Marco Polo

“ Or quand il advient qu’on porte le corps d’un grand Cham decedé pour ensepulturer en la montaigne d’Alchai. Ceulx qui le conduysent, tuent indifferemment toutes les personnes qu’ilz rencontrent par les chemins, leur disans : allez & servez en l’autre monde nostre seigneur & Roy : car ilz sont si abusez des folles persuasions de leurs faulx dieux, qu’ilz croyent fermement que ceulx qu’ilz font ainsi mourir, sont destinez au service de leur Roy en l’autre monde. ”

“ Il est bel homme, bien adextre & exercité aux armes, robuste & bien dispos de ses membres, avec promptitude d’esperit, pour entreprendre & executer grandes choses, toutesfois avec conseil, usant de grande providence & discretion au gouvernement de son peuple, car au paravant qu’il parvint à l’Empire, il s’est plusieurs fois porté vaillamment en guerre, ayant reputation de prompt & hardy capitaine, & en toutes autres choses s’estoit demonstré prudent & discret. ”

“ En ceste ville de Quinsai y à de fort belles & sumptueuses maisons : oultre par les rues y à certaines tournelles publiques, esquelles en temps de feu les voysins transportent leurs boens pour les sauver de la violence du feu : car il y à grande quantité de maisons en la ville qui ne sont faictes que de bois : au moyen de quoy advient bien bien souvent que le feu s’y prend, & sont bruslées & consommées. Les habitans de la ville adorent les idoles, & mangent indifferemment la chair des chevaulx, chiens, & autres bestes ordes & immundes. ”

“ Puis apres que tout ce est faict & acomply, on dresse les tables, & lors se faict un banquet magnifique, auquel ilz sont traictez sumptueusement en grande joye, & au contentement de tous. Les tables levées, & le disner finy, viennent les chantres & haulxbois, ensemble les farceurs, lesquelz chacun en son regard, de leur harmonie & jeux resjouissent toute la compaignie. Oultre on ameine a l’Empereur un lyon privé, lequel se couche à ses piedz aussi doux & paisible qu’un petit chien, & le recongnoist comme son seigneur. ”

“ Oultre y a grand’ quantité de lyons : le gingembre y croist en grande abondance : semblablement y croist une certaine fleur, qui ressemble au saffran, & toutesfois est d’autre espece, encores qu’elle soit mise en usaige pour saffran. Les habitans du pays mangent de grande affection la chair humaine, pourveu que ce ne soit d’un homme mort par quelque maladie. Quand ilz vont a la guerre chacun imprime en son front avec un fer chault certaine merque : & n’y à aucun d’entre eulx qui osast mener un cheval a la guerre, sinon le chef & capitaine de l’armée. ”

“ Oultre Panchi a distance d’une journée se descouvre la ville de Cain, laquelle semblablement est belle & de grand renom : alentour d’icelle y à de belles percheries, & chasses, tant de bestes rousses que d’oyseaux, mesmement de phaisans, qu’on y trouve en grande quantité.
De la cité de Tingui. Chap. LVII.
De la tirant oultre, a une journée de chemin on parvient en la ville de Tongui, laquelle encores qu’elle ne soit pas grande, toutesfois est bien garnie & abondante de toutes sortes de vivres. ”

“ Donc Armenie la mineur en laquelle premierement sommes entrez consiste & est soustenue par le moyen des bons gouverneurs d’icelle & grande observation de justice. En ce Royaume y a plusieurs belles villes, & grand nombre de bourgades, la terre y est fertile, tellement que le pays n’est indigent d’aucune chose necessaire. ”

“ Et si une fille se veult bravement parer pour se monstrer en compaignie, elle pendra a son col tous les presens & joyaulx que luy ont donnés ses amoureux : & d’autant qu’elle a esté agreable & aymée de plusieurs personnes, d’autant sera jugée de plus grand honneur & louenge. Mais aussi depuis qu’elles sont entrées au lien de mariage, il ne leur est plus permis d’avoir aucune communication ne accointance avec les estrangers, mais sont contrainctes garder leur foy inviolable à leurs mariz. Et sur toutes choses les hommes du pays se donnent garde de se faire tort en cela l’un a l’autre. ”

“ Les hommes & femmes du pays sont de belle stature, encores qu’ilz soient bruns. La terre y est fertile & bien cultivée, & le païs bien peuplé, & garny de belles villes, chasteaulx, & forteresses. Les hommes sont fort adextres aux armes, pource qu’ilz sont ordinairement exercitez a la guerre. Ilz font brusler les corps de leurs propres parens trespassez, & le reste de leurs os & cendres ilz enferment soigneusement en des boistes qu’ilz cachent dedans quelque creux de montaignes, de peur qu’ilz ne puissent estre trouvez, & attainctz par les hommes ne par les bestes. ”

“ Semblablement en ceste contrée est la noble cité de Tauris, en laquelle se faict grande trafficque de diverses marchandises : car il s'y trouve grande quantité de pierres precieuses, de draps d'or, de soye, velours, & autres especes de marchandises. Et pource que la ville est en bonne assiette, y viennent de diverses parties du monde infiniz marchands comme des Indes, de Baldach, de Mosul, de Cremosor, mesmes du pays des Latins, aucuns y vont en marchandise : car les marchands trouvent en icelle de grands moyens pour soy enrichir en peu de temps. ”

“ En Crerman y a plusieurs artizans, mesmes armuriers de toutes sortes d’armes, qui forgent & fabriquent freins, esperons, selles, espées, arcs, trousses & autres harnois, selon l’usaige du pays. Les femmes sont destinées à autres ouvraiges, mesmement à la plumasserie dont elles font de braves lictz, mattelatz, oreillers, traversins & choses semblables de grande excellence. ”

“ Les pays, regions, & provinces sont en telle difference les unes des autres, soit pour la qualité & nature de la terre, meurs & conditions des habitans, especes, & figures des bestes, disposition ou temperature de l’air, qu’allant d’un lieu à autre, tousjours choses nouvelles & estranges se presentent. Et neantmoins par la brutalité ou ignorance des hommes peu de gens se treuvent qui soyent raviz en admiration de tels effectz de nature, aussi bien peu ont cognoissance de la sublimité & puissance souveraine du Createur, duquel telles merveilles procedent. ”

“ Quand une armée estrangere passe par ceste province, tous les habitans d'icelle avec leurs femmes, enfans, famille, bestail & autres meubles s'en fuyent & retirent en une contrée voysine, ou ilz trouvent de bonnes eaues & pasturaiges : & y font leur sejour jusques à ce que toute l'armée de leurs ennemys soit passée. Et quand ilz fuyent ainsi devant leurs ennemys, le vent efface tellement l'impression de leurs piedz & vestiges à cause que le pays est sabloneux, qu'il est impossible de les suyvre à la trace. ”

“ Les habitans du royaume de Ferlech pour le regard de ceulx qui se retirent & habitent es montaignes, n’ont aucune loy ne civilité, mais vivent brutallement : & adorent la premiere chose qu’ilz rencontrent, & se presente a eulx le matin. Oultre mangent la chair de toutes sortes de bestes indifferemment, soient des bestes immundes & salles, ou autres : mesmes mangent chair humaine. Et au regard de ceulx qui sont demeurans sur les rivages de la mer, ilz tiennent & observent la loy de Mahumet, laquelle ilz ont apprinse des marchans Sarrazins qui vont traffiquer en ces parties. ”

“ L’Isle de Zipangri est fort spacieuse, & de grande estendue, située en la haulte mer, a distance des havres de la province de Mangi de cinq cens lieues ou environ. Les habitans d’icelle sont blancz & d’assez belle stature, adonnez au service des idoles : ilz recongnoissent un Roy seul & particulier en leur pays, & ne sont a aucun autre tributaires. En ceste isle y à de l’or en grande abondance, toutesfois le Roy ne le permet facilement transporter hors du pays : ce qui est cause que bien peu de marchandz frequentent & traffiquent en ceste province. ”

“ Ilz ont ce dieu en tel honneur & reverence, qu’il n’y a aucun d’eulx qui n’en ayt en sa maison l’imaige & figure. Et pource qu’ilz croyent asseurement leurs femmes & enfans estre en la charge & tutelle de ce dieu Natagai, ilz font mettre au pres de son imaige d’autres petites figures pour representer leurs femmes & enfans, assavoir leurs femmes a la main dextre, & les enfans devant la face de l’idole. Oultre leur font grande reverence, quand ilz vont prendre leur repas : Car devant que boire ne manger, ilz oignent & frottent la bouche de leurs images, avec la gresse de leur chair cuicte. ”

“ Par quelz moyens la ville de Sianfu fut prinse par les Tartares. Chap. LVIII.
Sur la coste d’Occident se descouvre une province appellée Nauiguy, qui est opulente & riche, située en beau paisage, & en laquelle on faict des riches draps d’or, & de soye : semblablement y croist le bled froment en grande abondance. La ville principale de ceste province est appellée Sianfu, & d’icelle dependant douze autres villes ses subjectes & justiciables. ”

“ Semblablement une femme estant en travail d’enfant si elle en prend quelque peu son enfantement sera grandement advancé. Et si quelqu’un souffre les hemorroides ou mal de broches au fondement, en oignant le lieu de la douleur avec un peu de ce fiel, il sera en peu de temps guery entierement. Et au regard de la chair du serpent ilz la vendent, car les habitans du pays en mangent voluntiers. ”

“ De ceste ville le grand Cham retire un tribut infiny : car aucun navire n’entre au port d’icelle qui ne luy paye groose somme, ou qu’il n’en retire gros profiit pour ses droictz, & peu s’en fault que de chascune sort d’espicerie il n’en exige la moitié. En ceste region y a une autre ville, appellée Figui, qui est de grand renom au pays, à cause des belles escuelles & vaisselles qu’on y fait. Les habitans d’icelle ont langage particulier. Ce que dessus est dit de la province de Mangi suffira quant a present. ”

“ Et lors que le cadavre est porté par la ville, ilz font dresse par certains endroiz des tentes & pavillons couvertz de draps d’or & de soye, ou autres choses selon les facultez de defunct. Et quand on vient à passer par devant, ilz respendent en terre du vin & viandes delicates, ayans ceste folle persuasion que le defunct en l’autre monde sera grandement resjouy de telles choses. Oultre font cheminer devant le corps plusieurs menestriers jouans de diverses sortes d’instrumentz de musique en grande doulceur & harmonie. ”

“ On trouve en ceste province grande quantité d’or, & espiceries aromatiques, mais elles n’ont point de traicte, & ne se peuvent facilement transporter, au moyen de ce que le pays est fort eslongné de la mer. Oultre y à grand nombre d’elephans, & de belles chasses aux bestes sauvages. Les habitans vivent de chair, laict, & riz comme ceulx de Bangala. Ilz n’ont aucun vin, mais ilz font une boiture excellente, composée de riz & d’espiceries. ”

“ Oultre ce le pays est fort commode pour la chasse & le vol. Aussi y a grande quantité de bestes saulvaiges : semblablement de bons faulcons. Il y croist grande quantité de bledz, froment, orge, millet. Ilz n’ont aucunes olives, mais ilz font leur huille de noix & de sosime. Les habitans ne craignent aucunement les estrangiers, car il seroit difficile d’entrer en armes dedans le pays, pour les passaiges qui sont si estroictz, que eulx mesmes n’en peuvent facilement sortir pour courir sus à leurs ennemys. Leurs villes & chasteaulx sont fortifiez par artifice & par nature. ”

“ Les idolatres de la ville de Campition ont telle coustume que chacun d’eulx peult avoir en mariage trente femmes, voire plus si tant en peut nourrir, toutesfois la premiere espousée sera tousjours estimée la plus digne & plus legitime. Le mary ne reçoit aucun dot de sa femme en faveur de mariage, mais au contraire luy baille & assigne dot & avancement pour l’avoir en mariage, ou en bestail, ou en serviteurs, ou argent selon sa puissance & faculté. Si la femme est odieuse, & qu’il la desdaigne, il luy est loysible la repudier à son plaisir & vouloir. ”

“ Tous les habitans de la province de Maabar, tant hommes que femmes, sont fort noirs, aussi par moyens artificielz ilz sçavent appliquer ceste couleur noire a leur corps : car la couleur de noir extreme soit en homme ou en femme leur semble extreme beaulté. Pour ceste cause ilz oignent leurs petitz enfans trois fois la sepmaine d’huille de sosime, qui les rend noirs perfaictement : & d’autant qu’un d’entre eulx est le plus noir, il est estimé le plus beau. Aussi les idolatres d’entre eulx peignent leurs images les plus noires qu’il est possible : & dient que les dieux & sainctz sont tous noirs. ”

“ Quand ilz mangent ilz n’ont aucunes escuelles, mais ilz mettent leurs viandes sur des fueilles seiches cueillies de certains arbres qui portent des pommes de paradis, ou sur quelques autres fueilles seiches. Jamais ne mangent sur fueilles freschement cueillies. Semblablement ne mangent d’herbe verde ne fruict recent : car ilz dient que tout cela estant encores en verdure, & vie & une ame, & pour ceste cause ne les veulent tuer & faire mourir : ce qu’ilz estimoient a grand peché & offense s’ilz avoient privé aucune creature de sa vie. ”