Homère

“ Quand ilz devroient l’ung pour l’aultre mourir.
Et tout ainsi qu’on voit au temps d’hyver
Souventesfois la brouée arryver.
Que le froid vent soufflant par la campaigne,
Porte soubdain au hault de la montaigne,
Chose qui est aux Bergers tres nuysante,
Et aux larrons, plus que la nuyct duisante.
Car l’oeil humain ne scauroit veoir par terre
Gueres plus loing, qu’est ung seul ject de pierre. ”

“ Que la valeur de chacune montoit
Plus de cent beufz, tant bien faicte elle estoit.
Ainsy armée elle enflammoit les coeurs
Des forts Gregeois à estre belliqueurs :
Tant & si bien qu’ilz n’avoient autre envie,
Que de combatte & hazarder leur vie.
La resplendeur des armures luysantes
Des grans pavoys, & des targes pesantes,
Estoit pareille, alors par la campaigne,
À celle la qui est sur la montaigne,
Lors que le feu s’allume en quelque coing
De la forest, & qu’on le voit de loing,
Car tout ainsi leurs harnoys & espées,
Resplendissoient du clair Soleil frappées. ”

“ Comme est le sang yssu d’ung immortel.
Car pour autant que les Dieux point ne mengent
Des fruictz de terre, & que du vin s’estrangent,
N’ont point d’humeur pareil au sang de l’homme :
Et pour cela Immortelz on les nomme. ”

“ Aura la vie, ou la mort assignée.
Au demourant, afin qu’on accomplisse
Le tout à poinct, mesmes le Sacrifice
Qu’on doit aux Dieux en affaire semblable,
Qui veult le pacte estre ferme & vallable.
Il est besoing à vous Troiens pourveoir
De d’eux Aigneaulx l’ung blanc & l’aultre noir,
Masle & femelle : fault le masle blanc,
Le second noir, pour respandre leur sang
Au clair Souleil, & à la Terre digne,
De tous humains mere antique & benigne. ”

“ Reprenez cueur, fortz Troiens je vous prie,
Sans craindre tant l’Audace & Braverie
De ces Gregeois, les pensez vous de Pierre
Ou bien de Fer, que vostre Cymeterre,
Ne voz grans Dardz, ne les puissent percer :
Et de voz mains à la mort les blesser.
Poussez, poussez, & que chascun se fie
D’estre vainqueur. Car je vous certifie
Que le puissant Achillés qui souloit
Vous ennuyer si souvent qu’il vouloit,
Ne combat plus : ains est en son Navire
Ou il se deult, & digere son ire.
Au cry Divin fut la dure Meslée
Par les Troiens encor renouvellée. ”

“ Au vieil Chryses, de mes gens convoyée :
Mais quant & quant dedans ta grande Tente,
I’iray querir Briseida la gente,
Ta bien-aymée ; afin qu’on puisse veoir
De combien est plus haultain mon pouvoir
Que n’est ta force, & que doresnavant,
Nul tant hardy, ne se mette en avant,
De se vouloir à moy equiparer. ”

“ De veoir ainsi les Deesses & Dieux
Se mutiner en debatz odieux,
Tant seulement pour la faveur des hommes,
Et non pour toy, de qui vrayz Subjetz sommes.
Tu as conceu une Fille maulvaise,
Pernicieuse, & qui n’est jamais aise,
Qu’elle ne face injure ou desplaisir
À l’ung de nous, s’il luy vient à plaisir
Il n’y a Dieu tant soit fort & puissant,
Qui ne te soit en tout obeyssant,
Sors ceste cy, Oultrageuse, Enragée,
Qui n’est jamais Punie ou Corrigée. ”

“ Quand je prometz quelque grand chose aux Dieux
Soudainement feit sa teste bransler,
Et les sourcilz telement esbransler :
Qu’au seul mouvoir de sa perruque saincte.
Le grand Olympe en trembla tout de craincte. ”

“ Amy des dieux Achillés, tu conseilles
Que je remplisse à present les oreilles
Des escoutans, faisant entendre à tous,
D’où peult sortir d’Apollo le courroux.
Je le diray : mais il fault que tu jures,
De me garder, d’outrageuses injures
Encontre tous. Car je ne fais nul doubte,
Qu’ung des plus grans, qui ce propos escoute,
Voire & qui est de tout l’ost obey,
Se trouvera par mon dire esbahy. ”

“ Et tes grans biens en vain consumeras.
Si ton esprit (dict Agamemnon lors)
Le veult ainsi, va t’en, va t’en dehors,
Ou te plaira : Car en nulle maniere
Ne te feray pour t’arrester priere.
D’autres y a qui voudront demourer
Avecques moy, desirans m’honorer.
Et mesmement Iuppiter le hault dieu,
Ne me lairra despourveu en ce lieu.
Tu es celuy entre les Roys & Princes,
Ô Achillés, qui plus me mords & pinces,
Tu es celuy qui prends tous tes esbatz,
D’entretenir querelles & debatz,
Te confiant en ceste force extresme,
Qui vient des dieux, & non pas de toy mesme. ”

“ De par le Dieu Iuppiter qui desire
L’advancement de ta grand renommée
Il te commande à renger ton armée
Demain matin, en ordre de combatre :
Car c’est le jour que tu pourras abatre
L’orgueil Troien, & prendre leur Cité
Les dieux ne sont plus en diversité
Pour les saulver Iuno leur ennemye,
Leur à si bien la pensée endormie,
Qu’ilz sont d’accord : & mesmes Iuppiter
Contre Priam s’est voulu despiter. ”

“ Si luy jecta ung de ses traictz de passe,
Qui luy faulsa le bort de la Cuyrasse
Dessus l’espaule, & dans la chair entra
Assez profond, comme le sang monstra
Qui en sortit bien tost abondamment.
Sur quoy l’Archer commença bravement
À s’escrier. Ô Troiens valeureux,
Venez cy veoir le coup adventureux
De ma Sagette : Approchez vous amys,
Et prenez cueur ung des grans ennemys
Est la blessé : & croy qu’il ne pourra
Guere durer, mais bien tost se mourra
S’il est ainsi qu’Apollo ne me frustre
De mon desir, & ma victoire illustre. ”

“ Le temps present aultre chose demande,
Que de penser ainsi à la Viande.
Tout nostre Soing maintenant est de voir,
Comment pourrons à nostre faict pourvoir.
Et d’inventer quelque prudent moyen,
De resister à ce Peuple Troien :
En desendant, que par eulx noz Vaisseaux
Ne soient bruslez, & nous mortz à monceaux.
Ce qu’on ne peult nullement eviter,
S’il ne te plaist ta puissance exciter :
Et te vestir de Force & bon Courage,
Pour nous, garder de ce cruel Dommage. ”

“ Qu’elle osta lors aux Troiens le povoir,
Et aux Gregeois ensemble de se veoir.
Et aussy tost que les camps surent prestz
Pour batailler s’entrevoyants de prés :
Le beau Paris les rengz Troiens paisa,
Et vers les Grecs, à grans pas s’advanca,
En provoquant fierement les plus forts,
De s’esprouver contre luy corps à corps.
Sur soy portoit, entre ceulx de sa part,
Pour ce jour la, la peau d’ung Liepart :
L’Arc bien tendu, la Trousse bien pesante.
Pleine de traictz, son Espée luysante :
Et deux beaulx dardz serréz, qu’il esbranloit,
Quand les Gregeois au combat appelloit. ”

“ En bataillant les Hommes & les Dieux.
Mais garde toy si nul Dieu se presente
Encontre toy, que ta main ne consente
De l’oultrager Si ce n’est que la belle
Venus y vint : lors monstre toy rebelle,
Faisant sentir, si tu peux la rudesse
De ton fort bras à la molle Deesse.
Disant ces motz, Minerve le laissa
Tout courageux : Adonc il s’avanca
Vers les Troiens, en se jectant sur eulx. ”

“ Qui fut marry, ce fut le bon Chrysés,
Voyant ainsi ses presentz refuséz,
Par quoy dressa sa devote priere
Au clair Phœbus, qui ne la mit arriere :
Car en bref temps on veit corps infiniz
De dure peste affoiblis & terniz,
Lors cognoissant le miserable cas
Des Grecs mourans : que le prudent Calchas
Disoit venir d’Apollo mal content,
Ie fus celuy qui au peuple assistant
Persuaday le Dieu pacifier.
Ce qui despleut à l’orgueilleux & fier
Agamemnon : qui soudain commenca
À m’outrager, voire & me menaca,
Disant tout hault : que est le sienne perte,
Seroit en bref dessus moy recouverte. ”

“ De douze Beufz, ou Toreaux non domptez,
À pareil jour en son Temple portez.
Et qu’il luy plaise en sa Tutele prendre
Femmes, Enfans, & ce peuple deffendre :
En esloignant tant qu’il sera possible
De la Cité, le Cruel & Terrible
Diomedés. Lequel est, ce me semble
Plus belliqueux, que tous les Grecs ensemble.
Ie n’ay point veu noz Gens abandonner
Ainsi leurs Rencz, ne tant fort s’estonner
Pour Achillés, qu’on dict de Thetis Filz :
Comme à present je les voy desconfictz,
Par la fureur de ce Grec redoubtable,
Qui n’est à nul, qu’à soy mesmes semblable. ”

“ Il y a trop entre-deux de montagnes,
Trop large mer, trop desertz, & campaignes.
Tant seulement moy, & toute ma suite
Sommes venus icy sous ta conduire,
Passans la mer, non point pour nostre affaire,
Mais pour venger Menelaus ton frere :
Et maintenant sans adviser le bien,
Que l’on te faict (Ô visage de chien)
Lors que devrois me rendre quelques graces,
De me priver de mon bien me menaces.
Ie dy mon bien : mien est il vrayement,
L’aiant gaigné, combatant vaillamment. ”

“ À ceste fois que je face mourir
Ce grand venteur, qui tant se glorifie
M’avoir blessé, & qui defia se fie
(Appercevant couler mon sang vermeil)
Que jamais plus ne verray le Souleil.
Ceste oraison par le Grec prononcée,
Fut de Minerve ouye & exaulcée :
Si vint à luy, & soubdain le renforce,
En luy donant aux membres double force.
Apres luy dict. Va maintenant combatre
Plus hardiment, & ne te fains d’abbatre
Tes ennemys : Car la vaillance extreme
De ton feu Pere, est ores en toy mesme. ”

“ Presente luy l’habit plus honorable
De tous les tiens, le mectant humblement
À ses Genoux, & la devotement
Fay luy priere, & luy dresse tes Veux :
Luy promettant chascun an, douze Beufz
Gras, non domptez ; & qu’elle preigne en garde
Ce pouvre peuple, & que la Cité garde :
En esloignant de tes Murailles sacres,
Diomedés, qui faict tant de Massacres
De noz subjectz. Or quant à moy, j’yray
Trouver Paris mon Frere, & luy diray
Qu’il voise au Camp : Ne scay s’il le vouldra,
Ne quel propoz, ou Mine me tiendra.
Que pleust aux Dieux, que la Terre s’ouvrist
Dessoubz ses piedz ”

“ Ô Iuppiter souverain Dieu des Dieux,
Seigneur du Ciel, de l’air, & ces bas lieux :
Qui fais tonner & gresler & plouvoir,
Octroye moy aujourd’huy le pouvoir
De mettre en feu, avant la nuict venue,
Ceste Cité, qui tant s’est maintenue
Encontre nous : Fay que de mon espée
Soit à ce jour la chemise coupée
Du preux Hector sur sa forte poictrine :
Et que d’un coup de ma main propre il fine,
Voyans les siens, qui pour faire devoir
De le sauver puissent mort recevoir.
Ainsy prioit. Mais à l’oraison lourde
Feit Iuppiter pour lors l’oreille sourde. ”

“ Faisant ung veu à Phœbus, que du parc
De tes brebis luy sera faict offrande,
S’il veult permettre accomplir ta demande :
Et s’il te donne apres temps & povoir
De ta Cité de Zelie revoir.
À ces beaulx mots. Pandarus consentit
Trop folement, dont puis se repentit.
Alors tira son Arc, grand & poly
Hors du fourreau, garny de cuyr boully.
Or c est Arc cy, par merveilleux ouvrage,
Fut faict des Cors d’une Chievre sauvage :
Que Pandarus avoit si bien chassée,
Que sur ung roc l’avoit aux flans blessée,
Et puis des Cors, par ung ouvrier subtil,
Feit faire l’Arc tant propre & tant gentil. ”

“ De leur Seigneur, se meirent en defence :
Deliberez de faire resistence
Au preux Thoas : Ce qu’ils feirent si bien,
Tant fust il fort, qu’il n’en emporta rien.
Ainsi les corps de ces deux vaillans Ducz,
L’ung pres de l’aultre en la terre estenduz,
Et avec eux de gendarmes grand nombre,
Receurent mort par dangereux encombre.
Et quand Minerve eust lors permis parler
Parmy les Camps (sans le laisser blesser)
Ung vieil Souldard, tant seulement pour voir
Lesquelz faisoient adonc mieulx leur devoir,
Il eut iuré (tout remply de merueille)
N’auoir onc veu Occision pareille. ”

“ Et vous Grégeois, à present ung propos,
Qui peult servir à vostre Aise & Repos
La Convenance & les Promesses faicts
Entre les Camps, demeurent imparfaictes,
Et sans effect Iuppiter nous a mis
En ce danger, & n’a l’Accord permis,
Pource qu’il veult (tant est plein de malice)
Voir de nous tous ung cruel Sacrifice :
C’est assavoir, ou que Troie soit prise
Par vous Gregeois, Ou que vostre Entreprise
Soit inutile, & qu’en brief vous soyez
Par les Troiens tous occiz ou Noyez. ”

“ Menelaus dolent de voir mourir
Ainsi les siens, vint pour les secourir
Tres bien armé, portant en sa main dextre
Ung Dard luysant : Mars vouloit bien permectre
Qu’il s’advanceast, afin qu’il fust attainct
Par Eneas, & la tout roide extainct.
Antilochus en le voyant partir,
Le suyt de pres, & ne veult consentir
À ce hazard, bien sachant qu’il n’estoit
Pour resister, si seul le combatoit.
Voyant cela Eneas se dispose
Quicter le lieu, sans y faire aultre chose. ”

“ Du Chariot feit ung sault bas en terre.
Adonc Paris qui bien cogneut venir
Menelaus, ne se peut contenir,
Et faire feste, ayant son ame attaincte
Incontinent de merveilleuse crainte,
Si recula : & craignant le danger,
Entre les siens retourna se renger.
Ne plus ne moins que faict l’homme passant,
Qui quelque fois les haulx montz transversant,
(Sans y penser) trouve ung Dragon en voye,
Dont tout craintif, se retire & desvoye,
Pasle en couleur, de ses membres tremblant :
Mieulx ung corps mort, qu’homme vif ressemblant. ”

“ Que luy feit lors le Roy Laomedon,
De luy donner ses Chevaulx en guerdon ?
Tu es bien loing de sa Force & vertu :
Et qui soit vray, ton peuple est abbatu
Devant tes yeulx, tes Souldards de Licie
Sont desconfitz, & l’on ne s’ensoucie.
Si ne voy pas, quel secours tu peuz faire
À ces Troiens laissant les tiens deffaire.
Mais c’est tout ung, car aussy de mon Fer
Transmis seras bas aux portes d’Enfer. ”

“ Avoir ung Dieu pour Guyde, & Directeur.
Diomedés cognoissant Mars venir,
Eut grand frayeur, & ne se peut tenir
De reculer, comme l’homme estranger,
Qui desirant passer & voyager
En loing Pays, advient si mal qu’il trouve
En son Chemin ung grand horrible Fleuve
Impétueux, escumant de roideur,
Dont il s’estonne, en voyant sa grandeur :
Puis s’en retourne, empesché de parfaire
Ce qu’il avoit déliberé de faire. ”

“ Et d’iceluy vint Eneas grever
Dessus la Cuysse, & si fort le blessa,
Que tous les Nerfz & Muscles luy froissa :
Dont fut contrainct demy mort tresbuscher
Sur les genoulx, & la terre toucher
Avec les mains, prest d’avoir mort amere,
Sans le secours que luy donna sa Mere :
Qui prevoyant le perilleux danger
De son cher Filz, vint pour le descharger
De ce grand faix. Et pour plus seure garde,
(En l’embrassant) l’envelope, & le garde
De son manteau comme d’ung Boulevert.
Car aultrement il eust este couvert
De mille dardz. Cela faict, la Deesse
Feit son effort, le tirer de la Presse. ”

“ Et disoient tous, que trop hardy courage
Avoient les Grecs de faire tel ouvrage.
Quand les deux Roys qui s’en alloient, se veirent
Tout justement au lieu, ou a mort meirent
Leur Espyon, Vlyssés arresta
Les beaulx Chevaulx, raultrese desmonta,
Pour luy bailler l’habit ensanglanté,
Ce qu’il a faict : & puis est Remonte,
Et vont si bien qu’en peu d’heure ilz se rendent
En leur Vaisseaulx, ou les Grecs les attendent.
Entre les Roys Nestor premierement
Ouyt ung Bruict & cognut clairement,
Qu’ilz arrivoient. ”

“ Car des grands Dieux trop dur est le courroux.
Noble Troien, à veoir sa contenance,
(Dict Pandarus) ce Grec a la semblance
Du prudent Filz de Tidëus : il porte
Pareil Escu, Armet de mesme sorte :
Ung grand Pannache, & ses Chevaulx aussi
Me sont penser, qu’il peult bien estre ainsi.
Ie n’oserois toutesfois l’affermer
Certainement, ne mortel estimer
Celuy qui faict si valeureux faictz d’armes,
Ou c’est ung Dieu couvert d’humaines armes,
Ou ung mortel, auquel les Dieux assistent
Secretement : & pour luy seul resistent,
En destournant les coupz à luy transmis. ”

“ Quel Guet on faict, si les Nefz sont sans garde.
Lors Vlyssés avec ung fainct soubrire
Luy dict : ami ie voy bien par ton dire,
Que ton esprit a ung bien desiré,
Trop grand pourtoy, & trop desmesuré.
Car ces Coursiers sont de Nature telle
Qu’impossible est à persone mortelle
De les dompter si ce n’estoit leur Maistre,
Que Iuppiter a faict de Thetis naistre,
Mais ie te pry Compte moy sans mentir,
Alors qu’Hector t’a pressé de partir,
Ou estoit il ? Son Harnoys tant famé,
Ou le met il quand il est desarmé ? ”

“ Aux Dieux haultains : les prians qu’arrester
Facent l’Injure, en la propre Maison
De c’il qui n’a ouy leur Oraison.
Certes mon Filz, tu doibs pour le devoir
De ton Honeur, ces Dames recevoir.
Mesmes voyant les Presens de valeur,
Qui à l’accord donnent plus de Couleur.
Quand nostre Chef serait Opiniastre,
Tenant son Cueur, & tant Acariastre,
Qu’il ne vouldroit à toy s’humilier,
Ne par beaulx Dons te reconcilier :
Ie n’oserois te conseiller de faire
Rien pour les Grecs, tant fust urgent l’Affaire. ”

“ Ton filz Paris, pour mieulx son droict debatre,
Veult corps à corps Menelaus combatre :
Et le vainqueur, doibt avoir en guerdon
La belle Heleine, avec maint aultre don.
Par ce moyen tous debatz finiront :
Car les Gregeois en Grece s’en iront,
Et les Troiens pour la guerre endurée,
Auront la paix, qu’ilz ont tant desirée.
Or rien sans toy ne se pourroit conclure :
Car il convient, que ta Majesté jure,
(Ce disent ilz) pour ferme seureté
De ce cornbat, entre eulx deux arresté. ”

“ Rencontre ung Cerf, ou Chevreul, dans les bois,
Mis par les chiens, & veneurs, aux Abois,
Si le devore, & en prend sa pasture :
S’esjouyssant de tant bonne adventure,
Ainsi le Grec ayant Paris choisy,
Sut en son cueur de liesse saisy :
Voyant à soy l’occasion offerte
De se venger de l’injure soufferte. ”

“ En ma faveur les Dieux haultains prier,
Sans que Troiens vous entendent crier.
Mais qu’ay je dict ? Certes il ne m’en chault,
Priez tout bas, ou bien priez tout hault,
Ie ne crains rien. Car si la Nourriture
Faict estimer souvent la Creature :
Si la Patrie, & illustre Lignage,
Aux Hommes faict augmenter le Courage :
Estant ainsi, comme je suis pourveu
De ces trois dons, il ne sera pas veu
Que je m’en fuye : ou bien que je delaisse,
Ce que doibt faire ung Prince de Noblesse. ”

“ Beufz & Moutons : Les aultres de pourveoir
Au Pain & Vin. Encor fault qu’une Troupe
Avant souper grand foison de Boys coupe,
Pour faire Feux, qui puissent allumer
Toute la Nuict. Ces Grecs pourraient par Mer
Secretement s’en fouyr. Et ie veulx
S’il est ainsi, soubdain courir sur eulx :
Et les presser si rudement sur l’heure,
Qu’en s’en fuyant quelque nombre en demeure.
À celle fin que leur Desconfiture
Serve d’Exemple à toute Creature.
Et qu’on ne soit si hardy d’entreprendre
Contre Troiens, qui se scavent defendre. ”