Nicolas Trigault

“ Tant que le maistre, quel qu’il soit, est en devoir de Magistrat, aucun des enfans ou serviteurs domestiques ne sort de la maison, craignant qu’il ne brigue des presens. Mais des serviteurs publiquement ordonnez au Magistrat, leur rendent dehors toute sorte de service. Mais quand il est sorty de la maison, il scelle avec son cachet les portes, soit privées, soit publiques, ou on administre le droict de crainte que quelqu'un des domestiques n’en sorte sans son sceu. ”

“ Les figues que les nostres y aportent, ne se laissent surmonter par celles d’Europe. Outre ceux-cy il y a des fruits tres-bons à manger incognus aux nostres, telz qu’on en void en la province de Canto & autres du Midy, que nous appellons d’un nom emprunré des Chinois, Licyes & Longanes, qui entre peu sont tres doux, & ne croissent en nulle autre part. On void aussi là mesme ces noix Indiennes provenantes du palmier, & autres fruicts d’Inde. Il y en a aussi une autre espece, que les Portugais appellent figue Chinoise, qui est un fruict tres-savoureux & ensemble tres-beau. ”

“ Que si vous desirez sçavoir les choses plus rares de ces quartiers icy, ce sont les Palmiers qui emportent à bon droit la palme sur tous les autres arbres de ce pays : car en iceux vous prenez tout ce qui est necessaire pour la vie de l’homme. Le vin, l’eau, le vinaigre, l’huile, le laict, les navires toutes equipées, les chapeaux, les sieges, & plusieurs autres choses. Les Hollandois sur leur partement en couperent un grand nombre, & pour ce en voit on des grandes tailles par les champs. ”

“ Ceux qui sont de quelque Magistrat, ou anoblis par les degrez honorables des lettres, toutes les fois qu’ilz rendent ces devoirs de visite, se revestent de l’habit particulier de leur office, qui n’est pas peu different de l’ordinaire. ”

“ La flotte Hollandoise, qui estoit de huict grosses navires de guerre, vint jetter l’anchre au Mozambic, soubs la conduite du Capitaine Paul Vancaerden. Sa resolution estoit de prendre la Citadelle, qui est comme la clef des Indes Orientales, & un tres commode rafraichissement pour ceux qui navigent ; d’où il peut avec asseurance passer ce tant riche & renommé fleuve Cuama, & gaigner les mines d’or & d’argent, qui sont en la terre ferme d’Afrique. Ce qui augmentoit d’avantage son esperance, estoit le peu de garde qu’on faisoit à la Citadelle, en une si longue & profonde paix. ”

“ La mesme enqueste se fait aussi des Magistratz de Cour, mais seulement tous les cinq ans. Ce qui est aussi practiqué avec les chefs de guerre en mesme temp, avec mesme ordre, & mesme rigueur.
Aucun en tout le Royaume n’a charge de Magistrat en la Province en laquelle il est né, si ce n’est un gouvernement militaire. Cela se fait, de peur que les premiers qui administrent la justice, se laissent gagner aux parens, ou aux amis. Mais les derniers, à fin qu’incitez par l’amour de la patrie, ilz la defendent plus courageusement. ”

“ Je viens maintënant à traicter des parties qui sont au Midy, où les affaires sont merveilleusement tristes & deplorables. Nous appellons les parties Meridionales, celles de Malaca & de toutes les Moluques desquelles il faut que je vous recite trois particularités. La premiere est le siege & la bataille donnée à Malaca, la prise d’Amboino, & en dernier lieu, la perte & le recouvrement des Moluques ou de Ternate : Car les Pirates Hollandois ravagent & gastent tout ce pays. Toutes-fois Dieu a monstré cuidemment qu’il veut chastier l’Inde, & non pas la perdre du tout. ”

“ Mais les nouveaux lettrez enseignent que les ames meurent ensemble avec les corps, ou peu apres : & ainsi seulement ilz ne donnent aucun lieu au ciel, ni aux enfers pour la punition des meschans. Cela semble trop dur à quelques-uns, & pource ilz asseurent que les seules ames des bons vivent apres la mort parce qu’ilz disent que les espris des hommes se renforcent par l’exercice de la vertu, & s’unissent de sorte qu’ilz peuvent en apres durer long temps. Ce que les meschans ne pouvant faire, que leurs ames aussi-tost qu’elles sont sorties du corps s’esvanouissent, & se reduisent comme en fumée. ”

“ Devant que hausser les voiles, il envoye une lettre au Gouverneur de la citadelle par un homme du pais qui portoit environ ces paroles : Que les ennemis faisoient le pis qu’ils pouvoient à leurs ennemis, & pour ce devant que partir ils alloient mettre tout en feu : mais que gaignez d’une courtoisie de guerre, ils demandoient aux Portugais s’ils vouloient racheter leurs maisons & leurs Eglises à prix d’argent. ”

“ Pour ce que les limites de ce Royaume s’estendent si au long & au large, à cause de l’ignorance des terres d’outre-mer, les Chinois croient que leur Roy commmande à tout le monde, c’est pourquoy d’un nom gracieux ilz l’appellent encor à present, comme tousjours du passé, Thiencu, filz du ciel. Et d’autant qu’ilz adorent le ciel pour souveraine Deité, le nommer filz du ciel, c’est autant que l’appeller filz de Dieu. ”

“ On desiroit fort qu’ils vinssent, parce qu’on s’estoit fortifié, tant de la Citadelle, que du destroit de l’emboucheure & du port : mais ils ne sont pas ny si forts ny si courageux, qu’on les fait. Le General de nostre flotte avoit fait monter fort à propos, quelques pieces de canon, qui avoient esté desgarnies de leurs rouages au siege passé par le moyen des charpentiers qu’il menoit, & en avoit fait faire d’autres, pour la deffence de la Citadelle, qui n’avoit pas grand besoing de nostre secours, ny de munitions de guerre, en estant desja assez suffisamment fournie. ”

“ Mais ce qui en cecy semblera plus estrange aux estrangers, est que ces philosophes sont beaucoup plus nobles & courageux, plus fideles au Roy & à la Republique, mesprisent plus genereusement la mort pour l’amour de la patrie, que tous ceux qui de profession particuliere s’adonnent à la guerre. Cela peut estre provient de ce que par l’estude des bonnes lettres le courage de l’homne s’anoblit : ou pource que dez les premiers commencemens du règne les lettres pacifiques ont tousjours esté en plus grande estime, que l’art militaire, entre un peuple qui n’a pas este ambitieux d’agrandir son Empire. ”

“ Je retourne à la compagnie de nos Peres, laquelle il me fallust quitter quatre jours apres nostre arrivée, car le General de nostre flotte me feist appeller en son vaisseau, & ce d’autant que les navires Hollandoises, qui avoient assiegé le Mosambic, vindrent pour se jetter dans le port de Goa, & comme on s’apprestoit pour combattre, il voulut luy, & les autres seigneurs, & gentils hommes de sa suite se confesser, devant qu’entrer en bataille. Je m’en allay donc ce jour au navire ; & deux jours apres voicy les ennemis qui s’en viennent les voiles au vent, tout droict à nous. ”

“ Car de la porte tournée d’un costé ou d’autre, des eaux qu’on doit destourner par la basse-cour à droicte ou à gauche, de la fenestre coustumiere d’estre ouverte d’une parte ou d’autre, de ce qu’un toict, à l’opposite sera plus haut qu’un autre, & de semblables bagatelles, ils songent que depend la prosperité de la famille, les richesses, honneurs, & bonne ou mauvaise fortune. ”

“ Toutes lesquelles choses il a apprins sur le chemin d’un Medecin qui estoit captif entre les mains des Turcs, & que bien tost il nous en escrira de plus certaines & asseurées nouvelles. La bonté infinie de nostre Dieu permettra sans doute, que ces belles & grandes campagnes seront ouvertes à nostre Compagnie, laquelle autant qu’elle peut, embrasse tout le monde de son zele, & s’employe de toutes ses forces à procurer le salut de tous les hommes. ”

“ Ce encor qu’il semble que ce soit une hyperbole excedant la verite, neantmoins elle ne semblera pas excessive à celui qui seulement navigera sur les rivieres de la Chine. Quant à moy j’oserois asseurer autre chose, peut estre avec plus de verité, qu’il ne semble pas incroyable, qu’on peut compter autant de vaisseaux en ce seule Royaume, qu’en tout le reste du monde ; si on parle seulement de ceux qui sont portez sur les eaux douces. Car ceux qui parmy les Chinois passent en la mer, sont en plus petit nombre ; & nullement esgaux aux nostres. ”

“ Les tonnerres & fouldres espouventables y sont aussi fort frequentes, & ce par une speciale providence de Dieu, parce qu’elles poussent avant les Navires par les orages qu’elles ameinent, faute de quoy on mourroit en ces lieux de chaleur, & de pauvreté. Nous franchismes ceste ligne (si bien me souvient) le jour de sainct Gregoire, le Soleil n’en estant arriere que de fort peu de degrez vers le midy, lequel peu de jours apres nous eusmes pour nostre zenith, ainsi que les ombres qui tomboyent & se faisoient en droicte ligne, le nous monstroyent clairement. ”

“ Toutes les fois qu’on boit, le conviant prend la tasse à deux mains sur son assiette, & la levant doucement, & soudain abaissant, il invite les autres à boire en mesme temps estant tous tournez vers celui qui les convie, ilz font le mesme, & commencent tous ensemble de boire. Ce qu’ilz font si lentement en humant, que pour vuider leur tasse ilz la portent souvent quatre & cinq fois à la bouche. Ilz gardent tousjours celle façon de boire, sçavoir en humant, encor qu’ilz boivent de l’eau, & ne boivent jamais rien tout d’un trait comme nous. ”

“ De plus on nous escrit de la Chine, que du costé de Septentrion bien avant, il se trouve quelques vestiges ou marques de Christianisme. Car il y a des gens qui ont des Croix & autres choses semblables. Comme aussi ceste race viperine des Juifs qui se peuple parmy tout l’univers, s’est allée camper en ce païs là. Un de nos Peres a parlé à l’un de ces Chrestiens fort peu de temps : lequel pour autant qu’il se hastoit d’aller à son païs avec charge de province, n’eust pas le loisir d’estre parfaictement instruict des choses de nostre foy. ”

“ Or l’Empire Chinois derive à nostre maniere du pere au filz, ou proches parens du Roy. Deux ou trois Roys tres-anciens seulement à la mort ont recommandé le Royaume, non à leurs filz, qu’ilz jugeoient incapables de regner, mais à des autres, bien qu’ilz ne fussent de leur sang. Il est aussi plus d’une fois arrivé que celuy qui gouvernoit trop mal le Royaume, a esté despouillé de sa puissance par le peuple impatient du joug, qui mettoit en sa place celuy qui estoit plus genereux, vertueux, & aimé du peuple ; lequel aprez ilz honnoroient comme leur Roy légitime. ”

“ Et beaucoup plus quand le mesme jour, un vent commença à souffler dans nos voiles si heureusement qu’il nous accompagna tres-fidelement plus de huict cens lieuës, c’est à dire, jusques à Goa, & le huictiesme d'Octobre nous descouvrismes les Indes, que nous avions recherchées par un si long & difficile chemin. Or ce que vous voyez le premier, sont des rochers que les Portugais appellent, à raison de leur seicheresse, Ilheos queymados, c’est à dire, Isles bruslées. D’un costé ils se vont rendre à la terre ferme, & sont distans de Goa vers le Nort, d’environ douze lieuës. ”

“ Ainsi les Japons, Corains, Caucincinois, Levhiens, ont des livres communs ; encor qu’en les prononçant ilz sont si différents entre eux. que l’un n’entend pas seulement un mot de l’autre. Ilz entendent neantmoins tout le mesme sens des livres, encor qu’ilz n’ayent cognoissance d’aucune autre langue que de la leur propre. En ce mesme Royaume aussi de la Chine chasque Province est si différente au parler, qu’ilz n’ont du tout rien de commun, & toutefois ilz ont tous un mesme traffic, & usage de livres & de lettres. ”

“ Sur ces entrefaictes du siege, un marchand Portugais arrive des Moluques à Malaca, avec une poignée de soldats, qui ne pouvant entrer dans la Citadelle du costé de la mer, s’en va du costé de la terre, & y entre luy vingtcinquiesme, les autres de ses gens moururent, qui de travail, qui de faim, qui de soif, parmy les bois. Cependant l’ennemy s’approche avec ses rempars ou levées de terre telles que l’on fait en Europe, & de si pres, qu’ils se battoient plus à coups de pierres, qu’à coups d’artillerie. ”

“ De quelles choses est fertile la terre de la Chine
CHAPITRE III.
DE ceste si ample estendue de cet Empire, non seulement de l’Orient à l’Occident (comme s’estend nostre Europe) mais encor du Midy au Septentrion, provient qu’en aucun autre lieu du monde il n’y a si grande diversité de fruicts, qu’il s’en produict icy soubs le ciel de ce de ce mesme Royaume. Car de là depend la diversité des climats, & d’icelle la fertilité de diverses choses, pour ce qu’une chose s’esleve plus heureusement en un air bruslant, une autre en un air glacé, & autres aussi sous un ciel tempéré. ”

“ Mais le plus fascheux & difficile combat des assiegés estoit contre la faim, qui s’estoit faicte sentir par tout le païs ceste année là, & redoubloit de telle façon ses coups pendant le siege, qu’autant de ris qu’il faut pour la vie d’un homme en un jour, le vendoit un escu, sur la fin on n’en trouvoit ny pour or ny pour argent. Au moyen dequoy le Gouverneur permettoit aux soldats de faire des sorties sur les ennemis, afin que pendant qu’ils combatroient, les plus necessiteux coupassent des herbes pour en vivre. ”

“ Ne fais à autrui, ce que tu ne veux estre faict à toy mesme. C’est merveille combien ilz louent hautement la pieté & obeissance des enfans envers pere & mere, & non moins la fidelité des serviteurs à l’endroit des maistres, & le respect des petis vers les grandz. Or pource qu’ilz ne defendent ou commandent rien de ce qu’il faut necessairement croire de l’autre vie pour estre sauvé, il y en a plusieurs qui avec cete leur secte en meslent deux autres, & estiment avoir receu une grande Religion, s’ilz ne rejettent aucune fausseté. ”

“ Ceste nouvelle provision d'eau atterra autant les ennemis, qu’elle bailla de courage aux assiegez : qui fut cause que seize Portugais, & non plus, avec quelques Indiens, qui estoient arrives de Goa, avec une navire de charge, qui va ordinairement de l'un à l’autre, se ruerent en une belle nuict sur les ennemis : & bien qu’ils eussent esté descouverts par les sentinelles, ne laisserent pour tant d'un grand courage de les charger si bien & si beau, qu’ils en tuerent jusques à quatorze, & mirent les autres en fuite. ”

“ C’et pourquoy ilz punissent fort severement ceux qui sans permission du Roy negotient ou conversent avec les estrangers. Et s’il est quelquefois necessaire d’envoyer avec mandement ou commission quel qu’un hors du Royaume, il n’y a quasi personne qui s’y puisse resoudre, & toute la famille deplore celui qui despart, comme s’il estoit traisné à la mort : & quand il retourne, le Magistrat pour recompense de sa legation, lui donne quelque dignité ou charge honorable.
Personne ne porte les armes dans les villes, non pas mesme les soldatz ou chefz & capitaines de guerre ”

“ C’estoient de ceux qu’on appelle Caffres : car ce païs d’Affrique, qu’on nomme Cafraria, n’est esloigné du Mozambic que d’un petit bras de mer, auquel le P. Gonsalve Sylveria Portugais, Gentilhomme de bonne part, & oncle maternel du General de nostre flotte, avait enduré un glorieux martyre à Monomotapa, pour la foy de nostre Seigneur. Ces Caffres sont gens rudes & barbares, nés pour servir d’esclaves. J’avois coustume de dire que chacun d’eux n’avoit que la moitié de l’àme raisonable, & que deux en avoyent une toute entiere. ”

“ Tous les Magistratz entierement de tout le Royaume sont reduits à neuf ordres, soit qu’on regarde le Senat Philosophique, soit le militaire. Selon l’estat de ces ordres on paie à chascun tous les mois les gages du thresor public, soit en argent, soit en ris, qui est certes petit, veu la Majesté grande des Magistratz ; car le gage d’aucun, pour relevé qu’il soit en qualité, ne monte pas tous les ans à mil escus. Et en ces gages tous ceux qui sont d’un mesme ordre sont esgaux, soient Philosophes, soient gens de guerre ”

“ Ce qu’aussi ilz sont sans grande necessité, & hors des detresses de la cherté, & les enfans sont pour jamais separez de leurs peres & meres & l’achepteur peut se servir de son serviteur en toute telle chose qu’il luy plaist. De la arrive que le Royaume est plein d’esclaves, non de ceux qui sont pris en guerre, ou amenez d’ailleurs, ains naturelz du pays & de la mesme ville. Il y en a beaucoup aussi qui sont emmenez en perpetuelle servitude par les Portugais & Espagnolz hors de leur pays. ”

“ Quiconque a obtenu le premier lieu en l’examen des Docteurs, il est sans aucune difficulté le troisiesme en ce second, & qui en cet examen est le premier ou second, est durant toute sa vie orné d’une honorable dignité, outre ce aussi qu’il exerce les plus grandes charges en la Republique. Ceste dignité peut estre fort proprement accomparée à la qualité d’un Duc ou d’un Marquis parmi nous, si elle estoit de droit héréditaire transferée à la posterité. ”

“ Quand quelqu’un est convié en quelque banquet solemnel, un jour ou plusieurs devant le festin, celuy qui invite l’autre, envoie un livret de ceux dont a esté parlé dans lequel outre le nom de l’invitant y escrit comme dessus, celui qui convie dit en peu de motz à la maniere accoustumée, elegamment & courtoisement, qu’il a appresté un petit festin d’herbes potageres, & lavé ses gobeletz à fin qu’à tel jour & heure, qui est quasi environ la nuict, il entende la doctrine de celuy qu’il convie, & apprenne quelque chose de lui ; & en apres prie qu’il ne desdaigne pas de luy faire cete faveur. ”

“ Mais celui qui premier de quelque famille prend les resnes de l’Empire, fait des loix nouvelles comme il luy plaist, que la posterité de la mesme famille est contrainte d’observer, & ne leur est pas aisement permis de les changer. C’est pourquoy ces loix que les Chinois gardent à present ne sont pas plus anciennes, qu’Humvu. Iceluy les a toutes ou faites, ou maintenues telles qu’il les avoit receues de ses devanciers, ayant principalement eu esgard à ce qu’il peust trouver moyen de continuer long temps la paix au Royaume, & l’Empire à sa posterité. ”

“ Icelle asseure que cet Univers est composé d’une seule & mesme substance, & que le Créateur d’iceluy ensemble avec la terre & le ciel, les hommes & les bestes brutes, arbres & plantes, & finalement les quatre Elementz sont un corps continu, duquel grand corps chasques choses sont chasque membre. Ilz enseignent par l’unité de cete substance de quel amour toutes choses doivent estre unies ensemble & que chacun peut parvenir à la ressemblance de Dieu, d’autant qu’il est une mesme chose avec luy. ”

“ Et encor qu’en ce Royaume les Philosophes ne commandent pas, on peut neantmoins dire que les Roys mesmes sont gouvernez par les Philosophes. Leur façon d’escrire & composer, qui est semblable à ces figures hieroglyphiques des Egyptiens, n'est pas beaucoup différente de la façon de parler. Car aucun livre pour tout n'est escrit en langage vulgaire. ”

“ Car ilz ont plustost obscurcie la naturelle de divers erreurs, qu’ilz ne l'ont esclaircie. Or d'autant qu’ilz n'ont rien appris de la Dialectique, ilz traictent ces preceptes Ethiques ou moraux sans aucun ordre de doctrine : mais la pluspart avec sentences & ratiocinations confuses, autant qu’ilz peuvent estre guidez de la lumière infuse de nature. Le plus grand Philosophe de tous les Chinois s'appelle Confutius, que je trouve estre venu en ce monde cinq cent cinquante & un an devant l'advenement de nostre Sauveur Jesus Christ en terre, & avoir vescu plus de septante ans. ”

“ Il ne semblera pas estrange à aucun que ceux qui ne se fient pas à leur citoyens & parens se défient des estrangers, soit qu’ilz viennent des lieux voisins ou des provinces plus esloigneez, desquelles ilz n’ont aucune cognoissance qu’obscure & fausse, qu’ilz apprennent de quelques-uns qui viennent en leur Royaume pour offrir les devoirs de subjection. Les Chinois ont honte d’apprendre quelque chose des livres des estrangers, ayans opinion que toutes les sciences se trouvent parmi eux seulz ”

“ Ceux qui font jà d’aage ramassent leurs barbe & cheveux avec un petit bonnet fait de poil de cheval, ou cheveux humains, ou aussi de filetz de soye tissu en forme de retz. Le bonnet est percé en haut, par où les cheveux (d’autant qu’ilz sont longz) sortent, & sont mignardement & artistement nouez. Les femmes ne se servent pas de ce bonnet, mais relevans & ramassans aussi leur perruque en nœudz, elles la parent avec or, argent, pierres precieuses, & finalement avec des fleurs. Elles portent des pendantz d’oreilles, mais point de bagues aux doigtz. ”

“ Et si les chaizes sont desja poseez en leur lieu, c’est toutefois la coustume de les toucher chacune avec les deux mains, & comme les poser plus proprement ; puis chacun de ceux qui sont visitez font le mesme, & tout de mesme façon. En apres le plus honorable d’entre les hostes, s’ilz sont plusieurs, prend de mesme façon le siege de celuy qu’il visite, & le pose à l’opposite de sa chaize, & tout de mesme façon secoue, ou fait semblant de secouer la poussiere. Tous les autres apres, s’ilz sont plusieurs, font le mesme par ordre de l’aage, ou dignité. ”

“ Les presens qu’on envoie peuvent sans aucune tache d’incivilité estre partie refusez, partie renvoiez sans offense de celuy qui les offre : ce que quand il se fait, on fait les remerciemens avec un semblable, livret, ou on renvoie modestement les presens, ou on escrit ceux qu’on a acceptez ou non, marquant la liste de ceux qu’on rend en eschange, & ce non sans divers complimens de ceremonie, qu’il seroit long de raconter. Cela aussi nous est fascheux & importun, que les Chinois ont accoustumé faire des petitz presens d’argent. ”

“ Mais venons particulierement aux ordres des Magistratz, desquelz en general on trouve de deux sortes. L’un est de ceux qui non seulement ont des offices de Cour dans la maison du Roy, mais qui encor d’icelle, comme d’une eschauguette, gouvernent tout le Royaume. L’autre est des Magistratz des Provinces, qui gouvernent chasque Province ou ville. Il y a cinq ou six volumes d’assez juste grosseur traitans de l’un, & de l’autre ordre, qui s’exposent en vente par tout le Royaume, & s’impriment en la Cour Royale de Pequin deux fois tous les mois. ”

“ Tous les Chinois, & les autres peuples voisins qui ont les characteres des Chinois, font profession de l’une de ces trois. Or ces peuples sont les Japons, Corians, Leuqui & Cocincinois. La secte des lettrez est la propre des Chinois, & tres ancienne en ce Royaume. Cete-ci gouverne la Republiques plusieurs livres. & est estimée par dessus toutes les autres. Les Chinois ne font pas chois de la loy de cete secte, ains ilz la reçoivent ensemble avec l’estude des lettres : & n’y a aucun de ceux qui estudient, ou qui acquièrent des honneurs literaires, qui ne face profession d’icelle. ”

“ Tous les livres des Chinois qui traident des mœurs sont pleins de preceptes pour exciter les enfans à l’obeissance & honneur deu aux parens, & aux superieurs. Et à la verité si nous considerons ceste apparence exterieure de pieté, il n’y a aucune autre nation en tout le monde accomparable aux Chinois. Ce que je prouveray par quelques indices. Ilz observent une coustume solemnelle de rendre honneur aux plus anciens s’assoians pres d’eux de sorte qu’ils ne demeurent jamais en mesme rang, & encor moins devant, mais se tiennent d’un ou d’autre costé ”

“ De telle sorte qu’il excitoit un chacun à l'estude de la vertu non moins par exemple, que par escris & conferences : par laquelle façon de vivre il a acquis telle reputation entre les Chinois, qu’on croit qu'il a surpassé en saincteté de vie tous les mortelz autant qu’il y en a eu d'excellens en vertu, en quelque lieu du monde que ce soit. ”