puis deuallant par vn petit degré, descẽdy en la gorge, apres en l’estomach, & de la par toutes les autres parties du corps, iusques dedans les boyaulx & entrailles. O merueilleux concept d’entedemẽt humain, entreprise plus qu’admirable. ”

“ Par ce mallif, i’enten le corps de l’edifice, lequel sans ornemens fait cognoissre le sauoir & l’esprit du maistre : car il est facile d’enrichir la chose apres qu’elle est inuentee. Toutesfois sur tout est a estimer la distribution, departement, & disposition des membres : dont fault conclure que c’est chose vsitee & cõmune a chascun ouurier, voire iusques aux aprentiz, de sauoir orner vn ouurage : mais inuenter, certainement gist en la teste des sauans. ”

“ Ie laissay a grand difficulté ceste belle figure, tant fort elle me plaisoit. puis retournay a regarder le grãd cheual, qui auoit la teste seiche & maigre, proportionnement petite, & tresbien formée pour resembler inconstãt. On luy veoit quasi trẽbler les muscles, & sembloit mieulx vif que feinct. En son frõt estoit graué ce mot grec GENEA. De tous ces grãs ouurages qui la gisoiẽt en mõceaux, le temps auoit seulemẽt espargné ces quatre belles & excellentes pieces, asauoir le cheual, l’elephant, le colosse, & la porte. ”

“ Cest elephãt auoit sur le hault du dos cõme vne bastiere ou couuerture de cuyure, lyee a deux sangles larges estrainctes par dessoubz, & enuirõnantes tout le ventre, entre lesquelles estoit faict comme vn pilier quarre en forme de piedestal, de mesure correspõdãte a la grosseur de l’obelisque, dressé sur le dos de la beste, pource que nulle chose de grãd’pesanteur ne doit estre assise en vain, car elle ne pourroit estre durable. ”

“ Qui feit que volũte me print de le veoir ; telement que i’entray par ceste porte : puis grimpay par les cheuilles en ce merueilleux corps tout euentré, reserué que lon auoit laissé autant de massif par dedãs, qu’il en auoit au dessoubz ꝑ dehors, pour soustenir son obelisque : & tant d’espace a chascun costé des flancs de l’elephant, qu’vn homme y pouoit passer a son aise. ”

“ Vn peu plus auant que le mylieu de ceste Plaine, y auoit vne sablonniere meslée de petites mottes verdes, & pleine d’herbe menuette, & vn petit boys de palmiers, esquelz les Egyptiẽs cueillent pain, vin, huille, vestement, & mesrain pour bastir. leurs fueilles sembloient lames d’espees, & estoiẽt chargées de fruict, il y en auoit de grandes, moiennes, & petites, & leur ont les anciens donné ce tiltre qu’elles signifient victoire, pour autant qu’elles resistent a toute charge & pesant faiz sans qu’on les puisse prosterner. ”

“ Soubz la cornice y auoit vn quarré de chacun costé autant large que sa saillie. La frize estãt pardessoubz, auoit autãt de largeur que la moytie de ce quarré, ou que la tierce partie d’vn des vingt & quatre quarrez. L’espace entre les deux quarrez, estoit diuisé en sept parties. celluy du mylieu qui respondoit a plomb sur l’ouuerture de la porte, estoit emploié en vn nid pour mettre la figure d’vne nymphe. ”

“ Ainsi ie descendy par le lieu ou i’estoie entré, & regarday ceste grande beste par dehors, pensant quele hardiesse humaine auoit esté si temeraire, d’entreprendre si haulte besongne, quelz cizeaulx, quelz outilz & serremens, auoient peu penetrer vne matiere tant dure & tant rebelle, mesmement que toutes les touches de dedans se raportoiẽt a celles de dehors. ”

“ A peine eu ie finé mon oraison bien deuotemẽt proferée, & d’vn cueur tout humilié, les yeulx pleins de larmes, croiant fermemẽt q̃ les dieux secourent & sauuent ceulx qui les inuoquent de pure volũté, que ie me trouuay hors de la forest : dont tout ainsi que si d’vne nuict froide & humide ie feusse paruenu en vn iour clair & serain, mes yeulx sortans de telle obscurité, ne pouuoient bien (pour quelque temps) souffrir la clairté du soleil. ”

“ La pluspart combatoit a pied, en confusion, & par trouppes. Assez y en auoit armez de haubertz, cuyrasses, & cabassetz, enrichiz de diuers cymiers, crestes, & deuises : les autres tous nudz, qui sembloient assaillir leurs ennemys d’un courage enflambé. maintz estoient pourtraictz en vne effigie redoubtable par l’escrier : autres en figure obstinée & furieuse, les vns prests de mourir, les autres du tout mortz, manifestans leurs mẽbres robustes, telemẽt que lon pouuoit veoir les muscles releuez, les ioinctures des oz, & les dures entorces des nerfz estenduz. ”

“ Le desir exaulceoit singulierement sa belle poictrine : a quoy les yeux s'accordoient aucunement, pourueu qu'ilz la peussent veoir plus a plein. puis attirez de la belle contenance, l’estimoient plus que tout le reste. L’appetit y contredisoit, prisant sur toutes choses sa cheuelure doree, large, espoisse, agencee par belles vndes, entortillee en facon d’anneletz. ”

“ Ie congnoissoie bien en moy-mesme que ceste dissensiõ ne pourroit cesser sans perdre le plaisir de regarder la belle Nymphe : ce qui m’estoit impossible : parquoy i’estoie ainsi qu’n homme pressé de faim se trouuãt parmy grande abondance de viandes qu’il desire toutes ensemble, mais il n’est assouuy de nulle qui se presente. ”

“ La se pouoient veoir des corps estrãges, effortz extremes, actes affectiõnez, diuerses mortz, & victoire incertaine. Helas que mes espritz lassez & trauaillez, mon entendement confuz par continuelle diuersite, & mes sens troublez de choses si merueilleuses, ne peuuent suffire ie ne dy pas a declairer le tout, mais a biẽ exprimer la moindre partie de ceste sculpture tant noble. ”

“ Ilz estoient si proprement & vraysemblablement mentiz de louurage, qu’ilz me donnerent grãd frayeur : car leurs yeulx estoiẽt faictz de pierres luisantes : en sorte que si ie n’eusse esté bien certain que la matiere estoit de marbre, ie n’en eusse osé approcher si facilement. ”

“ Elle auoit les bras longz, les mains grandes, les doigtz rondz & deliez, les ongles vermeils & luysans : ce que lon pouoit facilement contempler autrauers de sa chemise de toille claire & flocquãte a l’endroit ou les braz ioignent a l’espaule. Sa robbe estoit bordee d’vne frize de fil d’or traict, enrichie de pierrerie, & en semblable tout le tour de sa mãte : a laquelle frize pendoient en maniere de frãge plusieurs petitz fers d’or cõme de fleches barbelees. ”